Huan 4:16-38

¹⁶Kagi ni Hisus kandin, “Oghondio ka pa; angoy ka to asawa nu. Libong kow kai.”

¹⁷“Waro asawa ku,” kagi to sikan no boi. “Malogot ian ka sikan no tabak nu to waro asawa nu” kagi ni Hisus.

¹⁸“Nig-asawa nu ka lalimma no lukos no ogtagtagooran ka ro duon to sikan no lukos kuntoon. Malogot ka tabak nu koddi,” kagi ni Hisus.

¹⁹Kagi to sikan no boi, “Buyag, ogpakasabut ad on to duon katagaanan nu no talagnangon ka to kagi to Magboboot.”

²⁰Duon dod ig-alkuy to boi kandin. Kagi rin, “Ka kanami no minuna no matig Samaria, pig-ampuan dan ka Magboboot kai to soin no bubungan. Di sikaniu no mgo Hudiu, ignangon now to og-awos to dio ki ro og-ampu to Hirusalim to sika Dakol no Ampuanan.”

²¹Nigtabak ni Hisus kandin to, “Igi, malogot ka soin no ogkagion ku to duon allow no konad ogkaampuan ka Magboboot kai to soin no bubungan woy ko rio to Hirusalim.

²²Kaniu no matig Samaria, waro kow mataga ko hontow ka og-ampuan now. Kanami no Hudiu, nataga koy atag ko hontow ka og-ampuan noy su ka sikan no otow no ogpangabangan din ka mgo otow, Hudiu sikandin.

²³Di Igi, ogpokouma ka allow, no kai on ian no pinabayo to kabogbogan to Gimukud to Magboboot ka malogot no pog-ampu to mgo otow dio to Amoy no Magboboot. Unawa ian ka mgo otow no ogkoiniatan to Magboboot no Amoy no og-ampu kandin.

²⁴Waro lawa to Magboboot no kono ki ogpakakita kandin no pinabayo to Gimukud din woy malogot no pogsimba ta ka litos do no pogsimba ta kandin.”

²⁵Nigtabak ka sikan no boi to, “Nataga a to ogpokouma ka Im-imanan to mgo Koot-otawan. Ko ogpokouma on, sikandin ka ognangon kanta to agad nokoy.”

²⁶Kagi ni Hisus, “Sikoddi no og-alkuy koykow, sikoddi ian ka sikan no Im-imanan to mgo Koot-otawan.

²⁷Nò, ko og-alukuy pad si Hisus to sikan no boi, nanlibong on ka mgo hibatoon din. Nabolongbolong ko nigkita ran to og-alkuyan din ka boi. Di wa dan mokoinso to boi ko nokoy ka ogkuon din. Agad waro mokoinso ki Hisus to manio to ogkagian din ka boi.

²⁸Nò, nig-ongkoran to boi ka igsakaru rin no nig-uli dio to lunsud. Kagi rin kuwo to mgo otow dio to lunsud,

²⁹“Mgo sulod, duma kow koddi su duon nakitaan ku no lukos no innangon din koddi ka tibo no pighimu kud. Sikandin on buwa ka Im-imanan tanow.”

³⁰Nò, nig-ongkod sikandan to sikan no lunsud no nanhondio ki Hisus.

³¹Ko dio dod to lunsud ka boi, nighinggat poron si Hisus to mgo hibatoon din. Kagi ran, “Buyag, koon ka pa.”

³²Di nigtabak si Hisus kandan to, “Duon pogkoon ku no wa now matagoi.”

³³Nò, nigmoin-insooy ka mgo hibatoon din to, “Duon buwa nig-alap kandin to koonon?”

³⁴Kagi ni Hisus, “Ka koonon ku ka pogpaagad-agad ku to igsugu koddi woy oyow ogkapongaan ku ka tibo no impohimu rin koddi.”

³⁵Nig-inso si Hisus, “Duon buwa tahan no kagi now to ‘Hop-at pad no bulan woy ki oggaani?’ No ogkagian ku sikaniu no ogpitawon now ka mgo kamot now. Nohinug on ka bogas dan no litos on ian to oggaanion ta.

³⁶Ogbayaran ka sikan no mgo otow no oggaani. Ka sikan no mgo otow no nagaani on, ogkootawan no waro katamanan sikandan dio to langit. Nò, ka sikan no nig-orok to kagi to Magboboot woy ka sikan no oggaani, narago on sikandan no darua.

³⁷Malogot ka tahan no kagi to, ‘Og-orok ka sagboka no otow no ian oggaani ka loin no otow.’ ”

³⁸Kagi pad ni Hisus, “Pigsugu ku sikaniu oyow oggaani kow to soin no mgo otow no kono no sikaniu ka talag-orok to kagi to Magboboot dio to goinawa ran no waro now ikabaybayari. Ka duma no mgo otow, sikandan ka nabaybayaran woy sikaniu ka napulusan to kandan no nighimu.” Soini ka kagi ni Hisus kuwo to mgo hibatoon din.