IKUƆ́ NÌÙBƐ̀ 9:1-13

¹Diyiè niínnì yiè kɛ̀ Mɔyiisii yú Anɔɔ nɛ̀ o bí nɛ̀ Isidɑyɛɛribɛ kó bɛkótíbɛ̀,

²kɛ́nɑ́kɛ́ Anɔɔ kɛ dɔ̀: Wɑɑnní dinɑɑdɑbii mɛyɛi ncĩ́ɛ̃́mmɛ̀ kpɛri nɛ̀ dipedɑɑ̀ ɑ yóó féútɛ́ dì ti Yiɛ̀ nKuyie nkɛ́tuɔ. Dɛdɛ́ kɛ̀ dɛ̀ ntú dɛ̀ɛ̀ kpɑ kuyɛ̀nkù, kɑ̀ɑ dɛ̀ tɔní mɛtɑummɛ̀ tou ììkɛ̀.

³Kɑ̀ɑ dèè ɑ nɑ́kɛ́ Isidɑyɛɛribɛ kɛ dɔ̀: Wɑɑ́nnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛri nɛ̀ dinɑɑdɑbii nɛ̀ dipedɑbii dɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀, kɛ kpɑ kuyɛ̀nkù kɛ́ dɛ̀ fèútɛ́ ti Yiɛ̀ nKuyie nkɛ́tuɔ.

⁴Kɛ̀ di dèè di tɔní dinɑɑdɑɑ̀ nɛ̀ dipedɑɑ̀ mɛtɑummɛ̀ kpɛyɛ kɛ́ yɛ̀ nkù fèútɛ́ mɛtɑummɛ̀ tou ììkɛ̀ kɛ́wɑɑ́ nnɛ̀ muyuo mmùù ɑ̃̀ntɛnɛ̀ mɛkùɔ̀. Yíe nkù yóó di bɛnkɛmu ku mɑ́ɑ̀.

⁵Kɛ̀ bɛ̀ɛ wɑɑnní Mɔyiisi yɛ̃ mbɛ̀ɛ wɑɑnní dɛ̀ kɛ́deè kɛ́tíínní bɛmɔu mɛtɑummɛ̀ tou ììkɛ̀ kɛ́ncómmú.

⁶Kɛ̀ Mɔyiisi dɔ̀: Ntɛ ti Yiɛ̀ nKuyie nyɛ̃ ndí dɔɔ̀mɛ̀ kɛ́yɑ̀ ku kpetì.

⁷Kɛ̀ Mɔyiisii nɑ́kɛ́ Anɔɔ kɛ dɔ̀: Tɔ́ɔ́nní diwũɔ̃tɔ̀nnì borɛ̀ kɛ́féútɛ́ ɑ ɔ̃̀fɛ̀ mɛyɛi ncĩ́ɛ̃́mmɛ̀ kɔfɛ kɛ́féútɛ́ fɛtɛfɛ̀ kɛ́tuɔ, kɛ́dɔɔ̀ mɛyɛi ncĩ́ɛ̃́mmɛ̀ kó ikuɔ́ ɑ mɔ́mmuɔ nkpɛ́í nnɛ̀ ɑ cĩ́ɛ̃̀tɛ̀ kɔbɛ kpɛ́í. Kɑ̀ɑ dèè ɑ féútɛ́ bɛnìtìbɛ̀ yɛi ncĩ́ɛ̃́mmɛ̀ kɔfɛ, kɛ́ bɛ̀ dɔɔ̀ mɛyɛi ncĩ́ɛ̃́mmɛ̀ kó ikuɔ́, kɛ́ndònnɛ̀ ti Yiɛ̀ nKuyie mbɛ́immɛ̀.

⁸Kɛ̀ Anɔɔ tɔ́ɔ́nní diwũɔ̃tɔ̀nnì borɛ̀ kɛ́féútɛ́ ti Yiɛ̀ nKuyie ndinɑɑdɑbii o mɔ́mmuɔ nho yɛi ncĩ́ɛ̃́mmɛ̀ kpɛ́í.

⁹Kòo bíí ò duɔ́ mmɛyĩ̀ĩ̀ nkòo pɔɔ̀tɛ̀ o nɔ́mbifɛ kɛ́fɛtɛ́ diwũɔ̃tɔ̀nnì bɑ̀kɛ̀, kɛ́deè kɛ́cóúnko mɛsɔmmɛ di fũ̀ɔ̃̀,

¹⁰kɛ́dɛitɛ mɛkùɔ̀ nkpɛrɛ nɛ̀ yɛceumbɛ̀ nɛ̀ yɛ kùɔ̀ nnɛ̀ yɛɔ̃ kɔ̃mɛ, kɛ́ dɛ̀ tùɔ ndiwũɔ̃tɔ̀nnì ĩ́nkɛ̀, kɛ́ndònnɛ̀ ti Yiɛ̀ nKuyie ndo tì nɑ̀kɛ́mɛ̀ Mɔyiisi.

¹¹Kɛ̀ bɛ̀ɛ dennɛ imɑɑ nnɛ̀ kukɔ̃̀nkù Isidɑyɛɛribɛ kɑrì kɛ́tuɔ.

¹²Kɛ̀ Anɔɔ féútɛ́ dipedɑɑ̀ bɛ̀ yóó tuɔ ndì, kòo bíí ò duɔ́ ndi yĩ̀ĩ̀ nkòo míɛ́tɛ́ diwũɔ̃tɔ̀nnì kɛ́fitɛ́.

¹³Kɛ̀ bɛ̀ɛ ò duɔ́ ndɛ kó fɛɔ̃̀fɛ̀ kó imɑɑ nnɛ̀ diyuu, kòo dɛ̀ wɛ̃nnɛ́ kɛ́tuɔ ndiwũɔ̃tɔ̀nnì ĩ́nkɛ̀,