Text copied!
CopyCompare
Habo nalolene bi gahenge lo winigo ogo - Iba Gana - Iba Gana 16

Iba Gana 16:1-11

Help us?
Click on verse(s) to share them!
1Ngode Datagaliwabe-o i̱ í̠ha ha doho howa bayale holebero manda buwa í̠ kegoria eberogo í̠na i̱ de hondo habe.
2I̱na Anduane Homogohondo au laro. Í̠ i̱naga Anduane kegoni. Mbirale bayale bayale o bu ngoruni í̠naga gini howa ibini hangu o bu ngoruni laro.
3Anduane Homogonaga wali agali mini bilinahe karu ti wali agali bayaore bu kagoni. I̱ ti heba mandagi howa turu timbuniore ho haga biruli.
4Wali agali maru mbirale gime wabiniru tinaga bi pupu wiagane ogoni lowa uruni hendehende gerai piaga karu tigua genda yulene dewaore bu wulebira. I̱na ti heba mandagi howa bi pupu wiagane urunihondo mbirale bo lomabu miradagua namulebero. Mbirale gime wabini uruni tinaga bi pupu wiagane ogoni lowa uruninaga mini mo yaraga haradaguabi i̱ naholebero.
5I̱ mbirale galone yu haradagua bu kogo Anduane Homogo í̠bi í̠naga bi manabi ogoni dege galone yido lowa yu kogoni. I̱ mbirale buru pado alego í̠na ngiaiore hariligoni. I̱ mani hama polobodagoni í̠na haru holebere lowa í̠ha hanaho kogoni.
6Í̠na i̱hondo mbirale bayale bayaleru turu halu ngigi birigoni. Í̠na o ngigi biriyaruni nde baya taraore ngigi biriyago hondowa i̱ turuore ho kogoni.
7Anduane Homogo ibugua i̱ mo tiga bialu haru haganegonaga i̱na ibunaga mini mo yaraga haro. I̱ mbiraga padoria i̱naga bu miniha howa bi langiaga.
8Anduane Homogo ibuni kawareore i̱ heba o kagonida lo manda buore haabo haruli. Ibuni kaware i̱ heba howa i̱ mo hongo haga kago manda buwa i̱ gi halu mogo nale holebero.
9Anigo i̱ turu howa i̱naga bu miniha dunguore lowa mbirale mbira hondowa gi naholeore kogoni.
10I̱ homolene winigoria howa homanaga hongome yani nahelonaga í̠na i̱ gi miriligoni. I̱na í̠naga biabe bialu mini bilina ho harugonaga í̠na i̱ humbirini andaga homa dinini bu karu baba holiya wahalu yupe naholebere lo manda bido.
11Í̠nime i̱hondo haabo holene hariga ogodagua lalu walia holebere lo manda bido. Í̠ni i̱ heba kegome i̱ miniha turu bialu dunguore laragola turuho haabo haruli.

Read Iba Gana 16Iba Gana 16
Compare Iba Gana 16:1-11Iba Gana 16:1-11