Ihi 135:10-19

¹⁰Ike, Noravano Kotiva airi vatanaaka qoraiqama nimiteharo avuhainaa vaiinti kempuka vataaka vikavata arukaira.

¹¹Viva Amo vatanaaka King Sihonira arukero, Basaani vatanaaka King Okura arukero, ekaa Kenaani vatanaaka avuhainaukavata aru taiqa kaira.

¹²Viva vika aru taiqa kero, vika vata varakero nai vaiinti nahenti Isareri nimira.

¹³Noravauvo, ai autuvano ekaa entama variqiro vuanarove. Maa entara variakavata, naantiara qovaraiqikavata, ekaa vika ai autuara iriha ai autu tuaheraqi vivara.

¹⁴Noravano Kotiva tinavu nai vaiinti nahentiara iriharo tinavu auta ntuva timitero tinavu uva taiqa timitaanaro. Viva tinavu nai kaiqa vaiinti nahentiara mpo ike tiva timitaanaro.

¹⁵Vo vatanaa vo vatanaaka korive silvaave varakeha vo qara vo qaramake maraqura/varaha nái kauquqohai autuke, vi haikarara tinavu variqave ti variara.

¹⁶Vika no vaimantavata, viraqihai kia ho uva tivara. Vika avu vaimantavata, kia ho tavevara.

¹⁷Vika aato vaimantavata, kia ho uva irivara. Ike, vika aihovata kia ho varevarave turo.

¹⁸Oho, una variqa auti variaka variqi vi, naantiara vika nái aututaa haikara vira voqaantemake vaivara. Vaiinti nahenti una variqara noraiqaake iri variaka, vikavata vohaa qaramake vira voqaara vaivara.

¹⁹Ho ne Isareri, Nora Kotira autu tuahera kaate. Eronira anku Nora Kotira kaiqa vara amite variaka, nevata vira autu tuahera kaate.