Iliga꞉felo꞉ 19:16-27

¹⁶A꞉la꞉sa꞉labiki, kalu mama mogago꞉lo꞉ dowo꞉ a꞉ma꞉yo꞉ i o꞉lia꞉ alan bubaki, kalu doma꞉la꞉fo꞉ i a꞉no꞉ yame tanda꞉sa꞉ga꞉, helebeso꞉g tambo bidila꞉ ko꞉lo꞉, iyo꞉ ho꞉bo꞉lo꞉ a꞉la꞉ta꞉ga꞉ dalaido꞉.

¹⁷Yu kalu o꞉lia꞉ Gilig kalu o꞉lia꞉ Efesa꞉sdo꞉ sen a꞉no꞉ tambo, dimido꞉ a꞉no꞉ da꞉da꞉sa꞉ga꞉yo꞉, iyo꞉ tagilakiyo꞉, Ya꞉su Alan a꞉ma꞉ wiyo꞉ wabudaki, dulugu sio꞉.

¹⁸A꞉la꞉ta꞉ga꞉ tilidabu kaluka꞉isale modo꞉ a꞉no꞉ kalaba ya꞉sa꞉ga꞉, mogago꞉ dimida꞉len ilido꞉wo꞉ tambo foga꞉le sio꞉.

¹⁹Kalu nolo꞉ fofalo꞉ dimida꞉sen i a꞉ma꞉yo꞉ ene fofalo꞉ dimida꞉sen mo꞉fo꞉s ko꞉lo꞉ kambolola꞉ a꞉no꞉ dia꞉sa꞉ga꞉, tambo siwa꞉la gido꞉. Mo꞉fo꞉s de amilo꞉ gido꞉ a꞉no꞉ di mole agelo꞉wo꞉ 50,000 silba o꞉ngo꞉ ko꞉lo꞉ gido꞉.

²⁰A꞉la꞉do꞉ dimido꞉ a꞉namio꞉, Alana꞉ to we kalab amio꞉ halaido꞉ fa꞉la꞉dowakiyo꞉, kaluka꞉isaleyo꞉ tambo da꞉da꞉li ha꞉na꞉ga꞉ ilido꞉.

²¹A꞉ma꞉ fa꞉s amio꞉, Fol e Masedonia a꞉la꞉ta꞉ga꞉ Akaya hen a꞉no꞉ tinia꞉liki, Ya꞉lusalem ha꞉na꞉no꞉ asulo꞉. “Ne a꞉na ha꞉na꞉ga꞉yo꞉, Lom a꞉namio꞉lo꞉ ha꞉na꞉no꞉ asulo꞉l” a꞉la꞉sio꞉.

²²A꞉la꞉fo꞉ko꞉lo꞉ Fol elo꞉ asuwa꞉ta꞉sen kalu a꞉la꞉, Timoti o꞉lia꞉ Elastus a꞉no꞉ Masedonia iliga꞉takiyo꞉, e Asia hen a꞉naka o꞉elen.

²³Ho꞉len a꞉namio꞉ Alana꞉ man o꞉lo꞉ kudu ha꞉na꞉lab a꞉no꞉lia꞉yo꞉ kego꞉wo꞉ mada alan fa꞉la꞉dowo꞉.

²⁴Kalu nowo꞉ ene wiyo꞉ Demitias, eyo꞉ silbayo꞉ dia꞉sa꞉ga꞉, madali gode, Atemis a꞉no꞉ misido꞉ momada꞉sa꞉ga꞉, amisa꞉n kalumo꞉ kililia꞉sen. Kalu egeledo꞉ nanogdo꞉ dimidab i a꞉no꞉lo꞉ mole alan dia꞉sen.

²⁵Demitias eyo꞉ nanogdo꞉ dia꞉sen kalu a꞉no꞉ tambo kegea꞉sa꞉ga꞉, imo꞉wo꞉ a꞉la꞉sio꞉, “Nanog nilido꞉ dimida꞉sen wema꞉yo꞉, moleyo꞉ nafa dia꞉sen a꞉no꞉ gio꞉ asulab.

²⁶Ko꞉sega kalu we, Fol e nili amisa꞉n o꞉lia꞉ Esia heno꞉lo꞉ wida꞉li sia꞉likiyo꞉ ililima꞉nigab ko꞉lo꞉, nili dagiya꞉lo꞉ dimido꞉ gode a꞉no꞉, gode hendelema a꞉la꞉wido꞉ ko꞉lo꞉, kaluka꞉isaleya꞉ asulo꞉wo꞉ e no꞉nolo꞉ alita ta꞉fo꞉. A꞉la꞉do꞉ go꞉ a꞉no꞉ gio꞉ tamina ba꞉ba꞉ a꞉la꞉ta꞉ga꞉ dabu.

²⁷A꞉la꞉fo꞉ko꞉lo꞉ o꞉go꞉ nili mole anama꞉kilo꞉ nanogdo꞉ dia꞉sen wema꞉, wi nafayo꞉ mogagila꞉ma꞉ib. Imili weno꞉ ko꞉mba. Ko꞉sega nili gode Atemis, Asia heno꞉ tambo o꞉lia꞉ henfelo꞉ tambo amio꞉ wabuda꞉sen a꞉no꞉, ene wi alan a꞉no꞉ wilo꞉ma doma꞉ib. A꞉la꞉ta꞉ga꞉ ene gulugululan a a꞉no꞉ o꞉ngo꞉mal a꞉la꞉asuluma꞉ib” Demetius eyo꞉ a꞉la꞉sio꞉.