Idisu 23:1-12

¹Ba:ila:me da Ba:ila:gema amane sia:i, “Na hou fidima:ne, goeguda: oloda agoane gaguma. Amola bulamagau gawali fesuale amola sibi gawali fesuale agoane, goeguda: gaguli misa!”

²Ba:ila:ge da ea sia:i defele hamoi. Ba:ila:ge amola Ba:ila:me ela da bulamagau gawali amola sibi gawali amo oloda afae afae amoga gobele sali.

³Amalalu, Ba:ila:me da Ba:ila:gema amane sia:i, “Goeguda: dia gobei iasu gadenene leloma. Na da asili, Hina Gode da nama gousa:ma:bela:le, amo na da hogomu. Ea nama sia:mu liligi huluane na da dima olelemu.” Amaiba:le, e da hisu agoloba:le heda:le, agolo da:iya gado lelu,

⁴Gode da ema misi. Ba:ila:me da Godema amane sia:i, “Na da oloda fesuale gaguli, amo afae afae da:iya bulamagau gawali amola sibi gawali amo gobele sali.”

⁵Hina Gode da Ba:ila:mema ea sia:mu liligi olelelalu, Ba:ila:gema bu sia:musa: asunasi.

⁶Amaiba:le, e da buhagili, Ba:ila:ge amola Moua:be ouligisu dunu huluane ea gobei iasu gadenene lelebe ba:i.

⁷Ba:ila:me da ea ba:la:lusu amoga amane sia:i, “Ba:ila:ge, Moua:be hina da na goeguda: oule misi. Na da eso mabe goumi soge, Silia soge amoga misi. ‘Na fidima:ne sia:musa: misa’ e sia:i. ‘Isala:ili fi dunu ilima gagabusu aligima:ne ilegema!’

⁸Be na da habodane Gode Ea gagabui hame ilegei dunu ilima gagabusu aligima:ne ilegema:bela:? Na da habodane amo dunu fi wadela:lesima:ne sia:ma:bela:? Bai Gode da amo dunu fi wadela:lesima:ne hame sia:i.

⁹Na da gado heda:le, gele da:iya amogai aligili, amo fi ba:sa. Na da agolo da:iya gadonini ili ba:lala. Ilia da fi amo da hisu esala. Ilia dawa:! Hina Gode da ilima hahawane dogolegelema:ne hou, eno fifi asi gala ilima hahawanedogolegele hou baligisa, amo ilima i dagoi.

¹⁰Isala:ili fi iligaga fi da osobo su agoane, bagohameba:le, ilia dunu idimu da hamedei. Na da bogosea, na da Gode Ea fi dunu afae defele bogomu da defea. Na da bogosea, na da olofole, dunu moloidafa bogomu da defea gala.”

¹¹Amalalu, Ba:ila:ge da Ba:ila:mema amane sia:i, “Di da nama adi hamobela:? Na da di na ha lai dunu ilima gagabui aligima:ne ilegemusa: goeguda: oule misi. Be di da amo mae hamone, ilima hahawane dogolegele hou fawane aligima:ne ilegei dagoi.”

¹²Ba:ila:me da bu adole i, “Na da Hina Gode Ea nama sia:i liligi amo fawane adomusa: dawa:!”