Hwan 4:26-36

²⁶“Intu hala ya makiuhohugan teko, Aboy, te iyak haman yen,” kun ni Hesus tentu.

²⁷A ta paguhohug na para la ta babbayen a nagtoli hapa ya ituldu na kiden, a nalangga kid hapa tentu gafu ta kabida na ya babbay, ammi aweda pinohutan tentu am anu ya bidan da ikid na ikayat na ta babbayen.

²⁸A sangaw newagak na babbayen ya kalamba na en nga netabnak ta huhunen, te alistu nagtoli ta umag na ili, a nagayayag na ta tolay kiden.

²⁹“E kanan sin, e kanan sin, te emmuy itan ya tolay nga nangibar ta ngamin kiden iningwak. Intu de ya Mangikerutanen nga linavun na popolu kiden aglavun,” kunna.

³⁰A matutunudan kid na mantu imuhet ta ili en nga dumadayum te Hesus.

³¹A ta ang-ange para la na tolay kiden te Hesus a agagayan na ituldu na kiden, petta mangan ta inalap da en ta ili. “E ka sin, Mistro, te mangan kitanan,” kunda.

³²Ammi ya tabbag na en hapa tekid a “Itta in ya kanan ku nga awemuy amu,” kunna.

³³A yen ta nagimpopohut kid na. “Itta hud ya nangitulud ta kanan na?” kunda.

³⁴A gafu ta kumanen a naguhohug ha i Hesus tekid; “Intu hala kanan ku ya pangidulot ku ta ikayat na nangidoben teyak petta ibalin ku ya patarabaku na en teyak.

³⁵Ikamuy ya mangibar ta itta para la ya appat na hulan kapye na idatang na aggagatab. Ammi ya ibar ku tekamuy a maglipay kanan, te maita muy hapa ya takwan na agtalunan, a nalutun hapa ya kuman na dawa da kiden te makigatab na.

³⁶Ya ange maggatab a itta hala sangaw ya tandan na, te kuman na mauknud ya magatab na kiden petta magnayun ya angat da, pettam kumanen a mahahulun magayayat ya nagmula en ikid na naggataben.