IKUƆ́ NÌÙBƐ̀ 26:7-22

⁷Kɛ̀ di mbɛtì di dootitɔbɛ̀ kɛ bɛ̀ kɔ̀ù.

⁸Di miɛkɛ bɛnìtìbɛ̀ bɛ̀nùmmù níí bo mbɛtì tɛkɔ̀ùtɛ̀ (100), kɛ̀ tɛkɔ̀ùtɛ̀ mbɛtì tɛkɔupípíítɛ̀ (10000) kɛ̀ di bɛ̀ kɔ̀ù.

⁹Kɛ̀ nní mbo difɔ̃nkó kɛ́duɔ́ nkɛ̀ di piɛ́ kɛ̀ nní mpĩ́ n di dɔ̀ɔ̀nɛ̀ mɛ̀ɛ̀ tɑummɛ̀.

¹⁰Kɛ̀ di níí nyo ndi diitì kɛ̀ tipɑ̀ntìi bi, kɛ̀ di cṹũnní tikótì kɛ́ɑ̃nnɛ́ tipɑ̀ntì.

¹¹Kɛ̀ n cĩ́ɛ̃̀tɛ̀ mbo di cuokɛ̀ sɑ̃́ɑ̃̀, m bɑ́ɑ́ di pɛ̃̀.

¹²M bo mbo di cuokɛ̀, kɛ di te kɛ̀ di tú n kɔbɛ.

¹³Mí ndi Yiɛ̀ nKuyie mmíì di te, kɛ di dènnɛní Esibiti. Kɛ̀ dɛ̀ bo yie nkɛ̀ di tɛ̃́nkɛ bɑ́ ntú tidɑɑtì, kɛ toutɛ́ di tuɔ Esibiti kɔbɛ do di toú nyɛ̀, kɛ dí nɑ kɛ ɔ̃ nkérí kɛ yíéo.

¹⁴Kɛ̀ ti Yiɛ̀ nKuyie nní nsɔkɛ́ ku nɑ́ɑǹtì kɛ́bɛ́i nkɛ dɔ̀: Kɛ̀ di mɛ nyetɛ n kpɛti kɛ í tũ̀nnɛ n tɑnnɔ̀ yɛmɔu,

¹⁵kɛ̀ di bùtínnɛ́ n kuɔ́ kɛ pɛ̃̀ n tié, kɛ̀ di tɔ̃̀tɛ n di dɔ̀ɔ̀nɛ̀ mɛ̀ɛ̀ tɑummɛ̀, kɛ yóu kɛ tɛ̃́nkɛ í dɔɔri n tɑnnɔ̀ yɛmɔu yɛ̃mmɛ̀.

¹⁶Ntɛ n yóó di dɔɔ̀mɛ̀: M bo duɔ́ nkɛ̀ mɛyɛi ndiɛmɛ̀ di do kɛ́ di kũɔ̃ nkɛ̀ kukɔ̃ntonnɔɔ diɛkù di pĩ́ nkɛ̀ di nuɔ ntɑ, kɛ̀ kùu tɑ kɛ́ncɑ́ɑ́ ndi kɔ̃̀ntì. Kɛ̀ di níí buɔtí tidiitì kɛ̀ tìi bi kɛ̀ di dootitɔbɛ̀ɛ kɔtɛní kɛ́ tì dɛ̀itɛ bɑ́ di bɑ́ɑ́ cɔ̃ntɛ.

¹⁷Kɛ̀ n di bútínnɛ́ kɛ̀ di dootitɔbɛ̀ɛ di nɑ, di níìmbɛ̀ bo di bɑɑtɛ́ kɛ̀ di ncooti bɑ́ bɛ̀ í di bɛtì.

¹⁸Bɑ́ nɛ̀ mɛmmɛ kɛ̀ di í kèńtɛ́ n kpɛti, nní ndi sɔkɛ́ tiyɛ̃ĩti di yɛi nkpɛ́í,

¹⁹kɛ́pɔntɛ di wɛ̃rímú mùù te kɛ̀ di mɔkɛ tɛfentɛ̀, m bo duɔ́ nkɛ̀ tiwɛtìi kpenkɛ timɑ́tì tɛ̃mɛ̀ bɑ́ fɛtɑɑfɛ̀ bɑ́ nniu, kɛ̀ kɛtenkɛ̀ɛ kpenkɛ kɛ́dontɛnɛ̀ disɔɔwũɔ̃̀.

²⁰Kɛ̀ di sɔ̃́ntɛ́ kɛ́ndeu di wɛ̃rímú dɛtetìrɛ̀ bɑ́ di pɑɑ mbɑ́ mpɛí. Di pɑɑ nkó titebiiti mɛ mbɑ́ mpɛí.

²¹Nɛ̀ mɛmmɛ kɛ̀ di yetɛ, kɛ í dɔ́ kɛ́ n kéntɛ́, nní ndi sɔkɛ́ tiyɛ̃ĩti di yɛi mmɑmɛ̀,

²²kɛ́duɔ́ nkɛ̀ dɛsĩ̀nnɛ̀ɛ yɛ̀nní kɛ́mpĩĩ ndi bí, kɛ́deè di wũɔ̃, dɛsĩ̀nnɛ̀ bo di yɑɑtɛ kɛ̀ di cɛ di do keri ìi kpɑ́nnɛ́.