Idisu 23:8-22

⁸Be na da habodane Gode Ea gagabui hame ilegei dunu ilima gagabusu aligima:ne ilegema:bela:? Na da habodane amo dunu fi wadela:lesima:ne sia:ma:bela:? Bai Gode da amo dunu fi wadela:lesima:ne hame sia:i.

⁹Na da gado heda:le, gele da:iya amogai aligili, amo fi ba:sa. Na da agolo da:iya gadonini ili ba:lala. Ilia da fi amo da hisu esala. Ilia dawa:! Hina Gode da ilima hahawane dogolegelema:ne hou, eno fifi asi gala ilima hahawanedogolegele hou baligisa, amo ilima i dagoi.

¹⁰Isala:ili fi iligaga fi da osobo su agoane, bagohameba:le, ilia dunu idimu da hamedei. Na da bogosea, na da Gode Ea fi dunu afae defele bogomu da defea. Na da bogosea, na da olofole, dunu moloidafa bogomu da defea gala.”

¹¹Amalalu, Ba:ila:ge da Ba:ila:mema amane sia:i, “Di da nama adi hamobela:? Na da di na ha lai dunu ilima gagabui aligima:ne ilegemusa: goeguda: oule misi. Be di da amo mae hamone, ilima hahawane dogolegele hou fawane aligima:ne ilegei dagoi.”

¹²Ba:ila:me da bu adole i, “Na da Hina Gode Ea nama sia:i liligi amo fawane adomusa: dawa:!”

¹³Amalalu, Ba:ila:ge da Ba:ila:mema amane sia:i, “Eno sogebi amoga nama sigi misa. Amogawi, di da Isala:ili dunu ba:lalu, na fidima:ne, ilima gagabusu aligima:ne ilegema.”

¹⁴E da Ba:ila:me amo Soufime sogebi Bisiga Goumi gadodili diala amoga oule asi. Amola amogawi e da oloda fesuale gaguli amola amo afae afae amoga bulamagau gawali amola sibi gawali gobele sali.

¹⁵Ba:ila:me da Ba:ila:gema amane sia:i, “Goeguda: dia gobei iasu gadenene leloma. Amola na da ga (south) asili, Gode gousa:mu.”

¹⁶Hina Gode da Ba:ila:mema misini, ea sia:mu liligi ema olelei. E da amo Ba:ila:gema olelema:ne, bu asunasi.

¹⁷Amaiba:le, Ba:ila:me da buhagili, Ba:ila:ge amola Moua:be ouligisu dunu, ea gobei iasu gadenene lelebe ba:i. Ba:ila:ge da Hina Gode Ea sia:ne iasu amo ema adole ba:i.

¹⁸Amalalu, Ba:ila:me da ea ba:la:lusu amane sia:i, “Ba:ila:ge, Sibo ea mano! Misa! Na sia: nabima!

¹⁹Osobo bagade dunu da ogogosu dawa:. Be Gode da ogogosu hamedafa dawa. Osobo bagade dunu da ilia asigi dawa:su hedolo afadenesa. Be Gode da agoai hame dawa:. Gode da Ea ilegei sia: amo huluane hamosa. E da sia:sea, Ea sia:i liligi da hamoi dagoi ba:sa.

²⁰E da nama hahawane dogolegele sia: fawane sia:ma:ne sia:i. Amo Gode da hahawane dogolegele aligima:ne sia:sea, na da amo sia: bu afadenemu hame dawa:.

²¹Na da agoane ba:sa. Isala:ili fi ilia hobea misunu hou amo ganodini da se nabasu amola bidi hamosu hame ba:mu. Bai Hina Gode, ilia Gode, da ili esala. E da ilia Hina Bagadedafa, ilia da amane wele sisia:sa.

²²Gode da ili Idibidi sogega fisili masa:ne, goeguda: oule misi. E da sigua bulamagau defele, ili fidima:ne gegenana.