Iliga꞉felo꞉ 14:12-24

¹²A꞉la꞉fo꞉ko꞉lo꞉ iliyo꞉ Banabaso꞉ “Sus” wikilo꞉ a꞉la꞉ta꞉ga꞉ Fol e towo꞉ wala sa꞉lab ko꞉lo꞉ e “Ha꞉mis” wikilo꞉.

¹³Sus gulugulula꞉sen a a꞉no꞉, amisa꞉n a꞉no꞉ ilif tolo꞉ ha꞉la꞉ya elen ko꞉lo꞉ Sus godemo꞉lo꞉ bobalo꞉ so꞉mia꞉sen kalu a꞉ma꞉yo꞉, kao de o꞉lia꞉ mamo o꞉lia꞉yo꞉ dia꞉ya꞉ga꞉, amisa꞉n toga difa꞉. Mo꞉wo꞉ iliyo꞉ Fol dia꞉ Banabas dia꞉ma꞉ wi wabudaki, somia꞉no꞉ asulaki go꞉.

¹⁴Ko꞉sega Fol dia꞉ Banabas dia꞉yo꞉ ililo꞉ dimidama꞉nigab a꞉no꞉ da꞉da꞉sa꞉ga꞉, iliyo꞉ ka ta꞉foma꞉kiyo꞉, a꞉la꞉ma꞉yo꞉ so꞉g ko꞉lo꞉ a꞉no꞉ bidila꞉sa꞉ga꞉, kalu kegeo꞉lab us a꞉na nai ha꞉na꞉ga꞉, a꞉na halale sio꞉,

¹⁵“Kaluka꞉isale gililo꞉ dimidab we, waga asulabiki dimidaya? Na꞉no꞉lo꞉ henfelo꞉ kalule, ge o꞉ngo꞉ mio꞉ ko꞉lo꞉ gililo꞉ madali godemo꞉lo꞉ duluda꞉lab a꞉no꞉ kata꞉ta꞉sa꞉ga꞉, Gode mela꞉no꞉lo꞉ a꞉lab a꞉no꞉, Hebeneyo꞉lo꞉, henfelo꞉wo꞉lo꞉, so꞉lu ho꞉no꞉ o꞉lia꞉ kelego꞉ a꞉namio꞉lo꞉ da꞉labdo꞉ dimido꞉ a꞉no꞉ ko꞉lo꞉ duluguma꞉ki, walama꞉ni mio꞉.

¹⁶Taminde amio꞉, Godeya꞉yo꞉ kaluka꞉isaleyo꞉ ini man mogago꞉ dimida꞉melea꞉ki ta꞉fo꞉.

¹⁷Ko꞉sega kaluka꞉isaleyo꞉ e hendele alabo꞉lo꞉b a꞉la꞉bo꞉ asuluma꞉kiyo꞉, eyo꞉ man nafale dimida꞉len. Eyo꞉ ho꞉no꞉ timina꞉ki dimia꞉sen a꞉la꞉ta꞉ga꞉ egelo꞉ amio꞉ fowo꞉ ho꞉len enedo꞉leya helema꞉ki dimia꞉sen. A꞉la꞉ta꞉ga꞉ giliyo꞉ dia꞉sa꞉ga꞉ nab amio꞉, gio꞉ sagalo꞉wo꞉ alan doma꞉ki ta꞉fo꞉len.” Fol eyo꞉ a꞉la꞉sio꞉.

¹⁸To a꞉no꞉ imo꞉wo꞉ sio꞉ ko꞉sega kaluka꞉isale iliyo꞉ boba somia꞉no꞉ a꞉no꞉ mo꞉ta꞉fa꞉no꞉, dimidama꞉no꞉le asulabiki, imo꞉wo꞉ mo꞉dimidama꞉ki, a꞉la꞉ma꞉yo꞉ towo꞉ halaido꞉ sa꞉la꞉i ha꞉nabi, iliyo꞉ mo꞉dimido꞉.

¹⁹Tif amio꞉, Yu kalu Aikoniumdo꞉ seno꞉ a꞉la꞉ta꞉ga꞉ Antio꞉gdo꞉ seno꞉ ya꞉sia꞉sa꞉ga꞉, Lista a꞉na fa꞉la꞉dota꞉ga꞉yo꞉, kaluka꞉isale kegeo꞉ a꞉no꞉ digene alitabiki, iyo꞉ Fol emo꞉wo꞉ gadia꞉sa꞉ga꞉, uwa꞉ agodo꞉ ko꞉lo꞉ e sowab a꞉la꞉asulaki, do꞉mo꞉wo꞉ susululia꞉ga꞉, amisa꞉n ha꞉la꞉ya sandifo꞉.

²⁰Ko꞉sega tilidabu kaluka꞉isale iyo꞉ ya꞉sa꞉ga꞉, e banagalilia꞉tabiki, Fol e a꞉ma꞉la꞉ dasilia꞉ga꞉, amisa꞉n usa a꞉ma꞉la꞉ ane. A꞉la꞉ta꞉ga꞉ o꞉g a꞉no꞉ a꞉naka alita꞉ga꞉, a꞉la꞉yo꞉ amisa꞉n a꞉no꞉ ta꞉ta꞉sa꞉ga꞉, Debe amisa꞉na ha꞉na꞉ni ane.

²¹A꞉la꞉yo꞉ ha꞉na꞉sa꞉ga꞉, Godeya꞉ to mano꞉ Debe a꞉na wido꞉ amio꞉, kaluka꞉isaleyo꞉ asugo꞉ modo꞉ nodolo꞉. A꞉la꞉ta꞉ga꞉ a꞉la꞉yo꞉ a꞉ma꞉la꞉ Lista ane. A꞉la꞉ta꞉ga꞉ Aikonium ane. A꞉la꞉ta꞉ga꞉yo꞉ Bisidia hena ha꞉na꞉likiyo꞉, Antio꞉g a꞉na fa꞉la꞉dowo꞉.

²²A꞉la꞉yo꞉ a꞉na ha꞉na꞉sa꞉ga꞉yo꞉, tilidabu kaluka꞉isale a꞉no꞉ man hendele usa tiha꞉na꞉sa꞉ga꞉, tilidabu halaido꞉wo꞉ dima꞉ki, widaki a꞉la꞉sio꞉, “Nio꞉ hida꞉yo꞉ ko꞉li ko꞉lilo꞉ ko꞉le ba꞉da꞉i ha꞉na꞉la꞉ga꞉, Godeya꞉ enedo꞉ bo꞉fo꞉likilo꞉ ha꞉g amilo꞉ doma꞉no꞉wo꞉ niliyo꞉ a꞉na dia꞉no꞉” a꞉la꞉wida꞉i ane.

²³Amisa꞉n a꞉la꞉lo꞉ ane a꞉namio꞉, Fol dia꞉ Banabas dia꞉yo꞉ tilidabu kaluka꞉isalelo꞉ bo꞉fo꞉mela꞉no꞉wo꞉ misa꞉ kalu a꞉na da꞉fe alifa꞉ ko꞉lo꞉ Alana꞉do꞉ tilidabu kaluka꞉isale a꞉no꞉ Alana꞉yo꞉ bo꞉fo꞉melea꞉ki, ma꞉no꞉ mo꞉naki, Godemo꞉ dulugu salifa꞉.

²⁴A꞉la꞉yo꞉ Bisidia hen a꞉namio꞉ sia꞉la꞉ga꞉yo꞉, Bafilia hena fa꞉la꞉dota꞉ga꞉ ha꞉nakiyo꞉, Bega amisa꞉n a꞉na to mano꞉ wido꞉. A꞉la꞉ta꞉ga꞉ a꞉la꞉yo꞉ hen a꞉na ta꞉ta꞉ga꞉yo꞉, Atalia amisa꞉na ha꞉na꞉ga꞉ fa꞉la꞉dowo꞉.