Ihi 34:2-21

²Noravano Kotiva ti koqema timitairara irihama, te vira autu tuaheraqi virera. Te minti tivaqi vuari nora maaraqi vaika ti uva iri, vikavata quaheha vaivarave.

³Varaiqenavu vohaaraqi vaiha Noravano Kotiva vo kaiqa vo kaiqa vare vairara iriha, vaiinti nahenti tiva nimiare.

⁴Te vo haika vo haika aatu qeteha vira aarauraro Noravano Kotiva ti uva iriro, ti muntuka qihaaqama timitaira.

⁵Nora maaraqi vaiha Kotirara tinavu kahaqiane ti variaka, vika kia kaurira haika vararaiti, quaheha vaivara.

⁶Te vehiqamavi vaunaraqihai Nora Kotira aarauraro viva ti uva iriro, te vo maara vo maara varaunaraqihairo ti ruaruama timitaira.

⁷Kotira aatu qeteha vira uva koqemake iri variaka variavaro Noravano Kotiva atitai enseliva vika aumanto tuvu vaiharo vikaqaa maimaraara raqikiharo ruaruama nimite vaira.

⁸Quqaae Noravano Kotiva vaiinti nahenti koqema nimite vaivave vaivo? Ne nentavano vira avateha tavaate. Viva vainaini oru variaina vaiintiva koqemakero vaiharo quahaanaro.

⁹Ne Kotira vaiinti nahenti, ne Nora Kotira aatu qeteha vira uva koqemake iriqi vuate. Vira uva koqemake iri varia vaiinti nahentika kia vo haikaravata aavoqivara.

¹⁰Qaraaka raioninavu kempuka vairi vaihavata, vika kia aantau aruke naa entara, narara variara. Vika mintimake variamanta Nora Kotirara noraiqaake iri variaka, vika kia vo haika koqe haikara aavoqivara.

¹¹Ti vaintivaravauvo, ani iri vaiqe te Nora Kotira aatu qeteha vira uva koqemake iri vai okarara ni tiva nimiare.

¹²Ne airi entae maa vataraqaa qaqi variqi viha koqemake vaivarave?

¹³Ni muntukavano mintima vairera, ho nenta noqihai kia qora uva tiraiti, kia una uvavata tiate.

¹⁴Qora kaiqa tauvaqa utu amite, koqe kaiqaqai varaqi vuate. Ne vaiinti nahenti muntuka paruma nimite vai okarara avataqi vuate.

¹⁵Noravano Kotiva nai avuqohairo avuqavuqamake ni varia vaiinti nahentika tavamaqiro viharo, vika ike mpo ti varia uvaravata iri vairave.

¹⁶Viva qora kaiqa vare variaka navutaiqiharo vairo. Vika qutu vimanta vaiinti nahenti vaakama vikara tauru kevarave.

¹⁷Avuqavu ni varia vaiinti nahentika ike mpo tiha Nora Kotira aare varia entara, Noravano Kotiva vika uva iriro, vika vo maara vo maaraqihairo ruaruama nimite vaira.

¹⁸Muntuka qoraiqimanta variaka variavaro Noravano Kotiva vika kahaqireva vika aumanto vaira. Mpo, airi maaravano tinavu qoraiqama timite vaivo ti variaka Noravano Kotiva vika ruaruama nimite vaira.

¹⁹Avuqavu ni varia vaiinti nahentika variavaro vo maara vo maaravano vikaqi qovaraiqi vaimanta variara. Vika mintimake variavarovata, Noravano Kotiva vika kahaqi vaivaro maaravano kia vika anoma kero qoraiqama nimite vaira.

²⁰Noravano Kotiva vikaqaa koqema kero raqikiqiro vi vaivarora tiro, kia vika vuhaari voqavanovata kinta vuanaro.

²¹Qora entavano qovaraiqama viro, qora kaiqa vare variaka arukaanaro. Avuqavu ni varia vaiinti nahentika navutaiqi variaka, Noravano Kotiva vikaqaa nora uvama vataanaro.