IKUƆ́ NÌÙBƐ̀ 18:8-26

⁸Di kóò mɔù bɑ́ɑ́ duɔ́nɛ̀ o cicɛ pokù kóò fɛ̀ìkùnnɛ, o cicɛ pokù nwe.

⁹Òmɔù di miɛkɛ bɑ́ɑ́ duɔ́nɛ̀ o tɑ̃ũ̀, kɛ̀ bɛ̀ wɛ̃ mbɛ yɔ̃ yoo bɑ́ kòo yɔ̃ yɑnto kou nwe. Kɛ̀ bɛ̀ ò pɛitɛ́ tɛcĩ́ɛ̃̀tɛ̀ yoo bɛ̀ ò pɛitɛ́ kupíkù mɑkù, ò bɑ́ɑ́ ò duɔ́nɛ̀.

¹⁰Di miɛkɛ òmɔù bɑ́ɑ́ duɔ́nɛ̀ o birɛ kóo sɑpɑ̀ɑ̀ nyoo o kóo dɑpɑ̀ɑ̀ nkou, o mɔ́mmuɔ nho kóo sɑpɑ̀ɑ̀ nwe.

¹¹Òmɔù bɑ́ɑ́ duɔ́nɛ̀ o tɑ̃ũ̀ nɛ̀ wè bɛ̀ wɛ̃ mbɛ cicɛ, o cicɛ birɛ ndɛ, kòò tu o tɑ̃ũ̀, ò bɑ́ɑ́ ò duɔ́nɛ̀.

¹²Di kóò mɔù bɑ́ɑ́ duɔ́nɛ̀ o cicɛ tɑ̃ũ̀, kɛ yɛ̃́ o cicɛ nɛ̀ o tɑ̃ũ̀ bɛ̀ tumɛ̀ mɛyĩ̀ĩ̀ mmɛ̀mɑ́ɑ̀ kɔbɛ mbɛ.

¹³Di miɛkɛ òmɔù bɑ́ɑ́ duɔ́nɛ̀ o yɔ̃ nɑntɛ̀ yoo o yɔ̃ kóo kótì nɛ̀ o yɔ̃ bɛ̀ tu mɛyĩ̀ĩ̀ mmɛ̀mɑ́ɑ̀ kɔbɛ mbɛ.

¹⁴Òmɔù bɑ́ɑ́ duɔ́nɛ̀ o cicɛ nɑntɛ̀ pokù, kɛ yɛ̃́ o cicɛ nɑntɛ̀ pokù nwemɛ̀.

¹⁵Di miɛkɛ òmɔù bɑ́ɑ́ duɔ́nɛ̀ o birɛ pokù, o kóo dɑpɑ̀ɑ̀ mpokù nwe, ò bɑ́ɑ́ ò duɔ́nɛ̀.

¹⁶Di miɛkɛ òmɔù bɑ́ɑ́ duɔ́nɛ̀ o nɑntɛ̀ pokù. O nɑntɛ̀ pokù nwe, ò bɑ́ɑ́ ò duɔ́nɛ̀.

¹⁷Di kóò mɔù bɑ́ɑ́ duɔ́nɛ̀ onitipòkù mɔù kɛ́wɛ̃tɛ kɛ́duɔ́nɛ̀ o kóo sɑpɑ̀ɑ̀ nyoo o kóo dɑpɑ̀ɑ̀ mbirɛ, bɛ̀ tu mɛyĩ̀ĩ̀ mmɛ̀mɑ́ɑ̀ kɔbɛ mbɛ, dɛ̀ tu isɔkɛ nyi.

¹⁸Di miɛkɛ òmɔù bɑ́ɑ́ túótɛ́ o pokù nɑntɛ̀ yoo o kóo kótì, kòo pokù kpɑɑ́ kɛ fòù kɛ̀ bɛ̀ɛ yɑntɛ.

¹⁹Di miɛkɛ òmɔù bɑ́ɑ́ duɔ́nɛ̀ onitipòkù ò yùɔ́ ndìì mɔ̀nnì, ò sĩ̀mmu.

²⁰Òmɔù bɑ́ɑ́ duɔ́nɛ̀ otɔù pokù, kòò ò duɔ́nɛ̀ ò sĩ̀ntɛmu.

²¹Di miɛkɛ òmɔù bɑ́ɑ́ féútɛ́ o birɛ dibɔɔ̀ Mɔdɔki kɛ́tuɔ kɛ́cɑkɛ n yètìrì. Mí ndi Yiɛ̀ nKuyie mmíì di te.

²²Di miɛkɛ òmɔù bɑ́ɑ́ duɔ́nɛ̀ onitidɔ̀ù bɛ̀ dɔunɛ̀ mɛ̀ɛ̀ botí onitipòkù. Dɛ tu isɔkɛ nyi.

²³Di miɛkɛ òmɔù bɑ́ɑ́ duɔ́nɛ̀ fɛɔ̃̀fɛ̀ kɛ́sĩnkùnnɛ omɑ́ɑ̀, onitipòkù mɛ mbɑ́ɑ́ yóu kɛ̀ fɛɔ̃̀fɛ̀ɛ ò duɔ́nɛ̀. Dɛ̀ tu isɔkɛ nyi.

²⁴Di bɑ́ɑ́ sĩnkùnnɛ dimɑ́ɑ̀ nɛ̀ dɛ kó mɛborimɛ botí, yɛbotɛ̀ yɛ̀ɛ̀ bo di ììkɛ̀ n yóó bɛti yɛ̀, yɛ̀ mɛ ndɔ̀ɔ̀ kɛ sĩ̀ntɛ.

²⁵Dihɛì di mɔ́mmɔnni kɛ̀ dì sĩ̀ntɛ kɛ̀ ndì potɛ́, di yɛi nkpɛ́í nkɛ̀ dì tɔ̃́ di nìtìbɛ̀.

²⁶Díndi mpĩ́ ndi nɑ̀kɛ́ tì nɛ̀ n kuɔ́. Dihɛì yɛmbɛ̀ nɛ̀ bɛpɔ̀ɔ̀bɛ̀ bɛ̀ɛ̀ di bonɛ̀ bɛ kóò mɔù bɑ́ɑ́ dɔɔ̀ dɛ kó isɔkɛ.