Hwan 4:23-27

²³Te ya kakurugan na mangdayaw a dayawan na ya Namaratu ta nonot na hapa la ta kakurugan na pangdayaw, te yen ya apagan na Namaratu ta mangdayaw tentu.

²⁴Te bakkan haman ta tatakday la na lugar ya kettayan na Namaratu ta kuman na tolay, te sigida itta ta ngamin kiden lugar ta kuman na paddad. A mappya mantu ta dayawan muy ta kakurugan ta nonot muy hapa la,” kunna.

²⁵A ya uhohug na babbayen hapa a “Intu la amuk ta ange sangaw ya nebar na Namaratu nga Mangikerutan nga magngagan ta Kristu, a intu sangaw ya mangipakamu ta ngamin tekitam,” kunna.

²⁶“Intu hala ya makiuhohugan teko, Aboy, te iyak haman yen,” kun ni Hesus tentu.

²⁷A ta paguhohug na para la ta babbayen a nagtoli hapa ya ituldu na kiden, a nalangga kid hapa tentu gafu ta kabida na ya babbay, ammi aweda pinohutan tentu am anu ya bidan da ikid na ikayat na ta babbayen.