IKUƆ́ NÌÙBƐ̀ 25:29-42

²⁹Kòò mɛ nfìtɛ́ tɛcĩ́ɛ̃̀tɛ̀ kɛ̀ tɛ̀ bo dihɛì iduotí fitɛ́ dì, dibenni dìmɑ́ɑ̀ kó mukṹṹ mmiɛkɛ nkɛ ò bo nɑmɛ̀ kɛ́wɛ̃tɛ kɛ́ tɛ̀ dontɛ́. Kòò dɔ́ kɛ́wɛ̃tɛ kɛ́ tɛ̀ dontɛ́ dɛ̀ bɑ́ɑ́ pɛ̃ɛ̃tɛ́ dibenni nɛ̀ ò tɛ̀ fìtɛ́mɛ̀.

³⁰Kɛ̀ dɛ̀ pɛ̃ɛ̃tɛ́ dibenni kòò í wɛ̃̀tɛ kɛ tɛ̀ dontɛ́, wèè tɛ̀ dontɛ́ weè yó ntɛ̀ te sɑ̃́ɑ̃̀ nɛ̀ o yɑɑ̀bío. Tɛ yiɛ̀ mbɑ́ɑ́ wɛ̃tɛ kɛ́ tɛ̀ cɔutɛ́ tidɑɑtì fĩ́ĩmmù bo tuɔkɛmɛ̀.

³¹Kɛ̀ sicɛ̃́ĩ sìì bo yɛhɛkɛ̀ iduotí í fitɛ́ yɛ̀ si yó ndònnɛ̀ dɛpɑɑ ndòmmɛ̀ mmɛ, tɛ yiɛ̀ nníí bo nɑ kɛ́wɛ̃tɛ kɛ́ tɛ̀ dontɛ́ yoo wèe wɛ̃tɛ kɛ́ tɛ̀ cɔutɛ́ tidɑɑtì fĩ́ĩmmù bo tuɔkɛmɛ̀.

³²Defiibɛ biɛ yó mmɔkɛmu kucɛ kɛ níí nɑ kɛ́wɛ̃tɛ kɛ́dontɛ́ bɛ tenkɛ̀ yoo bɛ cɛ̃́ĩ sɑ̃́ɑ̃̀.

³³Bɑ́ kɛ̀ Defii botí kou weè dontɛ́nɛ̀ o tebitɛ tɛcĩ́ɛ̃̀tɛ̀, kɛ̀ tidɑɑtì fĩ́ĩmmù benni tùɔ̀kɛ wèe wɛ̃tɛ kɛ́ tɛ̀ duɔ́ ntɛ yiɛ̀, kɛ yɛ̃́ bɛ cɛ̃́ĩ siì tumɛ̀ bɛ kpɛrɛ bɛ̀ mɔ̀kɛ dɛ̀ Isidɑyɛɛribɛ tenkɛ̀ miɛkɛ.

³⁴Bɛ̀ bɑ́ɑ́ fítɛ́ bɛ pénnɛ̀ bɛ kó kɛtenkɛ̀ yó nni nkɛ sɑ̃́ɑ̃̀.

³⁵Kòò mɔù kou tɑ ticĩ̀tì miɛkɛ kɛ tɛ̃́nkɛ í mɔkɛ mùmɑmù, wè nhò tɔ, kòò mɛ ntú opɔ̀ɔ̀ nwe ò nhò tɔ, kɛ̀ dɛ̀ɛ yie nkòò mbo o borɛ̀.

³⁶Ò bɑ́ nwɑnti mucɔ̃́ntimu o ĩ́nkɛ̀, ò bɑ́ nwɑnti kɛ bo ò di. Ò ndé mí ndi Yiɛ̀ nKuyie nkɛ̀ o kou nhò bonɛ̀.

³⁷Kòò mɛ nhò pèntɛ idíítí nyi ò bɑ́ nwɑnti kɛ́cɔ̃ntɛ, kɛ̀ tidiitì mɛ nni nti ò bɑ́ nwɑnti wèe ò tɛ̃̀ńnɛ́ kɛ́nɔ́ɔ́.

³⁸Mí ndi Yiɛ̀ nKuyie mmíì di te kɛ̀ di dènnɛní Esibiti kɛ bo di duɔ́ nKɑnnɑhɑ̃ɑ̃ tenkɛ̀, kɛ̀ di ntú n kɔbɛ.

³⁹Kòò mɔù kou tɑ mɛsémmɛ̀ miɛkɛ kɛ tɛ̃́nkɛ í mɔkɛ mùmɑmù, kɛ fìtɛ́nɛ̀ omɑ́ɑ̀ otɔù kɛ bo mpĩ́ nho tɔ̃mmú, wèè ò dontɛ́ ò bɑ́ɑ́ ò pĩ̀ńnɛ́ mudɑɑtɔ̃mmú.

⁴⁰Wè nhò bonɛ̀ kɛ dònnɛ̀ o kóo tɔ̃ntì yoo wèè kɔ̀tɛní kɛ ò tɑɑ̀nɛ̀. Wè nhò pĩ̀ńnɛ̀ mutɔ̃mmú kɛ̀ tidɑɑtì fĩ́ĩmmù benni yɑ̀ɑ tuɔkɛnní.

⁴¹Kɛ̀ tidɑɑtì fĩ́ĩmmù benni tùɔ̀kɛní, wèe kò nwenwe nɛ̀ o bí o kɔbɛ borɛ̀, kɛ́kɑri o yɛmbɛ̀ tenkɛ̀.

⁴²Di tú n kó bɛtɔ̃mbɛ̀ mbɛ, kɛ̀ n di dènnɛní Esibiti, òmɔù bɑ́ɑ́ fítɛ́ omɑ́ɑ̀ bɛ̀ ɔ̃ɔ̃ fítɛ́mɛ̀ kudɑɑkù.