Huan 21:5-23

⁵Ko marani on to pantad ka balutu ran ran, nig-umow si Hisus kandan. Nig-inso din ko duon ngalap dan no noutol dan. Nigtabakan dan to, “Waro; agad sagboka, waro.”

⁶Kagi rin kuwo kandan, “Dio now sisigay to kawanan to balutu now su duon ngalap dio.” Nò, nigtoon dan on ka sigay ran no mohon-ing ka nigsagad no ngalap to sigay ran no kono dan ogkagoon to oghusud.

⁷No, ka hibatoon no nigdakoli ni Hisus to goinawa rin, nigkagian din si Pedro no kagi rin, “Ka Lagboy no Igbuyag ta ian.” To pogdinog ni Pedro to Lagboy no Igbuyag naan sikan, piglogdak din ka akob to kinabo din su niglobas man sikandin. Nò, nigtinugpu on dio to woig.

⁸Di ka duma no hibatoon no nagalat to balutu, nighusud dan to sigay no naponu to ngalap su marani on to pantad; kawaluan no dopa ro duon.

⁹Ko niglogsad sikandan, nigkita ran ka paan woy duon pigtomogan no hapuy no duon ogtuugon no ngalap.

¹⁰Nigkagi ni Hisus kandan to, “Alapa now ka duma no noutol now no ngalap.”

¹¹Nokoy naan, nighondio to balutu si Simon Pedro no nighokad din ka sigay no naponu to mgo dakol no ngalap. Duon songo gatus to ngalap woy kalimmaan woy tatolu. Di agad ko mohon-ing ka nigsagad, waro magisi ka sigay.

¹²Kagi ni Hisus kandan, “Dii kow on, oglom-ag kinow.” Di waro agad sagboka no hibatoon din no niglangob nig-inso to “Hontow ka?” Nataga ian to sikandin ka Lagboy no Igbuyag dan no si Hisus.

¹³Nigmarani si Hisus kandan no pigpurut din ka paan woy impanbogoy kandan. Songo impanbogoy rin ka sikan no ngalap.

¹⁴Sikan ka igkatatolu no pogpakita ni Hisus to mgo hibatoon din to nootawan on.

¹⁵To nakaponga nigkoon, nigkagian ni Hisus si Pedro. Nig-inso din to, “Koykow Simon, anak ni Huan, labow ka goinawa nu koddi to goinawa koddi to soini no mgo duma nu?” Nigtabak si Pedro to, “Hoo, Buyag; nataga ka to duon goinawa ku koykow.” Kagi ni Hisus kandin, “Bantayi nu ka mgo anak to karniru ku,”

¹⁶Nighutuk nig-inso si Hisus kandin to, “Simon, anak ni Huan, duon goinawa nu koddi?” Kagi ni Simon, “Hoo man naan, Buyag. Nataga ka to duon goinawa ku koykow.” Kagi ni Hisus, “Bantayi nu ka koddi no mgo karniru.”

¹⁷Nighutuk man do nig-inso si Hisus ki Pedro to, “Simon, anak ni Huan, dakol ka goinawa nu koddi?” Masakit on so goinawa ni Pedro to soini so igkatatolu no inso ko duon goinawa rin kandin. No, nigtabak to, “Buyag, nataga ka to tibo. Nataga ka man to dakol ian ka goinawa ku koykow.” Kagi ni Hisus kuwo kandin, “Bantayi nu ka mgo karniru ku.”

¹⁸“Malogot ka soin no ogkagion ku koykow. Ko balubato ka pad, nigpanagana kad no nighipanow kad on no sikoykow ka nigboot ko hondoi ka ogdolog. Di Usi, ko ubanon kad on, ogparoropoon kad no ogbanggutan ka to songo otow no og-alapon ka dio to kono nu ogkoiniatan porom.”

¹⁹Sikan ka innangon ni Hisus oyow ogkataga porom to ogbayaan ni Pedro to igkamatoy rin no oyow ogsayoon din ka Magboboot. No, kagi ni Hisus ki Pedro to, “Unug ka koddi, Usi.”

²⁰Nigbalikid si Pedro no nigkita rin ka sikan no dangob no hibatoon no ogluyud no marani to poka ran. Sikandin ian no dakol so goinawa ni Hisus no nig-inso kud ki Hisus to sikan no poglabung dan ko hontow ka ogtabod kandin.

²¹Ko nigkita ni Pedro sikandin, nig-inso din ki Hisus to, “Buyag, nokoy naan on ka ogkoumaan to kandin uromo?”

²²Nigtabak si Hisus kandin to, “Agad ko ogkoiniatan ku to ogkootawan sikandin taman to poglibong ku, nokoy naan so labot nu kandin? Sikoykow, unug ka ro koddi.”

²³Ko narinog on ka sikan no tabak ni Hisus, nahan to mgo nigtuu no kono ogkamatoy ka sikan no hibatoon. Di loin ka lituk to kagi ni Hisus. Kagi rin atag, “Ko sikan ka goinawa ku to kono ogkamatoy sikandin taman to iglibong ku kai to soin no kalibutan, waro man labot nu, Pedro.” Waro din nignangon to kono ogkamatoy sikandin.