Huani 5:28-47

²⁸Eꞌe, eꞌe jojo nei quijje ojjaña yahuajo emanoꞌyo cuana iyaa majje eyaya oya cuana shequi meeje oꞌoya —Jesosa poanaje—. Ecuea esohuijo ¡aꞌa jjashahuabaquijji jama baꞌa: “¿Yajja yajji? ¿Achajja shai ohuaya emanoꞌyo cuana shequi mee caje oꞌoya?” aꞌa jamaya pojji!

²⁹Eꞌe jojo nei oya cuana eshe oꞌoya po mee majje ojjaña ecuea epeejji eyaya baꞌe tiitii meejeꞌyo enijje. Ojjaña shajjamaꞌ cuana ca ca shequi oꞌoya majje quea nee nee poajeꞌyo tii tii cuaquijo.

³⁰Eꞌe, Eyacuiñajjiya eya huoojea canaje ojjaña huasijje huohuiya jama baꞌa: “Joya ecuea epeejji cuana poani eyaya baꞌe tiitii meejeꞌyo enijje. Beca cuana ca ca ecuea epeejji pojjeamajo quea nee nee poajeꞌyo tii tii”. Eyacuiñajjiya e huoojea majje jama acanaje baꞌa: “¡Ojjaña ecuea ejjashahuabaquijji ojjaña cuana huohuiquicue!” acanaje. Eyaya ojaya esohui jayojja jama aña, ecuea ejjashahuabaquiꞌyojjijo pojjeama. Jamajoya eyaya Eyacuiñajjija ejjashahuabaquiꞌyojji jayojja jama añajo ecuea esohui ojjaña eꞌe jojo nei —Jesosa poanaje.

³¹Majoya Jesosaa Jodio cuana huohui canaje jama baꞌa: —Miquianaya ejo jjashahuaba quehuaquiani jama baꞌa: “Jiquio dejjaa jama huohui cani baꞌa: —Eya ca iña iquio Eyacuiñajjija huoojeaꞌyo ojjaña jaahuanajji —acani, de. Jamatii ohuaye neiya jama huohui canijo oya ecuanaja eshajjaꞌajjajji pojjeama” jjashahuaba quehuaquiani miquianaya —Jesosa poanaje—. Jamatii ecuea esohui eꞌe jojo nei.

³²Eya ee nei pojjeama; eya ecue Chii nijje. Ohuaya ojjaña ba mee cani eya oja huoojeaꞌyo. Ecuea eba ojaya esohui ejo eꞌe jojo nei.

³³Yahuajo miquianaaya pea cuana huoojeanaje Huani que e huohuiꞌajjaa. Huaniya miquianaya eꞌe nei huohui canaje jama baꞌa: “Jesosa eꞌe jojo nei Eyacuiñajjija huoojeaꞌyo ojjaña jaahuanajji, oja Bacua Ejja oe nei” acanaje Huaniya, ma ona besameejji poaniya —Jesosa poanaje.

³⁴—Eyacuiñajjiya Huani huoojea canaje ejo huohuiya. Eyaya miquianaya huohui oꞌoyaña ma Huaniya ejo huohui canaje. Jamatii miquianajaya ejjashahuabaquiꞌyojji ejo quea jaꞌa pojjeamajojo eyaya miquianaya huohui oꞌoyaña. Miquianaaya Huanija esohui ejo eshajjaꞌajja jojjemo eyaya miquianajaya mimishi cuijeaꞌyome —Jesosa poanaje.

³⁵—Cuaquijiji mecajje jijianiya quea jaꞌa ojjaña ba mee cani jayojja jama Huani poa. Ohuaya miquianaya quea jaꞌa nee ba mee canaje Eyacuiñajjija esohui ejo, ma yahuajo miquea ba jjima poa. Ebionei miquianajaya oja sohui ejo quea boti nee poanaje; jamatii quijje shajjaꞌajja sa poꞌyo ajja poanaje.

³⁶Eꞌe —Jesosa poanaje—, Huaniya ejo huohui canaje. Jamatii oya dejja. Pea yani, ecue Chii. Ecue Chiiya miquianaya ba mee cani eya oja huoojeaꞌyo. Eꞌe, ecue Chiiya eya ameesahua cani ma dejjaa ajjima acani. Ma ajeyoꞌyo majje miquianaya ba meeje eꞌe jojo nei eya Eyacuiñajjija huoojeaꞌyo ojjaña jaahuanajji.

³⁷Ecue Chiiya miquianaya ba mee cani jama baꞌa: Ohuaya eꞌe jojo nei eya huoojea canaje. Jamatii miquianajaya oya ba jjima ecojjaja. Miquianajaya aje oe oja mimi shajjaꞌajja jjima peaꞌai.

³⁸Ojaya esohui miquianajaya shajjaꞌajja jjima. Eya oja huoojeaꞌyo. Jamajjeya miquianaya ecue sohui shajjaꞌajja sa poꞌyo ajja peaꞌai —Jesosa poanaje—.

³⁹Eyacuiñajjija esohui yahuajo etehueꞌyo miquianaaya ba huichaꞌa huichaꞌaña, ba majamaja majje miquianaya ebaꞌe tiitiije poso jjabaquiani. Ma esohui etehueꞌyo yahuajo ejo tehue ca poa.

⁴⁰Eyaya ca ca oe eyaye nei miya baꞌe tiitii meejeꞌyo; jamatii miquianaya enijje jjapeequi sa po ajja —Jesosaa Jodio cuana acanaje.

⁴¹—Eya dejja mimishi jama jjashahuabaqui ajja jama baꞌa: “Ojjaña dejja cuaa jamatii eya shajjaꞌajja cajeꞌyo” po ajja eya —Jesosa poanaje—.

⁴²Chojja, ecuea eba miquianajaya Eyacuiñajji quea jea nee pojjeama.

⁴³Eyacuiñajjiya, ecue Chiiya eya huoojea canaje. Jamatii miquianaya e shajjaꞌajja sa po ajja. Pea dejjaa Eyacuiñajjija huoojeaꞌyo nishohua huohui cani jama baꞌa: “Eya quea pame nee”. Ojaya esohui ca ca miquianaaya shajjaꞌajjaje; siajjepojji nijje miquianaya jjapeequije.

⁴⁴Eyacuiñajji oe nei enequi tii tii. Jamatii miquianaaya ojaya esohui jayojja jama a sa poꞌyo ajja, jama jjashahuabaquime po ajja baꞌa: “Eyacuiñajjiya ejo jama cahuohui cahua baꞌa: —Eꞌe, miya ecuea epeejji quea pame nee —cahuohui cahua”. Chojja. Jamaya miquianaya jjashahuabaqui ajja —Jesosa poanaje—. Miquianaya jjashahuaba tiitiiquiani jama baꞌa: “Pea dejja cuana ejo jama camimiquiahua baꞌa: —Eꞌe, miya ca ca oe quea pame nee nee —capoahua onaya”. Jamajjeya miquianaya enijje jama po ajja baꞌa: “Jesosa, miya Quito, Eyacuiñajjija huoojea ojjaña jaahuanajji” enijje po ajja. Jamaya huohui sa po ajja miquianaya —Jesosa poanaje.

⁴⁵—¡Aꞌa eya ecue Chii ehuohuije poso pojji jama baꞌa: “Oya cuana e shajjaꞌajja sa poꞌyo ajja; quea mimishi nee nee” aꞌa eya ehuohuije poso pojji nequiana! —Jesosa poanaje—. Chojja, ecuea miquianaya ehuohuijji pojjeama. Miquianaya Moisesija etehueꞌyojo jjashahuabaquiani; jamatii ojaya esohui etehueꞌyo ajjimajo, Eyacuiñajjiya miquianaya jama acaje baꞌa: “¿Apiojji acuae quiana Moisesija etehueꞌyojo shajjamaꞌ poani? Miquianaya quea mimishi nee nee” quijje Eyacuiñajjiya nequiana acajeꞌyo —Jesosa poanaje.

⁴⁶—Eꞌe, Moisesiya ejo tehue ca poa. Jamajjeya miquianaaya oja tehue eꞌe jojo nei eshajjaꞌajja jojjemo enijje jjapeequiꞌyome.

⁴⁷Jamatii miquianaaya Moisesija esohui eshajjaꞌajja jojjemo, ojaya ehuohui etehueꞌyo eba peaꞌai jojjemo ecuea esohui shajjaꞌajjaꞌyome peaꞌai —Jesosa poanaje.