Ihi 18:1-47

¹Noravauvo, ti muntukavano ariara voqama kero vaimanta vauro. Are ti kempukaiqama timitaaravama variaro.

²Nora orivano ti antua timitaintema kero, Noravano Kotiva ti antua timite vaivo. Kempuka vaantaavura voqaarama viva ti ututumate vaimanta te ho vauro. Viva navutaaka kauquqihairo ti ruaruama timite vaivama vaivo. Nora orivano ti antua timitaintema kero, ti Variqavano ti antua timite vaimantara ti, te vira vataake variari ti navutaaka kia ho ti qoraiqama timitevarave. Kainkevano vaiinti antua amitaintema kero, viva tiqaa koqema kero raqiki vaimanta vaunarave. Vira kempukavano navutaaka kauquqihairo ti ruaruama timite vairave. Kempuka vaantaavura avutaqi variaka ho variantemake, te viva inaini vaiha koqemake vauro.

³Te Nora Kotira aarauraro viva navutaaka kauquqihairo ti qaqini vara kaimantara ti, tenavu vira autu voqavata tuahera kaarivama vaivo.

⁴Qutira haikavano naaqunta voqaara ti vunta vaantama kero uqurama taimanta te qutuvi ruhiqauvi vaunara. Huvura namarivano ekaa haika qoraiqama kaintema kero, qora haika, vo haika vo haikavano ti qoraiqama timite vaimanta vaunara.

⁵Kunavano aantau arukareva kahe kahemaqiro vintema kero, qutira haikavano ti ravaaqavu kareva auti vairave. Vaara vuitaara voqaara matipa quvitaava ti ravaaqavu kareva auti vairave.

⁶Te mintimake nora maaraqi vaiha Nora Kotira aare vaunara. Ti Variqavano ti kahaqiarire ti, te vira aare vauraro viva nai naavuqihairo ti uva irira. Te virara tiha, Mpo Noravauvo, ti kahaqiane, turaro viva aato ti timiro ti uva irira.

⁷Viva ti uva irivaro vira voqamakero arara itaivarora tiro, vaturavano utivaro aiqina tuqaqihairo voqama kero qakaa qakaa iharo vaira.

⁸Mintivaro vira aiqianahairo iha muravano oru vivaro noqihairovata ihavano aitarero voqama kero iteharo tatoqaqiro vivaro iha auruvanovata aitarero itaqiro vi vaira.

⁹Viva naaruva qantuakero viraqihairo tuvivaro vira aiqutaraini voqama kero konkira ari tonavuva vaivaro

¹⁰viva kempuka enseliqaa oquviro vaivaro uvai vai arokava vira vita varero ata varero tuvi vaivaro

¹¹viva konkira aruraqohairo nai viri vaata navuma/naavuma taivaro vankora tonavuvano vira ututuma taivaro

¹²viva vainaini voqamakero ataa i vaivaro vira avuni tonavuvano kumporaiqama taivaro taaru/kaampura nti vaivaro aaquakaavata uti vaira.

¹³Mintiaqiro vi vaivaro naaruvavano uva tintema kero, Noravano Kotiva uva timanta vataini variaka iriavaro nai virini kantaaqaini vaiva uva tira.

¹⁴Vaiintivano veva tuta kaintema kero, Kotiva aaquakaa aquqiro viharo navutaaka raumpirima kaimanta vika voqamake qeteha ruqemake vi aniara.

¹⁵Mpo Noravauvo, are nena navutaaka niti vaihara nena aiqianahaira aiho vuaqa kaararo nora uvaivano uti vaira voqaara ai aihovano nora namari raira aqukaivaro, vevanto ataaqi vai vatava qoqaa vaivaro vata tuqavanovata qoqaa vaira.

¹⁶Noravano naaruvaihairo nai kauqu tutukero veva muntukaraqi vai varuvaqihairo ti utu mpaqi vaari qaqini kaira.

¹⁷Ti navutaaka kempuka vaikave, ekaa ti navutaiqi variakave, vika ti haatara kareka auti variavaro Noravano Kotiva vika kauquqihairo ti ruaruama timitaira.

¹⁸Te nora maaraqi vauraro ti kempukavano kia ho vai entara ti navutaaka ti hampata iqoka raqireka anintaavaro Noravano Kotiva ti antua timitero

¹⁹ti tivita varero navutaaka kia ho ti harinaini, nahainaini vuru kaira. Vira muntukavano tiriara vaivarora tiro, viva mintira.

²⁰Te avuqavuqama keha kaiqa vare vaunarara tiro, Noravano Kotiva virara iriharo ti koqema timitero tiqaa koqema kero raqiki vaira. Kia tiqaa uva vaivarora tiro, viva ti koqema timite vaira.

²¹Noravano Kotiva tivatai uvara, te vi uvara iriqi vi vaunara. Kia te tenta Variqa tauvaqa utu amiteha qora kaiqa vare vaunara.

²²Te viva vo uva vo uva tivakero vataira iriqi viha, kia vira uva voqavata raqa kaunara.

²³Kotiva kankoma kero iri tavaivaro kia vovano vo haika kaara tiqaa uva ho vataanaro. Viva kankoma kero iri tavaimanta te qora kaiqa varaarorave ti, te tentaqaa koqemake raqiki vaunara.

²⁴Noravano Kotiva te avuqavu ni vaunarara iriharoma viva tiqaa koqema kero raqiki vairo. Viva kankoma kero iri tavaivaro kia vo uvavanovata tiqaa vairo.

²⁵Noravauvo, ariara noraiqaakero iriqiro vi vai vaiintirara arevata virara noraiqaakera iriqira vinarave. Kia viraqaa uva vai vaiintiva vaivara are kia vi vaiintiraqaa uva vatenarave.

²⁶Nai avu aatoqi kia vaaqu kaiqa varaainarara iriraitiro, takuqi vai okarara iri vai vaiintiva vaivara, are nena takuqi vai okarara vi vaiintira umiqenara. Qora okararaqai nai avu aatoqi iri vai vaiintiva vaivara are vira navutaiqama amitenara.

²⁷Kia nái autu tuahere variaka variavara are vika ruaruama nimite varianara. Nái nutu tuahere variaka variavara are vika nutu vatainiqama kenara.

²⁸Noravauvo, are ti aara ataama timite variaravama variaro. Konkiraiqiva tiqaa vaivara, are vira vara qaqini kera, ataama timite variaro.

²⁹Are ti kempukaiqama timitairaqe te tenta navutaaka hampata homa iqoka raqirarave. Are ti Variqavano ti kahaqiraqe te homa ori vaantaavuraqi vaatinte navutaaka naatara kararave.

³⁰Kotiva vare vai kaiqava vaireva, ekaa vi kaiqava koqe kaiqaqaima vairo. Noravano Kotiva tivatai uvava quqaa uva vaivaro vaiintivano homa vi uvara iriro viraqaa muntuviro varianaro. Tinavu mantaaqa timitaane ti varia vaiinti nahentika, viva kainke voqaara vika antua nimitaanaro.

³¹Noravano Kotiva viva Variqavano vaivaro kia variqa voqavanovata vairo. Vivaqaima nora ori voqaara kempukavano vaiharo tinavu avuta ntuva timite vairo.

³²Kotiva vivaqaima ti kempukaiqama kaimanta te aaraini vi ani vauraro viva te nuaina aarara koqema timite vaimanta ni vaunara.

³³Diaa aantauvano aiqinaini kia kuntavaivai iraitiro, koqema kero nintema kero, viva ti aiqutanta kempukaiqama timitaimanta te onkaiqirainti niha kia kaavu ntiraiti, ni vaunara.

³⁴Viva iqoka raqua okarara ti humiqe vaimanta te baraasiqohai aututaa hurura ho hinta uti vaunara.

³⁵Noravauvo, are ti antua timitera, ti ruaruama timitehara, tiriara viva hiqintuantorave tira, nena kauqu tanaraqohaira ti tuate varianara. Are ti kahaqiaramanta te vaiinti nahenti nivuqaa nora autu vataukama vauro.

³⁶Are koqe aara autu timitaara te vi aararaqaa niha kia kaavu nturo.

³⁷Te tenta navutaaka ntataqi viha vika qoraiqama nimitaunara. Te vika ntataqi viha kia tuqantaa taqantaa iraiti, kempukaiqamake vika ntataqi vivi, oru vika aru taiqa kaunara.

³⁸Te vika aru kauramanta vika ti aiqutaraini hiqintivi kia qaiqaavata himpuara.

³⁹Are ti kempukaiqama timitaaramanta te tenta navutaaka hampata raquqi vivi, vika naatara kaunara.

⁴⁰Are ti navutaaka qetara haika nimiaramanta vika te unanaihai ruqemake kantama vuara. Ti navutaiqi varia vaiintika te vika vehi autu taiqa kaunara.

⁴¹Vika naveraitiha, Mpo, vovano tinavu kahaqiane ti variavaro, kia vovanovata vika kahaqama nimitaira. Vika Nora Kotira aaraavaro viva kia vo tiraitiro, kia vika kahaqama nimitaira.

⁴²Uvaivano vuaqa kai konkomara voqaara te vika rukavu raakavuma kaunara. Vaiintivano aaraqaa vai horara vi ntavake ai ntavake iantemake, te vika qoraiqama nimitaunara.

⁴³Noravauvo, vo vaiintinavu tiriara viva tinavuqaa raqikiantorave ti, ani ti hampata iqoka raqi variakaqaahaira are ti ruaruama timitera, ti noraiqama kaaramanta, te vo vatanaa vo vatanaakaqaa raqiki vaunara. Te kia iri tavauna vatanaaka, vate te vikaqaa raqiki vauramanta

⁴⁴vika ani ti aaqanto kankakaavi vaiha te uva ti vaunara koqemake iri variara.

⁴⁵Vika ti aatu qeteha aiqu kauqu ntiri ntiri i vaiha nái vaantaavura ututuma taa vatukara, vo vatuka vo vatuka qaqirake, ani ti vevaaraini variara.

⁴⁶Ho iriate. Quqaama Noravano Kotiva qaqi variqiro vi vaiva vaivo. Nora orivano vaiinti antua amitaintema kero, viva ti antua timite vaivama vaivo. Ne vira autu tuahera kaate. Ti ruaruama timite vaira, ne vira autu noraiqama kaate.

⁴⁷Viva ti kahaqi vaimanta te navutaaka naatarake vaunara. Viva vo vatanaa vo vatanaaka ti vevaarainiqama kaimanta te vikaqaa raqiki vaunara.