Iba Gana 58:2-9

²Ani ndoore. Tínaga miniha ko bulene hangu wu to̱latagi ho kamigoni ndobe. Tígua dindi bibahendeha wali agali bu karu homelo bo wahaga biaga kamigoni.

³Mini kowi karume dindini ibagabu kangi ko dege biaabo haga kagoni. Ti ai̱yahanda ti taba hanayangi howa ke̱ dege halu henego áyubi anidagua dege bialu haabo ka.

⁴Tinaga bi larago damene bibahende nogombi taranaga tomia ale ka. Tinaga hale tuluho wahene nogombi ale howa bi larago mbira hale habe nahe ka.

⁵Agali maru manda timbunibi karume nogombi heyalu mali lilonaga iba gana laragola nogombime hale nahagadagua ko biaga uruni ti hale nahaga ka. Agali manda timbunibirume nogombi heyalu mali lilonaga pilipe laragola hale nahagdagua agali uruni ti hale nahagaore ka.

⁶Ngode Datagaliwabe-o agali ko uruni bo wahai habe. Anduane Homogo-o agali uruni ti laiono gabua kebahe agali hayaga ale kago tinaga ne bo gingirulo baga bialu ne bibahende dugu wahai habe.

⁷Iba dindini ibira haragola abale yo bialu ereba hagadagua agali ko uruni ereba hai helabe. Datani gahenge harigani anda harago geme hengedaragola gaulai hagadagua agali ko uruni bo hengedai habe.

⁸Gangade dindiha biralu homaragola ngu biagadaguabi waneigini gali ai̱ya tombeha bedaore homenego taba hanaragola wá nahende arumaha dege biralu homaraligobi agali ko uruni homai helabe.

⁹Agalime ira emene karu dibu waharadagua Ngode Datagaliwabehanda agali ko uruni abale bo wahai holebira. Ti homa nabi kaore Ngode Datagaliwabehanda tihondo keba timbuni halu durumbu hilo waharadagua bulebira.