IKUƆ́ NÌÙBƐ̀ 3:1-15

¹Kɛ̀ ti Yiɛ̀ nKuyie nni nsɔkɛ́ ku nɑ́ɑǹtì kɛ́bɛ́i nkɛ dɔ̀: Kòò mɔù yó n féútɛ́ fɛɔ̃̀fɛ̀ mɛtɑummɛ̀ kɔfɛ, kɛ̀ dinɑɑdɑɑ̀ ndi yoo fɛnifɛ fɛ̀ ntú fɛ̀ɛ̀ kpɑ kuyɛ̀nkù.

²Wèe tɔní o ɔ̃̀fɛ̀ mɛtɑummɛ̀ tou bòrìnùù kɛ́nɔ́ɔ́ nho nɔu fɛ yuu kɛ́ fɛ̀ fèútɛ́, kɛ̀ ikuɔ́ nìùtì Anɔɔ bíi míɛ́tɛ́ mɛyĩ̀ĩ̀ ndiwũɔ̃tɔ̀nnì kɛ́fitɛ́,

³kɛ́dɛitɛ mɛtɑummɛ̀ kó fɛɔ̃̀fɛ̀ kó imɑɑ mmiɛkɛ bɛ̀ yó n tuɔ nyì: Tinɑutì kó mɛkùɔ̀ nnɛ̀ mɛ̀ɛ̀ tì dɑ̀ɑ́tí.

⁴Nɛ̀ yɛceumbɛ̀ yɛdɛ́ nɛ̀ yɛ kó mɛkùɔ̀ nnɛ̀ kutúúkú nɛ̀ mɛkùɔ̀ mmɛ̀ɛ̀ cɑ̀ɑ́tínɛ̀ yɛɔ̃ nɛ̀ yɛceumbɛ̀.

⁵Kɛ̀ Anɔɔ bíi dɛ̀ tùótɛ́ kɛ́wɛ̃nnɛ́nɛ̀ bɛ̀ yóó tuɔ nfɛ̀ kɛ́dɑɑ́ ndiwũɔ̃tɔ̀nnì idɛí ĩ́nkɛ̀ kɛ́tuɔ. Dɛ̀ tu dipɑ̃nnì ndi dìì kó kufɔ̃ɔ̃ku n nɑɑti.

⁶Kɛ̀ fɛɔ̃̀fɛ̀ sɑ́m̀pɔ́fɛ̀ mɛ nni nfɛ ò dɔ́ kɛ́ n féútɛ́mɛ̀ mɛtɑummɛ̀ kpɛ́í, kɛ̀ fɛdɑɑfɛ̀ nfɛ̀ yoo fɛnifɛ fɛ̀ ntú fɛ̀ɛ̀ kpɑ kuyɛ̀nkù.

⁷Kɛ̀ fɛpìèfɛ̀ mɛ nni nfɛ ò dɔ́ kɛ́ n féútɛ́mɛ̀, wèe fɛ̀ tɔní mɛtɑummɛ̀ tou ììkɛ̀,

⁸kɛ́nɔ́ɔ́ nho nɔ̀ùtɛ̀ fɛ yuu kɛ́ fɛ̀ fèútɛ́ mɛtɑummɛ̀ tou bòrìnùù, kɛ̀ Anɔɔ bíi míɛ́tɛ́ mɛyĩ̀ĩ̀ ndiwũɔ̃tɔ̀nnì kɛ́fitɛ́.

⁹Dɛ kó fɛɔ̃̀fɛ̀ mɛtɑummɛ̀ kɔfɛ, bɛ̀ɛ dɛitɛ mɛkùɔ̀ nkpɛrɛ kɛ̀ dɛ̀ ntú n kpɛrɛ, kɛ̀ bɛ̀ɛ dɛ̀ tùɔ nkɛ́kéétɛ́ kuyóú kumɔu kù tuutɛ́nɛ̀ dɛ̀ kudiiku, nɛ̀ mɛkùɔ̀ mmɛ̀ɛ̀ cɑ̀ɑ́tínɛ̀ tinɑutì nɛ̀ mɛ̀ɛ̀ tì dɑ̀ɑ́tí.

¹⁰Yɛceumbɛ̀ yɛdɛ́ nɛ̀ yɛ kó mɛkùɔ̀ nnɛ̀ kudiiku nɛ̀ mɛkùɔ̀ mmɛ̀ɛ̀ cɑ̀ɑ́tí yɛɔ̃ nɛ̀ yɛceumbɛ̀.

¹¹Kɛ̀ ikuɔ́ nìùtìi dɛ̀ nni ntuɔ ndiwũɔ̃tɔ̀nnì ĩ́nkɛ̀, n kpɛrɛ ndɛ.

¹²Kɛ̀ tɛbuɔtɛ̀ mɛ nni ntɛ, wèe tɛ̀ tɔní mɛtɑummɛ̀ tou ììkɛ̀,

¹³kɛ́nɔ́ɔ́ nho nɔ̀ùtɛ̀ tɛ yuu kɛ́ tɛ̀ fèútɛ́ mɛtɑummɛ̀ tou bòrìnùù. Kɛ̀ Anɔɔ bíi míɛ́tɛ́ mɛyĩ̀ĩ̀ ndiwũɔ̃tɔ̀nnì kɛ́fitɛ́.

¹⁴Dɛ kó difɔ̃nkúò, ntɛ ò yóó tuɔ ndɛ̀ n kpɛ́í, mɛkùɔ̀ mmɛ̀ɛ̀ cɑ̀ɑ́tínɛ̀ tinɑutì nɛ̀ mɛ̀ɛ̀ tì dɑ̀ɑ́tí.

¹⁵Yɛceumbɛ̀ yɛdɛ́ nɛ̀ yɛ kó mɛkùɔ̀ nnɛ̀ kudiiku nɛ̀ mɛkùɔ̀ mmɛ̀ɛ̀ dɑ̀ɑ́tí yɛɔ̃ nɛ̀ yɛceumbɛ̀.