Hwan 2:14-24

¹⁴A ta datang da ta ili en a simarok hapa i Hesus ta nagingumag na bagaw na simbaanen, a neddatangan na ya addu na maglaku ta baka ikid na kalneru ikid na kalapati, te yen kid ya iatang na tolay kiden ta simbaanen. A itta hapa ya magitali kiden ta pirak nga gitogkokan ta nagitalin da.

¹⁵A nangalap mantu i Hesus ta lubid kapye na pinadday ta pagpaligat na, a yen ya nepangpohet na tekid ngamin ta bagaw na simbaanen kontodu ilaku da kiden. A pinagsikig na para ya lamesa na nagitali kiden ta pirak petta meburud ya pirak da kiden.

¹⁶A ya uhohug na ta naglaku kiden ta kalapati a “Iuhet muy yeyan kid, te awemuy la igitta ya bali ni Damakewan ta kuman na aglakun,” kunna.

¹⁷A gafu ta poray na en ta naglaku kiden a yen ya nakanonotan na ituldu na kiden ta takday uhohug nga dana nesurat ta Bibliya na Hudyo kiden ta pake nabayag na araw, te ya uhohug na suraten a “Pekavut nak sangaw, Afu, na pangahuguk ta balimen,” kunna.

¹⁸Ammi ya uhohug na pinakadakal na Hudyo kiden tentu a “Itta hud ya mabalim nga neatad na Namaratu ta tinarabakum ta isin? Am kumanin ya kwam a itan mi mantu ya pakapangwam petta mepasikkal hala ya mabalim ta isin,” kunda.

¹⁹A ya tabbag na hapa tekid a “Maski am perdin muy ye-yan na bali na Namaratu a patayukan ku hala sangaw ta las-ud na talluhaw,” kunna.

²⁰“A had kukum hud mapatayuk ta talluhaw, bakawa appatafulu annam na darun ya nepakapatayuk na ta idi?” kunda hapa.

²¹Ammi takwan ya ikayat na uhohugan ni Hesus, te ya bali na Namaratu nga nebar na tekid a bari na en hapa la, te kurug ta pinapasi da,

²²ammi natolay hala ta mekatallu na araw. A yen hapa ya nepakanonot na ituldu na kiden ta isin na uhohug ni Hesus ta umag na simbaanen. A yen ya nangurugan da ta intu hala ya nebida ta Bibliya na Hudyo kiden.

²³A ta ketta para la ni Hesus ta ili na Herusalem ta Pyesta na Simana na Hudyo kiden a nangurug kan ya addu na tolay tentu gafu ta naita da ya pakapangwa na en nga nehuga na ta kadwan kiden tolay.

²⁴Ammi te Hesus, a awena nekatalak ya nangurug tentu, te dana amu na ya nonot da.