IKUƆ́ NÌÙBƐ̀ 23:9-35

⁹Kɛ̀ ti Yiɛ̀ nKuyie nyíɛ́ kɛ́bɛ́innɛ̀ Mɔyiisi kɛ dɔ̀:

¹⁰Nɑ́kɛ́ Isidɑyɛɛribɛ kɛ tú n yɛ̃ nkɛ̀ di tɑ dìì mɔ̀nnì dihɛì n di duɔ́ ndì kɛ kùútí, kɛ dɛ̀i tidiketitì, di boú dibou kɛ́duɔ́ nyikuɔ́ nìùtì.

¹¹Kòò dɛ̀ nni mbɛnkɛ, kɛ̀ dɛ̀ɛ yie nkɛ̀ n dì cɔutɛ́. Tɛom̀pùtɛ̀ yiè kó diwentɛ́tɛrì ndi ikuɔ́ nìùtì yóó dɛ̀ nni mbɛnkɛmɛ̀,

¹²kɛ́ n féútɛ́ dipedɑbii dìì mɔ̀kɛ dibenni dimɑ́ɑ̀ kɛ kpɑ kuyɛ̀nkù kɛ́tuɔ,

¹³kɛ́wɑɑ́ mmuyuo ncìdóòbɛ̀ bɛ̀kuɔ̀ kɛ́ mù ɑ̃̀ntɛnɛ̀ mɛkùɔ̀, nkɛ́wɑɑ́ mmɛnɑɑ̀ mbɛ̀ tumɛ̀ difɛ̃́ɛ̃̀ dítìrì dikéè kɛ́cóú ndɛĩ́nkɛ̀ kɛ́tuɔ. N dɔkɛ dɔ́ dìì pɑ̃nnì ndi.

¹⁴Di bɑ́ɑ́ di di pɑɑ nkó tidiitì, di bɑ́ɑ́ ti dɔ̀ɔ̀nɛ̀ pɛ̃́ɛ̃̀, di mɛ mbɑ́ɑ́ tì pũ̀ńnɛ́ kɛ́cɑ́ɑ́kɛ́, yoo dí ntì cɑ̀ɑ́ ntibɛ́ntì kɛ í ketɛ́ kɛ dɛ̀ boú dibou kɛ m pɑ̃. Dɛ kó ikuɔ́ yó mbomu sɑ̃́ɑ̃̀ nɛ̀ di yɑɑ̀bío bɑ́ kɛ̀ di bo kùù píkù.

¹⁵Kɛ̀ di níí m pɑ̃ tidipɑ̀ntì dìì yiè, di bɑ́ɑ́ kɑɑ ndɛ kó diyiè kɛ̀ dɛ̀ɛ wentɛ́ kɛ̀ di ketɛ́ kɛ́kɑɑ nkɛ dɔ̀ semɛ́nnìbɛ̀ bɛ̀yiekɛ̀,

¹⁶Semɛ́nnì oyiénwè wenwe kó tɛom̀pùtɛ̀ yiè, dɛ̀ yóó mbo yɛwe sipísìnùmmù ndi, kɛ̀ di m pɑ̃ tidiitì.

¹⁷Dɛ yiè bɑ́ wè wèè wɑɑ́ ntidipɑ̀ntì kó muyuo nsɑ̀ɑ̀mù cìdóòbɛ̀ bɛ̀tɑ̃ɑ̃ti kɛ́dɔɔ̀nɛ̀ pɛ̃́ɛ̃̀bɛ̀ bɛ̀dɛ́bɛ̀ kɛ́kɔɔrɛnɛ̀ mutie mùù muuti kɛ̀ di tɔní dɛ kó dipɑ̃nnì kɛ́ m bɛnkɛ.

¹⁸Pɛ̃́ɛ̃̀ kó difɔ̃nkúò kɛ̀ dí n féútɛ́ yɛpedɑbɛ yɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀, kɛ kpɑ kuyɛ̀nkù nɛ̀ dinɑɑdɑpɑ̀nnì dìmɑ́ɑ̀ nɛ̀ yɛpedɑkɛ̀ yɛ̀dɛ́ɛ̀ kɛ́ yɛ̀ wɛ̃nnɛ́nɛ̀ tidiitì di m pɑ̃ tì, kɛ́ dɛ̀ còú mmɛnɑɑ̀ mbɛ̀ tu mɛ̀ difɛ̃́ɛ̃̀ kɛ́tuɔ, dipɑ̃nnì ndi dìì kó kufɔ̃ɔ̃ku n nɑɑti.

¹⁹Kɛ̀ di dèè dí wɑɑ́ ndibɔdɑɑ̀ mɛyɛi nhũtímù kpɛ́í nnɛ̀ yɛpedɑbɛ yɛ̀dɛ́ɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ́ n féútɛ́ mɛtɑummɛ̀ kpɛ́í.

²⁰Kɛ̀ ikuɔ́ nìùtìi dɛ̀ nni mbɛnkɛ kɛ́ dɛ̀ nni nféútɛ́ mɛtɑummɛ̀ tou borɛ̀, kɛ́wɛ̃nnɛ́nɛ̀ tidipɑ̀ntì kóo pɛ̃́ɛ̃̀ nɛ̀ yɛpedɑbɛ yɛdɛ́. Dɛ̀ tu n kpɛrɛ ndɛ bɛ̀ m pɑ̃ dɛ̀ ikuɔ́ nìùbɛ̀ yóo nte dɛ̀.

²¹Dɛ kó diyiè kɛ́tíí nkɛ́ n sɑ̃ntɛ, dí bɑ́ɑ́ pĩ́ mmutɔ̃mmú dɛ yiè. Dɛ̀ yó ntú ikuɔ́ nyi di kpɛ́í nsɑ̃́ɑ̃̀ nɛ̀ di yɑɑ̀bío bɑ́ kɛ̀ di bo kɛ̀ɛ̀ bíɛ́kɛ̀.

²²Kɛ̀ di dɛi tidiitì di bɑ́ɑ́ dɛitɛ kɛ́tɑunnɛ̀ tìì bo di pɑɑ mmɑ̀nku, di mɛ mbɑ́ɑ́ kóntɛ́ kɛ́dɛ́rí, dí tì yóu bɛcĩ̀rìbɛ̀ nɛ̀ bɛpɔ̀ɔ̀bɛ̀ kpɛ́í. Mí ndi Yiɛ̀ nKuyie mmíì di te.

²³Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀:

²⁴Nɑ́kɛ́ Isidɑyɛɛribɛ kɛ tú: Dibenni tɑ̃̀nkù yiénwè kó diyiè ketirì níí yó ntú tɛom̀pùtɛ̀ ntɛ, di níí tíí nkɛ́ n sɑ̃ntɛ nɛ̀ tipíɛ́tì nɛ̀ siheú.

²⁵Dɛ yiè di bɑ́ɑ́ pĩ́ mmutɔ̃mmú, dí n féútɛ́ fɛɔ̃̀fɛ̀ kɛ́tuɔ.

²⁶Kɛ̀ ti Yiɛ̀ nKuyie nyíɛ́ kɛ́nɑ́kɛ́ Mɔyiisi kɛ dɔ̀:

²⁷Otɑ̃̀nkù yiénwè yiè píínnì yó ntú mɛyɛi nhũtímù yiè ndi, di níí tíí nkɛ́ n sɑ̃ntɛ, kɛ́boú dinùù kɛ́ n féútɛ́ fɛɔ̃̀fɛ̀ kɛ́tuɔ.

²⁸Di bɑ́ɑ́ pĩ́ mmutɔ̃mmú mɑmù dɛ yiè mɛyɛi ncĩ́ɛ̃́mmɛ̀ kó diyiè ndi, bɛ̀ yóó di dɔɔ̀ dì mɛyɛi ncĩ́ɛ̃́mmɛ̀ kó ikuɔ́ kɛ̀ n di cĩ́ɛ̃́ mmí ndi Yiɛ̀ nKuyie.

²⁹Kɛ̀ wèè í boú dinùù dɛ yiè bɛ̀ɛ ò dènnɛ o kɔbɛ miɛkɛ.

³⁰Kɛ̀ wèè pĩ mmutɔ̃mmú dɛ yiè m bo ò dɛ̀itɛ o kɔbɛ miɛkɛ.

³¹Di bɑ́ɑ́ pĩ́ mmutɔ̃mmú dɛ yiè dɛ̀ yóó ntú ikuɔ́ nyi di kpɛ́í nsɑ̃́ɑ̃̀ bɑ́ kɛ̀ di bo kɛ̀ɛ̀ bíɛ́kɛ̀.

³²Dɛ kó diyiè yó ntú n kpɛri ndi, otɑ̃̀nkù yiè wɛínnì kó kuyuoku nku di yóó boúmɛ̀ dinùù kɛ́ntɔ kɛ́tuɔkɛnɛ̀ diyiè tɛrì kuyuoku.

³³Kɛ̀ ti Yiɛ̀ nKuyie nní nsɔkɛ́ ku nɑ́ɑǹtì kɛ́nɑ́kɛ́ Mɔyiisi kɛ dɔ̀:

³⁴Nɑ́kɛ́ Isidɑyɛɛribɛ kɛ tú n yɛ̃ nhotɑ̃̀nkù yiénwè yiè tɛpíítɛ̀ nɛ̀ dinummurì di níí ɑ̃nnɛ́ titouti kó dibɑnni kɛ́ n sɑ̃ntɛ, kɛ̀ dì mbo kɛ dɔ̀ yɛwe yɛ̀yiekɛ̀.

³⁵Diyiè ketirì yiè di tíí nkɛ́ n sɑ̃ntɛ, dɛ yiè òmɔù bɑ́ɑ́ pĩ́ mmutɔ̃ncɛ̃́ɛ̃́mù.