IKUƆ́ NÌÙBƐ̀ 18:18-30

¹⁸Di miɛkɛ òmɔù bɑ́ɑ́ túótɛ́ o pokù nɑntɛ̀ yoo o kóo kótì, kòo pokù kpɑɑ́ kɛ fòù kɛ̀ bɛ̀ɛ yɑntɛ.

¹⁹Di miɛkɛ òmɔù bɑ́ɑ́ duɔ́nɛ̀ onitipòkù ò yùɔ́ ndìì mɔ̀nnì, ò sĩ̀mmu.

²⁰Òmɔù bɑ́ɑ́ duɔ́nɛ̀ otɔù pokù, kòò ò duɔ́nɛ̀ ò sĩ̀ntɛmu.

²¹Di miɛkɛ òmɔù bɑ́ɑ́ féútɛ́ o birɛ dibɔɔ̀ Mɔdɔki kɛ́tuɔ kɛ́cɑkɛ n yètìrì. Mí ndi Yiɛ̀ nKuyie mmíì di te.

²²Di miɛkɛ òmɔù bɑ́ɑ́ duɔ́nɛ̀ onitidɔ̀ù bɛ̀ dɔunɛ̀ mɛ̀ɛ̀ botí onitipòkù. Dɛ tu isɔkɛ nyi.

²³Di miɛkɛ òmɔù bɑ́ɑ́ duɔ́nɛ̀ fɛɔ̃̀fɛ̀ kɛ́sĩnkùnnɛ omɑ́ɑ̀, onitipòkù mɛ mbɑ́ɑ́ yóu kɛ̀ fɛɔ̃̀fɛ̀ɛ ò duɔ́nɛ̀. Dɛ̀ tu isɔkɛ nyi.

²⁴Di bɑ́ɑ́ sĩnkùnnɛ dimɑ́ɑ̀ nɛ̀ dɛ kó mɛborimɛ botí, yɛbotɛ̀ yɛ̀ɛ̀ bo di ììkɛ̀ n yóó bɛti yɛ̀, yɛ̀ mɛ ndɔ̀ɔ̀ kɛ sĩ̀ntɛ.

²⁵Dihɛì di mɔ́mmɔnni kɛ̀ dì sĩ̀ntɛ kɛ̀ ndì potɛ́, di yɛi nkpɛ́í nkɛ̀ dì tɔ̃́ di nìtìbɛ̀.

²⁶Díndi mpĩ́ ndi nɑ̀kɛ́ tì nɛ̀ n kuɔ́. Dihɛì yɛmbɛ̀ nɛ̀ bɛpɔ̀ɔ̀bɛ̀ bɛ̀ɛ̀ di bonɛ̀ bɛ kóò mɔù bɑ́ɑ́ dɔɔ̀ dɛ kó isɔkɛ.

²⁷Kɛ yɛ̃́ bɛ̀ɛ̀ di niitɛ́nɛ̀ní dɛ kó dihɛì miɛkɛ bɛ̀ i ndɔ̀ɔ̀, kɛ̀ dihɛì sĩ̀ntɛ.

²⁸Kɛ̀ di dɔ̀ɔ̀ dɛ kó isɔkɛ dihɛì múnkɛ yóó di tɔ̃́mu dì tɔ̃́ mɛ̀ɛ̀ botí bɛ̀ɛ̀ di niitɛ́nɛ̀ní.

²⁹Kɛ̀ wèè dɔ̀ɔ̀ dɛ kó isɔkɛ botí, bɛ̀ɛ ò dènnɛ Isidɑyɛɛribɛ miɛkɛ.

³⁰Mpĩ́nnɛ̀ n kuɔ́ kɛ bɑ́ɑ́ dɔɔ̀ dɛ kó isɔkɛ bɛ̀ɛ̀ di niitɛ́nɛ̀ní bɛ̀ do dɔ̀ɔ̀ri ì. Di bɑ́ɑ́ sĩnkùnnɛ dimɑ́ɑ̀. Mí ndi Yiɛ̀ nKuyie mmíì di te.