Iesusɨm Mbɨsevisir Gumasi 8:27-32

²⁷Kamaghɨn amuisima, a maghɨra zui. A utuavɨna arɨghan Itiopianɨ unuaghɨnan gumaghan mavɨa oto. A gumaghan aphan, a Itiopianɨ unuaghɨnan ativasira amighan aŋgɨr ovɨsir garir gumagh. Amighan izɨɨ Kandasi. Gumaghan khav Jerusalemɨn gugha Gotɨni izɨɨ ufhuegha nomthegha zii. A karisɨa apheragha, Gotɨna ambuuŋn gumagh Aisaian mbɨgharan gari.

²⁹Mauthughura Gotɨnɨ Utum Filivɨm mbɨŋgeeghi, “Nɨɨ maŋɨva karisɨn munavɨn aghan ikhɨɨ.”

³⁰Mauthughura Filip akhɨghavtɨgha gua karisɨn aghan gugha Itiopianɨ unuaghɨnan gumagha orasima, a Aisaia, Gotɨna ambuuŋn gumagham mbɨgharan gari. Kamagha amuisima Filip aŋna azaaghi, “Nɨɨ gari bighan khav nɨɨ ana ikeeŋsi o phatɨ?”

³¹Itiopianɨ unuaghɨnan gumagh ana ikara, “Khɨɨ manmaghɨra ikaaŋ ti? Thav nan niaghɨtima, khɨɨ ikeeŋgemi. Nɨɨ zɨvanaŋ nan phorugh raphera.”

³²Itiopianɨ unuaghɨnan gumagh Gotɨm mbɨgharan itir akaar kharsir gari, “A sivsivɨn mɨn mee aŋm mbɨsoghousuava, ana nigha gu. Mee sivsiviirɨ uŋusira arɨsia rɨphɨrousuava amuima anda inɨmɨre iti. Kamaghɨra gumaghan khav, mee aŋm mbɨsoghousuava amuima, a phura inɨmɨre ikha bigha thavɨm mbɨŋge phatɨ. Mee bar aŋn amevagha, inderaghavɨra an osɨmndɨsiva oragha anda rɨkɨrisi phatɨ. Kamagha amuisima, a boorir phatɨ, manmagh aŋn niaghɨ ti? Mee an ikɨrana aghuuŋ gɨvasima, a nomthegha unuaghɨnan iti phatɨ.”