Hwan 2:5-18

⁵A gafu ta kumanen umange maguhohug i hina na en ta tagabu kiden nga mangiparan ta kanan, “Am itta ya ibar na sangaw tekamuy a kwan muy la,” kunna tekid.

⁶A dana netabnak da ten ya annam na angāng nga magserbi ta Hudyo kiden ta pangbaggaw da ta dulayen tekid. A ya makarga na tagtakday a dwafulu na galon, ammi ta kadwan a tallufulu na galon.

⁷A ya uhohug ni Hesus ta tagabu kiden a “Pannun muy ya angāng kidina ta danum,” kunna, a pinannu da kid abat ta bibig da.

⁸“Aran, takday tekamuy ya magsiruk, te em bit pakakkap ta dafu na boda in,” kunna ha ni Hesus. A ta nepagsiruk na takday a enna nepakakkap.

⁹A ta nepakakakkap na dafu na boda en a binarayang na, te nagbalin ya danumen ta binarayang. Ammi awena amu am had ya nagafun na binarayangen, te intu la nakkamu ya nangiparan kiden. A gafu ta kumanen a inayagan na ya lalaki en magboda, te pahig na ta intu ya nangiuhet ta binarayangen.

¹⁰“Anu haman ta neappiyam ya mappya en binarayang abat ta ayanin? Te gagangay ta meunnan bit mina ya mappya en, a sangaw am nakainum na ya tolay kiden a yen mina ya pangiuhet muy ta matabeng,” kunna.

¹¹A ye-yen ya napolu en pakaitan nga nehuga ni Hesus ta neange na en ta ili na Kana ta lugar na Galileya, petta maita da ya pakapangwa na. A pake nangurug na hapa ya ituldu na kiden tentu.

¹²A ta kabalinan na boda en a nagtatugut ig Hesus kontodu hina na, ikid na wāgi na kiden, ikid na ituldu na kiden, te kumin kid ta ili na Kapernayum, a yen bit la ya nagyanan da ta mangananwan.

¹³A sangaw tanagay na hapa ya Pyesta na Simana na Hudyo kiden ta ili na Herusalem, a umange hapa ig Hesus.

¹⁴A ta datang da ta ili en a simarok hapa i Hesus ta nagingumag na bagaw na simbaanen, a neddatangan na ya addu na maglaku ta baka ikid na kalneru ikid na kalapati, te yen kid ya iatang na tolay kiden ta simbaanen. A itta hapa ya magitali kiden ta pirak nga gitogkokan ta nagitalin da.

¹⁵A nangalap mantu i Hesus ta lubid kapye na pinadday ta pagpaligat na, a yen ya nepangpohet na tekid ngamin ta bagaw na simbaanen kontodu ilaku da kiden. A pinagsikig na para ya lamesa na nagitali kiden ta pirak petta meburud ya pirak da kiden.

¹⁶A ya uhohug na ta naglaku kiden ta kalapati a “Iuhet muy yeyan kid, te awemuy la igitta ya bali ni Damakewan ta kuman na aglakun,” kunna.

¹⁷A gafu ta poray na en ta naglaku kiden a yen ya nakanonotan na ituldu na kiden ta takday uhohug nga dana nesurat ta Bibliya na Hudyo kiden ta pake nabayag na araw, te ya uhohug na suraten a “Pekavut nak sangaw, Afu, na pangahuguk ta balimen,” kunna.

¹⁸Ammi ya uhohug na pinakadakal na Hudyo kiden tentu a “Itta hud ya mabalim nga neatad na Namaratu ta tinarabakum ta isin? Am kumanin ya kwam a itan mi mantu ya pakapangwam petta mepasikkal hala ya mabalim ta isin,” kunda.