Iesaia 1:16-27

¹⁶Avat a vargi, avat a dalu vagomgom avat; avat a vung vue kavava lavur varpiam kan ra luaina matagu; avat a ngo ma ra papait varpiam,

¹⁷ma avat a vartovo ta ra papait boina; avat a nuk upi ra takodo na varkurai, avat a valangalanga nina di arung bat ia, avat a varkurai maravut ra nat na ling, avat a tata maravut ra ua na vavina.

¹⁸Io, avat a mai, ma dat a vartoto, ra Luluai i biti; ba tumu kavava lavur varpiam dia meme da ra gap, diat a pua boko da ra kabang, ba dia birao da ra mal meme, diat a pua boko da ra ivuna sip.

¹⁹Ona ava mariga, ma ona ava torom, avat a en ra bo na vuai ra gunan boko:

²⁰ma ona ava ol ika, ma ava varpiam, a pakat na vinarubu na en vue avat; tago ra ngie i ra Luluai i tar tatike.

²¹Ea, ra pia na pal nam i ga dovot i tar da ra igoro na vavina! Amana i ga buka ma ra takodo na varkurai! A mangamangana takodo i ga ki tana, ma go a umana tena vardodoko.

²²Kaum silva i tar kubur, kaum polo na vain di tar varpopoto ma ra tava.

²³Kaum umana luluai dia tar tut na varpiam, ma dia varlair varurung ma ra umana tena nilong; diat par tikatikai dia anan upi diat a vatur vake ra vartabar, ma dia nuk upi ra lavur vapuak; pa dia varkurai maravut ra nat na ling, ma ra magit kai ra ua na vavina pa di vaarike pire diat.

²⁴Kari ra Luluai, ra Luluai kai ra lavur kor, ra Tena Niongor kai Israel, i biti dari: Ea, ina valangalanga iau mulai kan diat dia tur bat iau, ma ina obo pa iau mulai ta kaugu lavur ebar;

²⁵ma ina palum u ma ra limagu, ma ina dalu vue ra magit i kaina tam, ma ina tak vue ra lavur kaina magit kan u.

²⁶Ina mal pa mule kaum umana tena.varkurai pi na varogop ma ra vunapaina, ma kaum umana tena varvateten upi diat a da ta ra turpaina; namur da vatang u ba ra takodo na pia na pal, ma ra pia na Dal i dovot.

²⁷Da kul valaun Sion ma ra takodo na varkurai, ma diat dia lilikun pirana ma ra mangamangana takodo.