Ihi 81:3-15

³Qaraaka tora ani ntaainaraqaavata, nora tora itainaraqaavata, aanumaara/noma vuaqa kaimanta ekaa vaiinti nahenti ruvaaqumavi vaiha ovata naate.

⁴Ne Isareri mintimake ruvaaquma vuate tiro, tinavu kaivaqara Iekopira Variqavano vi uvara tiva taira.

⁵Kotiva Isipiqihairo tinavu kaivaqaukavara Iohepira vaintivara ntita varero vuru kai entara viva vi uvara tiva taira. Isipi vatanaaka vo uvaqihai tiamanta tinavu kaivaqaukavara kia kankomake vika uva iriara.

⁶˻Kotiva˼ tiharo, Nora maara nenta kururuqaa aqu vare variara, te vira qaqini vara kaunarave. Te ni kauquqihai maara ntai haikara qaqini vara nimitaunarave.

⁷Ne nora maaraqi vaiha ti haaraa entara, te ni uva iri, ni ruaruama nimitaunarave. Ne ti haaraamanta te kumpora ari tonavuraqi vaiha, ni uva iriha ni kahaqama nimitaunarave. Ne Meribaini vaiha nuntu nauntu ti varia entara te ni okara avatamake tavaunarave.

⁸Ho ne ti vaiinti nahenti iriate. Te niara rauriha variate turo. Mpo, ne ti uva iriqi vuataarave. Ne Isareri ti uva iriqi viqe te hove tiataarave.

⁹Te ni qioqamateha mintima turo: Kia vo vatanaaka una variqanavu quahama nimitaate. Kia vo vatanaaka maraqura/varaha aututera vika nivuqaa kankakaavi vaiha virara tinavu variqave tivakeha quahama nimitaate, turo.

¹⁰Ne kiae iriavo? Te Noravano Kotika ni Variqavano ni Isareri Isipiqihai ntita vare viri kauraukama vauro. Ne nenta no aaqaavute vaiqe te ni kara nimiare.

¹¹Te mintirerave turamanta, ne ti qoririmake kia ti uva irireka auti variara. Ne Isareri ti vevaaraini variataara vaimanta kia mintiara.

¹²Ne kia mintiara kaara te ni Isareri qaqi kauramanta ne hampi aaraqaa vuataa imanta vuara.

¹³Mpo, ne Isareri ti uva koqemake iriha, ti aaraqaa vuatirio,

¹⁴te vaakama tenta kauquqohai ni navutaaka naatarakeha, vika vehi autu taiqa kauraitirio.

¹⁵Oho, te Noravano Kotika vauro. Naantiara ti navutaiqi variaka ti tivuqaa vaivaro vika naatu ite vaira aiqu kauqu ntiri ntiri i vairamanta vaivarave. Te vika ruqutuqi vuarirava kia taiqa viraitiro, ekaa enta qaqi variqiro vuanarove.