Huan 3:27-34

²⁷Nigtabak si Huan to, “Balagad, su agad hontow, waro katondanan dan ko wa bogayi to Magboboot.

²⁸Kaniu naan, nigdinog kow on to kagi ku ko nignangonan kud sikaniu no kagi ku, ‘Kono no sikoddi ka Im-imanan to mgo Koot-otawan. Di pinohun-a a kandin.’”

²⁹Nigparagas nigkagi si Huan to pananglitan. Kagi rin, “Ko duon lukoson no ogpangasawa, sikan ka tagtuun to boi. Ka sikan no amigu to lukos no ogtagad kandan ogkarago ko ogdinog on to lagong to sikan no ogpangasawa. Sikan ian ogkohogot ka igkarago ku.” kagi ni Huan.

³⁰“Awoson no ogdakol ka kandin no bantug woy ogdoisok do ka koddi.” kagi ni Huan.

³¹Duon dod kagi ni Huan. Kagi rin, “Sikandin no ogpuun dio to langit, labow sikandin to tibo. Di atag sikandin no ogligkat to soin no kalibutan, soin no kalibutan ka ugpaan din woy tongod to soin no kalibutan sikan ian ka ogkagion din. Di sikandin no nigligkat dio to langit, kandin ka niglabow to tibo.

³²Ignangon din ian ka nigkita rin woy ka nigdinog din. Di manalingboka ro ka ogtuu to kagi rin.

³³Di atag, sikan no mgo otow no ogtuu on to innangon din, sikan ian ka mgo otow no ogmalogoton dan ka kagi to Magboboot.

³⁴Sikandin so pigsugu to Magboboot no si Hisu Kristu, ko nokoy ka kagi to Magboboot sikan dod ka ignangon din kanta su waro katamanan no imbogoy kandin to Gimukud to Magboboot.