Hwan 7:36-48

³⁶A ta kadwan para a “Anu hud ya ikayat na uhohugan ta apagan tam sangaw, ammi awe tam sangaw maapagan? A had kukun na uhohug na en ta awe tam makaange ta eyan na en?” kunda.

³⁷A ta kapozyanan na araw na pyesta en a sa magkakampat ya ngamin tolay ta simbaanen, a nagtayuk i Hesus kapye na pinasikan ya ipadangag na tekid. “Am itta ya makainum a ange mina teyak petta uminum.

³⁸Te ya mangikatalak teyak a dumatang sangaw tentu ya kuman na nesurat ta Bibliya, te ‘Itta hala sangaw ya kuman na karayan na danum nga magarut ta umag na en nga mangtolay tentu,’” kunna.

³⁹Ammi intu bidan na ya Kahalwa na Namaratu nga iatad na sangaw ta ngamin kiden mangurug tentu. Ammi awena la bit nedob tekid te awena para la madayawan ni Hesus ta langitewan.

⁴⁰A ta nepakadangag na tolay kiden ta uhohug ni Hesus a nebar na kadwan ta “Talaga ta intu hala ya paguhohugan na Namaratu nga binida ni mina Mosesen,” kunda.

⁴¹A ya uhohug na kadwan a “Maski intu hala ya Mangikerutan,” kunda. Ammi awena nangurug na kadwan, te “Taga Galileya hud sangaw ya Mangikerutan tekitam?

⁴²Te ya nesurat ta Bibliya a intu sangaw ya pangpanga ni mina Dabiden, a meanak sangaw ta ili na Betlihem, te yen haman ya lugar ni mina Dabiden,” kunda.

⁴³A nagkakattway mantu ya nonot na tolay kiden gafu tentu,

⁴⁴te ikayat na kadwan ta gafutan da mina, ammi maski kunna ten a awan haman ta nangsi-ged tentu.

⁴⁵A ta pagtoli na polis kiden ta padi kiden ikid na Pariseyu kiden nga nangidob tekid a “Anu hud ta awemuy inalap?” kunda tekid.

⁴⁶“A awemi ginafut, te awan ta takwan na amu mi nga makauhohug ta kuman na nadangag mi en tentu,” kunda.

⁴⁷“Anu kuga naayayyaw kam hapa ta laddud na.

⁴⁸Itta hud ya nangurug tentu ta pinakadakal muy ono Pariseyu?” kunna hapa na Pariseyu kiden tekid.