Hwan 4:39-51

³⁹A ya Samariyano kiden nga taga ili na Sikar a addu kid hapa nga nangurug te Hesus gafu ta bida na babbayen, te, “Nebar na haman teyak ya ngamin kiden iningwak,” kunna tekid.

⁴⁰A ta datang da mantu te Hesus a inagagay da nga magdulot ta babali da kiden, a pa nagyan mantu i Hesus tekid abat ta dwangagaw.

⁴¹A imaddu para ya mangurug tentu gafu ta nepadangag na en tekid.

⁴²A ya uhohug da hapa ta babbayen a “Pake mangurug kamin tentu, ammi bakkan na la ta nebar men ya pangurugan mi am awa uhohug na en tekami nga nadangag na bangbang mi kidin hapa la. A pake amu min ta intu hala ya Mangikerutan ta ngamin tolay,” kunda.

⁴³A ta nepagpasa na dwangagaw a sa nagtatugut ha ig Hesus ikid na ituldu na kiden, te dumatang kid na ta lugar da en ten Galileya.

⁴⁴A ya takday uhohug ni Hesus ta idi a aweda kan dayawan ya paguhohugan na Namaratu ta pake lugar na en.

⁴⁵Ammi tentu a pinagdulot da hala na kalugaran na kiden nga taga Galileya tentu en dimmatang ta lugar na en, te naita da ya ngamin kiden tinarabaku na ta ili na Herusalem, te umange kid hapa ta pyesta en ten.

⁴⁶A sangaw nagdulot ig Hesus ta ili na Kana. Yen hala ya lugar na boda en tentu en nangihuga ta danumen petta nagbalin ta binarayang. A ta datang da ta ili na Kana a itta hapa ya takday opisyal nga nagtakit ya anak na ta ili na Kapernayum.

⁴⁷A tentu en nakadangag ta dumatang na i Hesus nga nagafu ten Hudeya a umange hapa nakikekallak tentu, petta enna mina pagmappyan ya anak na en, te tagtakday na ya angat na.

⁴⁸A ya uhohug ni Hesus tentu “A te awemuy ikayat mangurug teyak am awan ta ipaitak ta pakapangwak tekamuy,” kunna.

⁴⁹Ammi pake persan na para na lalaki en; “Ser, em haen itan ya anak ken petta awena sangaw masi,” kunna te Hesus.

⁵⁰“Dumatang kan mantu ta balim, te matolay hala ya anak men,” kun ni Hesus tentu. Kinurug na ya uhohug ni Hesus tentu, a sangaw nagtugut kumin ta bali na.

⁵¹A tentu en para la ta dalan a nesimmun na hala ya tagabu na kiden nga umange nangdafung tentu, a nebar da hapa ya anak na en; “Matolay hala ya anak men,” kunda tentu.