Text copied!
CopyCompare
Makromod lalap lirna wawan - Honowok Nair - Honowok Nair 2

Honowok Nair 2:11-31

Help us?
Click on verse(s) to share them!
11Maika heruwali ri Yahudi la heruwali ri ma ka namwali Yahudi man lernohiyedi Yahudi rira agame me'e, la ik heruwali ma nano noho Kreta noro Arab haenhi. Ik derne ri man wakunu onnenihe dohdoho rodi iknika wanakunu ra'aheni, ‘Makromod Lalap hi'iyedi ha man ik kak dedernale la kak dodo'onnale makun.’ ”
12Hi na'akeme hehel rehi la mehe kakaiyedi, la ida ma na'ukani ida, “Ha ma namwali eniyenihe nina panaeku inhawe?”
13Maa ri aile haenhi mahar hadwei hi ra'ahenia, “Ah, ri eniyenihe nadoo romun arak, de manha mouwedi me'e menee!”
14Petrus noro Yesus Nin hophopon idaweli ida ramririri wewerre, la an wakunu naruri laa heri onnenihe na'ahenia, “I walin Yahudi roro walin namehin man minle Yerusalem na'ahoru! Makaniyala wawa'an, ya a'amou a'aropo ha man mim dodo'on eniyeni.
15Ri enihe ka romon arak, de kar manha naise mim pae'eku eni! Idedi nanumene riuk wohii al'alam menee!
16Ka! Ha ma namwali eniyeni, Makromod Lalap konohiyedi lolo Nin nabi Yoel na'ahenia,
17‘Rakan ku lili'ur Ya ala Ainu'u Roh ri mormori na'akeme leke: Mi anum mo'oni maeke lo'o konohi mi inhawa namwali lere man mai, la minim mo'oni ma na'ikaka makun meher do'on haida-haida, la minim ri leleher ramarmi.
18Ler onne, Ya ala Roh Kudus ki Ainu'u hophopon wahwahan--mo'oni maeke, leke hir konohi ri namehin inhawa Ya'u pae'eku eni.
19Ya'u hi'i tanada ri ka nadedem do'on lolo a'am eni, noro tanada ri ka nadedem do'on lolo noho wawan haenhi, rara noro aiye, la ai mahu namansa haenhi.
20Lere onne lere maki, la wollo namwali mere naisa rare. Eniyeni namwali nolu mene Ainu'u Ler Alam Lalapa man ma'aruru wake'e mai.
21Enla inhoi napanak Maya'u pakue, ai onne lernala Ainu'u or'ori dardari ma kan horu.’
22I wal'uhe ri Israel na'ahohoruwedi! Makaniyala wawa'an ainu'u panaeku eniyeni: Yesus, manin Nazaret onne, ik Makromod Lalap hopon mai min noro maika. Ik kauroin panaeku onne, ono Makromod Lalap nala molollo Ai leke An hi'iyedi ha man lewlewen noro tanada nammori man ik kak dodo'onnala makun. Ha onne na'akeme An hi'iyedi lolo mi herne kalarne, de i wal'uhe do'on la mauroinedi me'e.
23Yesus onne, Makromod Lalap nala ki mi, maa mi mesnedie, mala kani ri man ailanna leke waire lolo au kekiyowok. Panaeku onne na'akeme Makromod Lalap nakakaredi nano nonolu me'e.
24Enimaa Makromod Lalap huri Yesus nano makmaki nin apinpinha wo'operperi, ono makimaki ka naruri nodi molollo Yesus mamani.
25Nonolu eni ik upud a'ad Daud konohiyedi ha ma namwali noro Yesus heheni, ‘I do'on Makromod Lalap lolo Ya'u kalarna mamani, Ai norle'ule'u norwaliwali Ya'u de, haida ka na'o'o nadewe Ya'u.
26Enpenia Ya akin nahuwa'an, Ya a'uli asa'e mamani, la ka amkauk inhawa namwali I kem'u ono Ya akin naili'il O.
27O kam huri we'er Ya'u minle makimaki onno mamani, la kam hoikaru Num Man Moumou Dewdewe kemen popo.
28Papa kukuwedi kalla or'ori dardari Ya'u me'e, la morle'ule'u morwalwali Ya'u penia Ya akin nahuwa'an wake'e.’
29Konohiyala I wal'u na'ahoru, nano Daud lirna nonolu onne, ik kauroin mouropo ai kan wakunu ha ma namwali ai kemen mehe, ono Daud onne makiyedi me'e, la nina lunne aile noho eni makun.
30Daud namwali nabi, de ai nauroin nahenia Makromod Lalap kikan hopo na'akerhe Nin nou ma na'ahenia nano ai upun anan Ri ida kikan namwali Rai naise Daud haenhi.
31Enpenia Daud nauroinedi ha ma namwali lere li'ur penia na'aheni, ‘Kristus onne, Makromod Lalap kikan namwali Rai laa ewi-ewi, la An maki, maa mori wali'ur.’ Daud na'ahenia An maki laedi lunne raram, maa Makromod Lalap kan hoikaru Ai minle makimaki onno, la Ai kemen kan popo lunne raram.

Read Honowok Nair 2Honowok Nair 2
Compare Honowok Nair 2:11-31Honowok Nair 2:11-31