Ihi 31:1-18

¹Noravauvo, vokiaka ti qoraiqama timitevorave ti, te are iananaini anunarave. Mpo, are kia ti navutaaka qaqi kairamanta kaurira haika ti timiate. Are avuqavu kaiqa vare variaravara tira, ti ruaruama timitaane.

²Mpo, nena aato ti timira ti uva irira, vaakama ti ruaruama timitaane. Vaiintivano ori onavuqi kukeqaviro vaintemake, te are variananaini oru variarirara are ti kukeqa timitaane. Te ai kempuka vaantaavura avutaqi oru variarirara are ti antua timitaane.

³Quqaama are ti ori onavu koqeva variaro. Quqaama are ti kempuka vaantaavuravanoma variaro. Are mintimake variaravara tira, nena nora autuara iriharama ti tivita varairaqe te koqe aaraqaa vuare.

⁴Hauri te navutaaka vaara vuitaaraqi vuarorave. Vika qoraiqama timitevorave tira, ti antua timitaane.

⁵Te tenta qaqi variqi vuainara ai kauquqima vatauro. Noravauvo, are Variqavano quqaa uvaqai ti variaravara tira, quqaama are ti ruaruama timitenarave, turo.

⁶Noravauvo, una variqanavu autu tuahere variaka, vikara ti muntukavano kia vaimanta te ariqaa muntuvi vaunarave.

⁷Te maara varaunarave, ti qoraiqama timitaarave, are virara iri tavaanarara ti, ai muntukavano tiriara vainara te virara noraiqaake iriqi viha quaheha vairerave.

⁸Tiriara navutaaka vira ravaaqavu kevorave tira, are ti tivita varera vuru nahaikanta kaaramanta te ho vi ani vaunara.

⁹Mpo Noravauvo, nora maaravano tiqi vaimanta vira kaara te iqi rataqi vi vauraro ti tivu noqa vivaro ti kempukavanovata taiqa vimanta vaunarara irihara are ti aaqurihama timitaane.

¹⁰Ti muntukavano qoraiqimanta te iqi rataqi vi vaunara kaara te qaqi variqi vuaina entava iquqama vivo. Tiqi vai maarava ti kempuka taiqa kaivaro ti vaatavano oqita vimanta vauro.

¹¹Ti navutaaka tiriara qumina vaiintive ti variamanta ti kenaukavata ti aiqi nota timite variarave. Ti tontivata ti aatu qetake kia te vaunanaini aniarave. Te aaraini ani vauramanta vika ti tave, ti aatu tuqantaavi kantama vuarave.

¹²Vaiintivano qutu virara tauru kaantemake, vika tiriaravata tauru kaavo. Vataqohai aututaa taveva rukavuvira qaqira kaara, vira voqaarama te vauro.

¹³Oho, te iruramanta ti navutaaka tiriara qetaarire ti, vika evaara evaara uva ti variavo. Vika evaara ruvaaqumavi vaiha ti harukerara nai tiva ami nai tiva ami i variavo.

¹⁴Noravauvo, vika minti ti variamanta, te ariqaa muntuvi vairerave. Are ti Variqavano variaro.

¹⁵Are tiqaa raqiki variaravama variaro. Ti navutaaka ti qoraiqama timitareka auti variakaqihaira ti ruaruama timitaane.

¹⁶Mpo, are ti nena kaiqa vaiinti koqema timitaane. Ai muntukavano tiriara vaivarara tira, are ti ruaruama timitaane.

¹⁷Mpo Noravauvo, te ai aareha ariara ti kahaqiane ti vaunarara tira, hauri are ti navutaaka qaqi kairamanta vika kaurira haika ti timivorave. Are qaqi kairamanta vika nái kaurira haika varaate. Qaqi kairamanta vika qutu vuaka varianaini otu evaara variate.

¹⁸Vika nái nutuqai tuahereha avuqavu ni varia vaiinti nahentika nota nimiteha, vikara tauvaqa vauraa uva ti variavo. Vira kaara are vika no tinta kairamanta kia qaiqaavata vi uvara tiate.