Iliga꞉felo꞉ 16:8-19

⁸A꞉la꞉fo꞉ko꞉lo꞉ iyo꞉ Misia hen a꞉no꞉ da꞉la꞉li ha꞉na꞉sa꞉ga꞉, Toloas amisa꞉na tiane.

⁹A꞉na silikiyo꞉, nulu amio꞉ Fol eyo꞉ ho꞉le ba꞉dakiyo꞉, Masedonia kalu nowo꞉ ene hena kagafo꞉liki, Fol e mena꞉ki a꞉la꞉sio꞉, “Ge Masedonia ya꞉sa꞉ga꞉, nio꞉ asuwa꞉fa꞉ni mena” a꞉la꞉liki susiabiki ba꞉ba꞉.

¹⁰Fol elo꞉ ho꞉le ba꞉dab a꞉no꞉ nimo꞉wo꞉ sa꞉labikiyo꞉, Godeya꞉ mano꞉ nio꞉ a꞉na walama꞉ki sa꞉lab a꞉la꞉ asulakiyo꞉, nio꞉ Masedonia ha꞉na꞉niki, wigibo a꞉naka dimadali.

¹¹Nio꞉ dimidalia꞉sa꞉ga꞉, ho꞉n ko꞉suwo꞉ Toloas a꞉na disa꞉la꞉sa꞉ga꞉, ho꞉na꞉lo꞉ hegefa꞉ hen Samotilas a꞉na fofa꞉sa꞉ dia꞉sa꞉ga꞉ onolo ha꞉nakiyo꞉, ho꞉len imilig nowo꞉ ta꞉ta꞉ga꞉, Neabolis a꞉na fa꞉la꞉dowo꞉.

¹²Nio꞉ a꞉na fa꞉la꞉dota꞉ga꞉, hena ha꞉na꞉la꞉ga꞉, Filibai a꞉na fa꞉la꞉dowo꞉. Filibai a꞉no꞉ Masedonia hen amilo꞉ amisa꞉n alano꞉ e. Tamin amio꞉ Lom kaluwa꞉ amisa꞉n a꞉no꞉ bo꞉fo꞉len. Nio꞉ ho꞉len nowo꞉ a꞉na sen.

¹³Ha꞉fo꞉lo꞉ Dowan ho꞉leno꞉ fa꞉la꞉dowabiki, nio꞉ Yu kaluwa꞉lo꞉ dulugu sa꞉la꞉sen hen a꞉no꞉ keda꞉i ha꞉nakiyo꞉, amisa꞉no꞉ ta꞉ta꞉ga꞉, ho꞉na꞉ aniba ka꞉isale nolo꞉ a꞉namilo꞉ kegenefo꞉len a꞉no꞉lia꞉ siliki, towo꞉ imo꞉wo꞉ wido꞉.

¹⁴To nililo꞉ widabdo꞉ da꞉da꞉len ka꞉isale nowo꞉ wiyo꞉ Lidia. Ka꞉isale we Taiataila amisa꞉n ga ko꞉lo꞉ helebeso꞉g ho꞉mo꞉solo꞉ nafalelo꞉ kililia꞉seno꞉ o꞉m ko꞉lo꞉ e Godeya꞉ wilo꞉ wabulu sa꞉la꞉seno꞉ e. Alana꞉yo꞉ ga a꞉ma꞉ asugo꞉ kolaitabikiyo꞉, Fol elo꞉ to widab a꞉no꞉ tilidabu.

¹⁵A꞉la꞉fo꞉ko꞉lo꞉ ga a꞉no꞉ a꞉la꞉ta꞉ga꞉ kaluka꞉isale ene a a꞉namilo꞉ sen a꞉no꞉lia꞉yo꞉, tambo ho꞉na to꞉lolo꞉ ko꞉lo꞉ Lidia eyo꞉ nio꞉ e aya mena꞉ki susiakiyo꞉, “Gio꞉ ne hendele Alan amio꞉ tilida꞉dab a꞉la꞉asulalega, ni aya mesa꞉ mena,” a꞉la꞉sa꞉labikiyo꞉, nio꞉ e o꞉lia꞉ ane.

¹⁶Ho꞉len no amio꞉, nio꞉ tolo꞉ dulugu sa꞉la꞉sen hena ha꞉na꞉no꞉ ha꞉na꞉len amio꞉, madalilo꞉ nanog dian ga nowo꞉ toga gido꞉. Ga e amio꞉ mama mogago꞉wo꞉ dofo꞉liki, tif amilo꞉ dimidama꞉nigabo꞉ e ho꞉le ba꞉da꞉sa꞉ga꞉, dinali sa꞉la꞉sen. A꞉la꞉fo꞉ko꞉lo꞉, ga o꞉lo꞉ biso꞉wa꞉yo꞉ moleyo꞉ modo꞉ ko꞉lo꞉ dia꞉sen.

¹⁷Ga we Foldo꞉ ni kudu ya꞉ga꞉ yakiyo꞉, towo꞉ halale sa꞉laki, “Kalu i we, Gode Iwalulo꞉ a꞉laba꞉ Ene nanog dian kalu wema꞉yo꞉, gilo꞉ a꞉ma꞉la꞉do꞉ gasilia꞉b man a꞉no꞉ ko꞉lo꞉ wida꞉i yab” a꞉la꞉sio꞉.

¹⁸Ga a꞉ma꞉yo꞉ ho꞉len modo꞉ amio꞉ a꞉la꞉sa꞉la꞉li ya꞉len ko꞉lo꞉, Fol e mo꞉bea꞉sa꞉ga꞉, nodolakiyo꞉ mama mogago꞉mo꞉wo꞉ towo꞉ a꞉la꞉sio꞉, “Niyo꞉ Ya꞉su Kelisowa꞉ wi halaido꞉ a꞉na ilikiyo꞉, ge ga we ta꞉fo꞉ hamana!” A꞉la꞉sa꞉labikiyo꞉, wigibo a꞉naka mama mogago꞉ e amilo꞉ elen a꞉no꞉ ta꞉fo꞉gane.

¹⁹Madali nanogdo꞉ dian ga o꞉lo꞉ biso꞉ a꞉ma꞉yo꞉ wa꞉kabiyo꞉ iliyo꞉ moleyo꞉ mo꞉dia꞉nigo꞉bo꞉lo꞉b a꞉la꞉asulaki, iliyo꞉ Fol dia꞉ Sailas dia꞉yo꞉ ta꞉lia꞉sa꞉ga꞉, amisa꞉n kalulo꞉ kegea꞉sen a꞉na susululia꞉ga꞉, Loma꞉ mo꞉walilabdo꞉ da꞉dan kalulo꞉wa ta꞉takiyo꞉ a꞉la꞉sio꞉, “Kalu a꞉la꞉ we Yu kalu ko꞉lo꞉ nili amisa꞉n wenamio꞉ mogago꞉ dimida꞉lab.