Text copied!
CopyCompare
Kaluli Baibel - Iliga꞉felo꞉ - Iliga꞉felo꞉ 18

Iliga꞉felo꞉ 18:8-25

Help us?
Click on verse(s) to share them!
8Tolo꞉ wida꞉sen a o꞉lo꞉ biso꞉ kalu, Kilisbus, e o꞉lia꞉ ene so꞉lo꞉ o꞉lia꞉yo꞉ Alano꞉ tilidabu ko꞉lo꞉ Kolin kaluka꞉isale modo꞉ to elo꞉wo꞉ da꞉da꞉sa꞉ga꞉yo꞉, iyo꞉lo꞉ Alano꞉ tilidadabiki, iyo꞉ ho꞉no꞉ to꞉lolo꞉.
9Nulu no amio꞉, Fol e ho꞉le badakiyo꞉, Alana꞉yo꞉ emo꞉wo꞉ a꞉la꞉sio꞉, “Ge mano꞉ walama꞉no꞉wo꞉, tagilakiyo꞉ eda꞉so꞉bo. Walafo꞉ ko꞉ dofo꞉lubi.
10Mo꞉wo꞉ ne ho꞉leno꞉ tambo ge o꞉lia꞉ dofo꞉mela꞉no꞉. Amisa꞉n kaluka꞉isale modo꞉ sab we nino꞉ ko꞉lo꞉ gisa꞉yo꞉ ge mo꞉mogagima꞉ib” Alana꞉yo꞉ a꞉la꞉sio꞉
11A꞉la꞉fo꞉ko꞉lo꞉ Fol e donayo꞉ imilig a꞉la꞉ta꞉ga꞉ ele do꞉go꞉fela꞉fo꞉wo꞉ Kolin amisa꞉n a꞉naka siliki, Godeya꞉ mano꞉ imo꞉wo꞉ a꞉na wida꞉len.
12Galio e Akaya hen a꞉namio꞉ gamani kalu dowakiyo꞉, Yu kalu nolo꞉ kegeakiyo꞉, Fol e ta꞉lia꞉sa꞉ga꞉, mo꞉walilima꞉ni ane.
13Iliyo꞉ mo꞉walilakiyo꞉ a꞉la꞉sio꞉, “Kalu wema꞉yo꞉ kaluka꞉isalemo꞉ widakiyo꞉, Godeya꞉lo꞉ ele saefa꞉yo꞉ mo꞉kuduha꞉naki, nio꞉ hala guluguluma꞉kiyo꞉ e wido꞉ ko꞉lo꞉, gemo꞉ mo꞉walilima꞉ki tililia꞉ mio꞉.”
14Fol eyo꞉ towo꞉ a꞉ma꞉la꞉bo꞉ sa꞉ma꞉nigabikiyo꞉, Galio꞉ eyo꞉ Yu kalu imo꞉wo꞉ a꞉la꞉sio꞉, “Yu kalu giliyo꞉, kalu wema꞉yo꞉ gamani ele difa꞉ amio꞉ hala nowo꞉ o꞉go꞉so꞉ ko꞉lo꞉ mo꞉walilima꞉ni mio꞉ kibo꞉bowo꞉, niyo꞉ o꞉li do꞉bo꞉lo.
15Ko꞉sega hida꞉yo꞉ we, gini towo꞉ a꞉la꞉ta꞉ga꞉ wiyo꞉ ko꞉li ko꞉lilo꞉ a꞉la꞉ta꞉ga꞉ gini ele saefa꞉ a꞉no꞉lo꞉ gio꞉ a꞉na towa꞉ kego꞉ ko꞉lo꞉, to we gegele ka digalila꞉bi. Niyo꞉ hida꞉yo꞉ we mo꞉mo꞉walilima꞉no꞉.”
16To a꞉no꞉ sa꞉la꞉sa꞉ga꞉, Galio eyo꞉ iyo꞉ hamana꞉ki, o꞉luga꞉felo꞉
17Iliyo꞉ ha꞉la꞉ya ha꞉nakiyo꞉, kaluka꞉isale kegeo꞉ a꞉ma꞉yo꞉ wida꞉sen alo꞉ bo꞉fo꞉lowan kalu, Sostenes emo꞉wo꞉ gadiaki, e ta꞉lia꞉sa꞉ga꞉, mo꞉walilia꞉sen hena so꞉no꞉. Ko꞉sega Galio eyo꞉ ililo꞉ dimidab a꞉no꞉ mo꞉kele asulo꞉.
18Kolin amisa꞉n amio꞉, Fol e ho꞉len nolo꞉ tilidabu kaluka꞉isale o꞉lia꞉ a꞉na sa꞉ga꞉, Keliso kaluka꞉isale a꞉namilo꞉ senbo꞉wo꞉ ta꞉biyo꞉ a꞉la꞉sa꞉la꞉ga꞉, Fol eyo꞉, Bisilia o꞉lia꞉ Akwila o꞉lia꞉yo꞉ ho꞉n ko꞉suwa disa꞉la꞉sa꞉ga꞉, Silia꞉ hen a꞉namida꞉ ane. E semo꞉ ane, Senkilia amisa꞉n a꞉naka silikiyo꞉, Fol eyo꞉ Godemo꞉ dinali saefo꞉ ko꞉lo꞉ Yu man kudu ha꞉naki, e misa꞉ fo꞉no꞉ gedeo꞉.
19Iyo꞉ ha꞉na꞉sa꞉ga꞉ Efesa꞉s amisa꞉n a꞉na fa꞉la꞉dowakiyo꞉, Fol e Bisilia o꞉lia꞉ Akwila o꞉lia꞉yo꞉ a꞉na꞉ka ta꞉ta꞉ga꞉, e Yu kaluwa꞉lo꞉ tolo꞉ wida꞉sen aya ha꞉na꞉sa꞉ga꞉, Yu kalu o꞉lia꞉ towo꞉ nenelo꞉.
20Iliyo꞉ Fol e ho꞉len modo꞉ nolo꞉ i o꞉lia꞉yo꞉ o꞉doma a꞉la꞉dabu ba꞉dabikiyo꞉, Fol eyo꞉ ne wilo꞉ mo꞉doma꞉no꞉ a꞉la꞉sio꞉.
21Ko꞉sega e ha꞉na꞉nikiyo꞉, eyo꞉ a꞉la꞉ dinali saitakiyo꞉ a꞉la꞉sio꞉, “Godeya꞉yo꞉ ne a꞉ma꞉la꞉ mena꞉ki da꞉fealega, ne a꞉mia꞉no꞉.” A꞉la꞉sa꞉la꞉sa꞉ga꞉yo꞉, e ho꞉n ko꞉suwa disa꞉la꞉sa꞉ga꞉, Efesa꞉so꞉ a꞉na ta꞉ta꞉ga꞉, ane.
22Fol e ho꞉n ko꞉suwa ha꞉na꞉ga꞉, Sesalia fa꞉la꞉dowakiyo꞉, e Ya꞉lusalem fa꞉la꞉na꞉sa꞉ga꞉, tilidabu kaluka꞉isalemo꞉wo꞉ sagalo꞉ towo꞉ sa꞉la꞉sa꞉ga꞉yo꞉, e Antio꞉g amisa꞉n amio꞉ a꞉ma꞉la꞉ ane.
23Ho꞉len nolo꞉ Antio꞉g a꞉na sa꞉ga꞉yo꞉, e Galesia o꞉lia꞉ Filigia hen a꞉namio꞉, amisa꞉n nowa, amisa꞉n nowa a꞉la꞉sia꞉likiyo꞉, tilidabu kaluka꞉isaleya꞉ asulo꞉wo꞉ halalema꞉ki, wida꞉li sia꞉len.
24Fol e sia꞉labikiyo꞉, Yu kalu nowo꞉, Abolos e Alegsandia kalu ko꞉lo꞉ e Efesa꞉s amisa꞉na mesa꞉ni mio꞉. E Godeya꞉ to sa꞉sa꞉lo꞉wo꞉ fanda asululiaki, to digalo꞉lelo꞉ sa꞉la꞉seno꞉ e.
25A꞉la꞉ta꞉ga꞉ Alana꞉ Man a꞉no꞉ e asulo꞉ ko꞉lo꞉ eyo꞉ iligi mada wida꞉sen. E man nolo꞉ semo꞉asulaki, Yona꞉lo꞉ ho꞉na to꞉lolan man a꞉nako꞉ asulo꞉ ko꞉sega elo꞉ Ya꞉suwa꞉lo꞉ dimido꞉ man ko꞉lo꞉ wido꞉ a꞉no꞉ digalo꞉ wido꞉.

Read Iliga꞉felo꞉ 18Iliga꞉felo꞉ 18
Compare Iliga꞉felo꞉ 18:8-25Iliga꞉felo꞉ 18:8-25