IKUƆ́ NÌÙBƐ̀ 5:5-18

⁵Kòò tɔ dɛ kó mɛyɛi nkó mɛ̀mɑmɛ̀ ò dò nkɛ́ mɛ̀ dɑ́ɑmmu.

⁶Wèe tɔní fɛpenifɛ yoo tɛbɔniitɛ kɛ́ũtɛ́ dɛ kó mɛyɛi, kɛ̀ ikuɔ́ nìùtìi o dɔ̀ɔ̀ mɛyɛi ncĩ́ɛ̃́mmɛ̀ kó ikuɔ́, kóò dɛɛtɛ́nɛ̀ dɛ kó mɛyɛi.

⁷Kɛ̀ dɛ̀ dò nhòmɔù í mɔkɛ fɛpìèfɛ̀ yoo tɛbuɔtɛ̀ kɛ bo n féútɛ́ ò dɔ̀ɔ̀ mɛ̀ɛ̀ yɛi nkpɛ́í kɛ̀ nh ò cĩ̀ɛ̃́, wèe tɔní sinɔ́nkperípíɛ́ sìdɛ́sì yoo yɛkpɛtinɔ́nkperɛ yɛ̀dɛ́ɛ̀, kɛ́ n féútɛ́ tɛmɑ́ɑ̀ kɛ́tuɔ nkɛ́nféútɛ́ tɛtɛtɛ̀ ò dɔ̀ɔ̀ mɛ̀ɛ̀ yɛi nkpɛ́í kɛ̀ nh ò cĩ̀ɛ̃́.

⁸Wèe dɛ̀ tɔní kɛ́duɔ́ nyikuɔ́ nìùtì kòo ketɛ́ kɛ́féútɛ́ mɛyɛi ncĩ́ɛ̃́mmɛ̀ kpɛtɛ. Wèe ĩ́ṹtɛ́ tɛ fɔ̃̀níí ò mɛ mbɑ́ɑ́ tɔ̃tɛ tɛ yuu,

⁹kɛ́dɛitɛ tɛ yĩ̀ĩ̀ nkɛ́míɛ́tɛ́ diwũɔ̃tɔ̀nnì píkù kɛ́cóúnko mɛsɔmmɛ diwũɔ̃tɔ̀nnì fũ̀ɔ̃̀, mɛyɛi ncĩ́ɛ̃́mmɛ̀ kpɛtɛ ntɛ,

¹⁰kɛ́kuɔ tɛdɛ́tɛ̀ kɛ́tuɔ nyikuɔ́ yɛ̃mmɛ̀. Kɛ̀ ikuɔ́ nìùtìi ò dɔɔ̀ mɛyɛi ncĩ́ɛ̃́mmɛ̀ kó ikuɔ́, kɛ̀ nhò cĩ̀ɛ̃́ nho yɛi.

¹¹Kɛ̀ dɛ̀ mɛ ndò nhòmɔù í mɔkɛ sinɔ́nkpeé yoo yɛkpɛtinɔ́nkperɛ, wèe tɔní muyuo ncìdóòbɛ̀ bɛ̀nɑ̀ɑ̀, ò bɑ́ɑ́ mù yɔɔrɛ mɛkùɔ̀ nhò mɛ mbɑ́ɑ́ cɔ̃nnɛ́ tihúúntì mu ĩ́nkɛ̀, kɛ yɛ̃́ mɛyɛi ncĩ́ɛ̃́mmɛ̀ kɔ̃mu mmumɛ̀.

¹²Wèe mù tɔní kɛ́duɔ́ nyikuɔ́ nìùtì, kòo mù yɛ̃tɛ́ dinɑcɛkutiri, kɛ́wɛ̃nnɛ́nɛ̀ dɛ̀ɛ̀ yóó tuɔ nkɛ́tuɔ, kɛ̀ dɛ̀ɛ bɛnkɛ mumɔu mù tumɛ̀ n kɔ̃mu mmu, mù yóó ntu mɛyɛi ncĩ́ɛ̃́mmɛ̀ kɔ̃mu mmu.

¹³Kɛ̀ ikuɔ́ nìùtìi ò dɔ̀ɔ̀ mɛyɛi ncĩ́ɛ̃́mmɛ̀ kó ikuɔ́ kɛ̀ nhò cĩ̀ɛ̃́ nho yɛi. Kɛ̀ ikuɔ́ nìùtì nte musɔmmu ò ɔ̃ nte mɛ̀ɛ̀ botí tidiitì kó yɛpɑ̃rɛ̀ kɔ̃mu.

¹⁴Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀:

¹⁵Kɛ̀ dɛ̀ dò ndɛ̀ kpɛtɛ́nɛ̀ òmɔù kòò kɑ̀ɑ́kɛ́ yɛpɑ̃rɛ̀ bɛ̀ m pɑ̃ɑ̃ nyɛ̀, wèe tɔní dipedɑɑ̀ dìì kpɑ kuyɛ̀nkù dìì donku mɑ̀nnɛ̀ bɛ̀ kèétɛ́ ìì díítí n tɑummɛ̀ tou kpɛ́í, mmɛyɛi nhũtímù kó fɛɔ̃̀fɛ̀ nfɛ.

¹⁶Wèe yietí ò yùúkú dɛ̀ n tɑummɛ̀ tou kɛ́nɔ́ɔ́ nkɛ̀ dɛ̀ mmɑ̀nnɛ̀ ò bo totɛ́mɛ̀ ò yùúkú dɛ̀ yɛwɛ́tiyɛ̀ yɛ̀nùmmù kó dìmɑ́ɑ̀ kòo dɛ̀ duɔ́ nyikuɔ́ nìùtì. Kɛ̀ ikuɔ́ nìùtìi féútɛ́ diì pedɑɑ̀ kóò dɔ̀ɔ̀ mɛyɛi nhũtímù kó ikuɔ́ kɛ̀ nh ò cĩ̀ɛ̃́ nho yɛi. Dɛ kó ikuɔ́ nyi mɛmmɛ.

¹⁷Kòò mɔù yetɛ́ kɛ dɔ̀ɔ̀ n yɛ̃ n yí dɔ́ dɛ̀, kɛ í yɛ̃́, dɛ kó mɛyɛi mbɑɑ bo o yuu ĩ́nkɛ̀ nkɛ.

¹⁸Kɛ̀ dɛ̀ boní kòò bɑntɛ́ wèe dɛitɛ o wũɔ̃ miɛkɛ dipedɑɑ̀ dìì kpɑ kuyɛ̀nkù kɛ̀ di donku mɑ̀nnɛ̀ bɛ̀ kèétɛ́ ìì díítí mɛyɛi nhũtímù kpɛ́í nkɛ̀ ikuɔ́ nìùtìi ò dɔ̀ɔ̀ mɛyɛi nhò dɔ̀ɔ̀ mɛ̀ kɛ í yɛ̃́ mɛ kó ikuɔ́ kɛ̀ nh ò cĩ̀ɛ̃́.