Iba Gana 37:3-32

³Anduane Homogoni hanaho howa mana bayale bialu halimu. Ani birimiyagua tínaga pabe tigila Anduane Homogo ibuni kagola tí ibuha bayale holeberemi.

⁴Turu holene Anduane Homogohayagi hai bialu halimu. Ani birimiyagua ibugua tínaga gubalinime hameledami aleru ngulebira.

⁵Í̠ni Anduane Homogoha hanaho habe. Ani kegola ibugua í̠ biamogo bulebira.

⁶Í̠na mini tigabiwi howa mana bayale bigi bereruni wali agalime de handai helo horombe hanuni ni dedagola wá haame haralidagua helo wále ibugua ani mo helolebira.

⁷Anduane Homogo ibugua bule ngago bilo í̠ ema nabi hondo habe. Maru ti ho timbu halu ho yanga laragola í̠ mini dege dindi nahabe. Mini kowi karume ko bule lo manda bu heneru bigi birago hondowa í̠ mini dege dindi nahabe.

⁸Mini dege dindi holene ngagolabi keba holene ngagolabi mogo nalabe. Urunime genda dege yu anda ibaga.

⁹Mini kowi karu ti bo batagi halu Anduane Homogoni hanaho karume dindi karulolebira.

¹⁰Emene howa mini kowi karu ereba haiore holebira. Ti kabe hondole hagadagoria hai birimiyaguabi handa walia nahe ereba ho waore holebira.

¹¹Tini mo dindiha howa deme handagabu karume dindi ogoni karulolebira. Mo palia holene ti karula howa mbirale dewa turuho wu holebira.

¹²Mini kowi karume mini tigabiwi karu mo ko holenaga ndi nde lalu handabe manga howa ne gengero lalu ka.

¹³Ani bialu helowa Anduane Homogohanda mini kowi uruni handaya howa oba halu ka. Tinaga homo ereba holene horo hapara harago hondowa ibu oba halu ka.

¹⁴Mini kowi karume yagibanorubi buru pale darabi karubi dibule ayu tibu gililomi bogole danda edaha bira. Mana tigabi biaga karu bo wahole ani bialu ka.

¹⁵Tigua ani bialu karia tininaga ayu tibu yidago yamuwa tini bo wahalu danda edaho ngaru minu podo waholebira.

¹⁶Mini kowi karume dabudabu dewa bu hombedo wu karuni galone nabulene lowa mini tigabiwi karume mbirale emene wu kago baya galoneore wu ka.

¹⁷Ogoni irane Anduane Homogo ibugua mini kowi karunaga hongo mo ereba hai halu mini tigabiwi karu ibunime handaya ho holebira.

¹⁸Anduane Homogo ibugua ibunaga bi larago hale halu biaga karu ibunime handaya ho haabo halu dindi ogoni tinagaore wiaabo helolebira.

¹⁹Mo ko holene wigi bidangi ti tandaga nanolebira. Hina gari birangibi ti nolene karulape wulebira.

²⁰Ani wulebiragoyu mini kowi karu ti homolebira. Anduane Homogonaga waitigi karu balawaya minana anda hene mbira dedaligobi dowa gilope halu ereba haralidagua ti ereba holebira. Ira hagua pu ereba haralidagua ereba holebira.

²¹Mini kowi kagome mbirale dano howa yadai nabi nalu puabo haga. Bayale biaga kagome ibunaga mbirale ngaru habua nabi mo guaila howa tale biaga.

²²Anduane Homogohanda mo turu hene karume dindi karulolebira. Ibugua ha hene karu ti bo batagi holebira.

²³Anduane Homogohanda wali agali hangu hanguhondo hariga ogodagua pobe lalu walia haga. Ibu turu helo hangu biaga kagonaga pabe tigila Anduane Homogo ibuni holebira.

²⁴Uruni ti pilope hayaguabi pilo ibiraho wiaabo naholebira. Anduane Homogo ibunime ti gini mialu lone mo heya ho helolebira.

²⁵I̱ igirini howa hama ibalu ai áyu agali waheore kogoni. Henego manda berogola áyu agima ndogo luore haruda manda bido. O hama ibiwadagoriani howa handalu hewaria wali agali mini tigabiwi hearu mbira Anduane Homogohanda yu wanahayane handaru. Tinaga waneiginibi ti hina noa howa mendeali hina nayago tagamini handadeho heariabi heba nahende dege haru.

²⁶Tigua tinaga mbirale karulape wuwa maru buru pale haga bidaru turu halu talebu migi biaga. Ti waneigini baya bu karu hondowabi ibuni turu ho haga biaga.

²⁷Ko bulene erembira mialu mana bayale bilimu. Ani birimiyagua tínaga aguanenerume dindini luore haabo holebira.

²⁸Anduane Homogo ibu mana bayale bulene gubalini haga kagome wali agali ibuhondo mini bilinahe karu yu wanahaga ka. Tinaga pabe tigila ibuni haabo holebira. Mini kowi karu tinaga aguaneneru bo batagi holebira.

²⁹Mini tigabiwi karume dindi karulalu ogoriani haho wiaabo holebira.

³⁰Mbirali mini tigabiwi kagonaga ne harigaha howa bi latagi hararu mini gigabiwi howa bi laga. Ibunaga hégeme mana tigabi bulene dege bi latagi haga.

³¹Ngode Datagaliwabenaga mana lowinigo ibunaga bu miniha mo hengedagome ibu ge gundu lalu pi nalaga.

³²Mini kowi kagome mini tigabiwi kago ma yu howa bo wahole manda biaga.