Huan 5:8-19

⁸Nigsugu on ni Hisus kandin to, “Onow kad; sasindog ka, honata nu ka ikam nu no uli kad on.”

⁹Sikan do ian no nabawian on ka dalu to sikan no lukos. Nò, nig-onow, nigsasindog, nighonat din ka ikam din woy nighipanow on. Allow ran to Oghimoloy ian ko nabawian on.

¹⁰Nakakita ka mgo igbuyag to mgo Hudiu to soin no lukos no nabawian on ka dalu rin. Nò, kagi ran kuwo kandin, “Kuntoon ka Allow ta to Oghimoloy. Kono no litos to Balaod ta ko oghonat ki to ikam ta.”

¹¹Nigtabak ka nabawian to, “Pigsugu a to sikan no otow no nigbawi koddi to ogpohipanowan a.”

¹²Nig-inso to sikan no mgo igbuyag to, “Hontow buwa ka sikan no otow no nigsugu koykow to oghonat to ikam nu woy to oghipanow ka?”

¹³Di waro mataga ka sikan no nabawian on ko hontow ka ngaran to nigsugu kandin su niglonus si Hisus su mohon-ing so mgo otow no nalibulung dio.

¹⁴Nò, waro malugoy no pigkita ni Hisus ka sikan no otow dio to Dakol no Ampuanan. Kagi ni Hisus kuwo kandin, “Nò, man, noulian kad on! Kono ka oghutuk ogpakasalo su ko oghutuk ka, ogkoumaan ka buwa to molmohirap pad no masakit nu.”

¹⁵No nighipanow on ka soin no nabawian no nignangonan din on ka mgo igbuyag to mgo Hudiu to, “Si Hisus ian ka nigbawi koddi.”

¹⁶Nò, nigbunsud ka mgo igbuyag to Hudiu no ogmarooton dan si Hisus su waro nigpaagad-agad to Balaod to mgo Hudiu to nigbawian din ka otow no nigdaralu to Allow ran to Oghimoloy.

¹⁷Di nigtabak si Hisus tongod to sikan no pighimu rin to Allow ran to Oghimoloy. Kagi rin, “Ka Amoy ku no Magboboot, konad oghimoloy to kandin no oghimuon. Nò, songo unawa a ian kandin.”

¹⁸Bahin to soini duon bantaan to mgo igbuyag to mgo Hudiu to goinawa ran to ogkamatoy si Hisus su kono ogpaagad-agad to Balaod dan to Allow ran to Oghimoloy. Kono no sikan do ka igbayung dan kandin; duon dod ka pignangon din to Amoy rin ka Magboboot; pigpagsokod sikandin to Magboboot su nig-iling no Amoy rin ka Magboboot.

¹⁹Ka tabak ni Hisus kandan, “Malogot ka soini ogkagion ku kaniu. To sikoddi no Anak to Magboboot, kona a ogpokohimu to agad nokoy. Ka ogkitoon ku rio to Amoy ku ro ka oghimuon ku; songo sikan do ka oghimuon ku.