Huan 5:24-37

²⁴Kagi pa ni Hisus kuwo to mgo ibuyag to Hudiu, “Malogot ka soini ogkagion ku kaniu. Sika otow no ogpamminog to kagi ku woy ogtuu on to Amoy ku no Magboboot no nigsugu koddi to oghondini a to tano, ogkouyag on ka sikan no otow no waro katamanan dio to langit. Kono ogkalogparan ka sikan no otow su nakalipuas to kamatayon din no duon on kouyagan din.”

²⁵Kagi rin to, “Songo malogot ka soi ogkagion ku kaniu. Tibon otow, ogkounawa to namatoy su nakaawoy to Magboboot. No, ogpokouma on, nò, noumaan kid on to allow no ogdinogon to mgo otow no ogkounawa to namatoy sikandan to kagi ku. Woy sikan no otow no ogpamminog to kagi ku, ogkouyag do no waro katamanan.

²⁶Ka Magboboot no Amoy ku ka pigpuunan to kouyagan woy songo pighimu rin ka Anak din no ogpuunan to kouyagan

²⁷Woy nigbogoy ka Magboboot to katondanan koddi no Anak din to ogboot to mgo otow su koddi ka Kakoy to Koot-otawan.”

²⁸“Kono kow ogkabolongbolong to kagi ku,” kagi ni Hisus to mgo otow, “to ogpokouma ka allow no ogdinogon to tibo no namatoy ka ig-umow ku.

²⁹Ko ogdinog sikandan no namatoy no og-onow ka tibo. Sikan no otow no nighimu to maroyow ogkouyag no waro katamanan dio to Magboboot. Di sikan no otow no maroot so batasan din, ogkouyag di ogkalogparan do sikandin.”

³⁰Kagi pa ni Hisus, “Kona a ogboboot to mgo otow to koddi no goinawa. Ogpamminog a ro to kagi to Magboboot ko nokoy ka ignangon din koddi. Woy maroyow ka koddi no igboot su kono no koddi no bobootan ka oghimuon ku. Ka tuud ku ian ka pogboot to sikan nigsugu koddi no Magboboot.

³¹Ko koddi do ka ognangon to malogot ka kagi ku, kono kow ogpakatuu ko sagboka ku ro.

³²Dokad di duon dangob no ogtitigus koddi. Nataga a to malogot ka innangon din bahin koddi.”

³³“Kaniu no mgo igbuyag to mgo Hudiu, nigsugu now ka mgo duma now dio ki Huan no Talagbautismu to og-inso bahin koddi. Nò, pigtitigusan din on no malogot ro ka innangon din bahin koddi.

³⁴Di kona a og-awos to ogtitigus ka mgo otow koddi. Oghingaranan ku si Huan no duma now oyow ogpakatuu kow buwa kandin no ogkapangabangan kow to Magboboot oyow ogkouyag kow no waro katamanan.

³⁵Ogkounawa ka innangon ni Huan no Talagbautismu to sagboka no ilawan no naparokatan on no ogmalayag. Ko pila ro no bulan, narago kow to sikan no igbat-ow to dalan now dio to Magboboot”

³⁶“Di duon nigtitigus koddi no labow pad to innangon ni Huan. Ka igpohimu koddi to Amoy ku, ian ogtitigus koddi to pigsugu a to Amoy ku no Magboboot.

³⁷Agad ka Magboboot no Amoy ku no nigsugu koddi dini, nigtitigus on koddi. Di waro kow nigdinog to lagong din woy waro kow nigkita to Magboboot.