Homanos 15:7-23

⁷Iwatsahi tyharapehapokzitsikinahaktsa kytsa! Hawa Kiristu ahahumo tsimypokzitsiarẽta ikiahatsa atsatu harape bo tsimykaranahaktsa! Kyze kytsa tihi: — O Deus tsimysapyrẽta ihyrytsa bo iktsa tsimaha. Hawa ihumo zuba myharape pokzitsikinaha, iwatahi Deus tsimysapyrẽta hỹ — mykaranaha.

⁸Kiristu mybarawy bo inasik. Sudeutsa Deus bo mysioktyhyrykta anahumo hi inasik. Izumuze nisihyrinymyryky hawa ha ty Deus botu nitsasoko nisihyrinymyryky atsatu mykara. Taparaktsa mydiritsa hawa ha ty Deus sibo botu nitsasoko atsatu Sesus nikara, izumuze Sudeutsa Deus bo mysioktyhyryk.

⁹Mybarawy bo inasikze Sudeutsa mysioktyhyrykta Deus bo my, Sudeutsabyitsa kino niwatihi Deus bo mysioktyhyryk. Asa hi: — O Deus ikia tsamysapyrẽta myhumo kino niwatihi tsamypokzitsiarẽta, Sudeutsabyitsa tsimaha — mykaranaha. Tapara Deus harere papeu humo ziwatahaka: — Iwatahi utakta Sudeutsabyitsa situkze Deus pe “Ikia zuba wasani tsimy. Ikia zuba amysapyrẽnikita my” Sudeutsabyitsa ana hi piwabykynaha, abo iksakibazikikze ana hi piwabykynaha — niy.

¹⁰Usa papeu humo: — O Sudeutsabyitsa ikiahatsa Deus watawyhytsa Sudeutsa tuk ahakurẽtsaktsa! — niy.

¹¹Usa papeu humo: — O Sudeutsabyitsa sizubarẽtsa Deus bo tsimysakibazikiknahaktsa! Mybarawy ezektsa nanabyitaba sizubarẽtsa kino niwatihiktsa! “O ikia zuba wasania ty zuba tsimykara.” tsimahaktsa — niy.

¹²Deus sohokotsa Isaijas usa papeu humo ziwatahaka: — Taparakta mydiri Sese estuba tsekoka Sudeutsabyitsa pehakatsa mozik. Deus bo mysioktyhyryk, isapyrẽnikia humo piperykynaha hỹ — niy. Sese tsekoka Kiristu my.

¹³Iwatahi Deus ahatsyhyryze ipe my: — O Deus myzo ikia hi isapyrẽnikia ty taperyky atuk mywahi mynapykyryknaha ana kino taperyky. Ikia tysiakuwyky hỹ batu paikpa mytsaty zikaha. Aharere bo hyỹ mykaranaha iwatsahi ahumo sispirikporẽtsa moziknaha ahyrikoso humo mospirikpotohinaha, azikwy humo sispirikporẽtsa hỹ — my. Iwa Deus bo mopamykyso.

¹⁴O katukytsa utakta ahasoho humo inymyryba ahamysapyrẽtsa hỹ. Ahahyrizikporẽtsa ana humo hi kahyrinymyrẽta. Tyhapehyrinymyrykynaha.

¹⁵Iwatatuze papeu humo ahabo piwatahaka wasania ty piwatahakazo batu kasikpyby ana humo ahaspiriktsokdabyihu ja. Deus harere motsasoziuku iwaze anasoho bo hi mytsaty tsimykaranaha. Iwa my Sesus Kiristu humo atahi kahyritsokzawy humo zikpeha.

¹⁶Utakta Sesus Kiristu tsumuẽhĩtsa, ana bo hi zikwatawy. Uta Sudeutsabyitsa bo zikwatawy. Deus harere wasania ty sibo motsasoko ana humo hi zikwatawy. Utakta Deus wahoro zubata eze ziknapamykysokota wata asa humo ka Deus tsakurẽta. Hawa Deus nizihikik ziknakaranaha ana humo hi Deus tsakurẽta. Iwatatu Deus wasania ty Sudeutsabyitsa bo motsasoko, kyze Sudeutsabyitsa Sesus harere bo hyỹ mykaranahaze Deus ana humo hi tsakurẽta hỹ. Asaktsa meky watu moziknaha, Deus hyrikoso humo simysapyrẽtsa moziknaha, Deus tyryktsa moziknaha.

¹⁷Deus tsyhyryze tarabajaziu mynakara, hawa Kiristu mozihikik naha humo zuba mynakara iwatahi kahyritsokzawy humo kakurẽta.

¹⁸Kiristu kahumo Sudeutsabyitsa Deus harere bo hyỹ mykaranaha izikwy kahumo hi katuk mynapykyryk. Iwatsahi Sudeutsabyitsa Deus harere bo hyỹ mykaranaha. Batu kasikpyby. Hawa iktsasoko naha humo batu kasikpyby. Hawa ikykara ana humo hi batu kasikpyby iwatahi Sudeutsabyitsa Deus harere bo hyỹ mynakaranaha. Hawa skaraba Kiristu mozihikik ana humo hi yhỹ mynakara iwaze Sudeutsabyitsa Sesus harere bo hyỹ mynakaranaha hỹ.

¹⁹Deus zikwy katuk mynapykyryk, ihyrikoso humo amy ty kytsa batu zikaha utakta ikykara. Deus hyrikoso katuk mynapykyryk iwatahi kytsa iksizororowy. Iwatsahi kytsa kabo iktsaziu nikaranaha iksi humo kyokbaik. Iwatawytsa humo Deus wasania ty bo yhỹ mykaranaha. Nanabyitaba Deus wasania ty Sesus soho iktsasoko, taparaka Serusarẽhe eze iktsasoko, iwaze ikparakzo nokponi ikukuru. Iriria bo ikzumu.

²⁰Utakta Deus wasania ty motsaso tsihikik asa hi Sesus soho batu siwabyhy. Asaktsa isoho batu siwabyhy ihumo sispirikpobyitsa sibo hi Deus wasania ty iktsasoko.

²¹Hawa Deus harere papeu humo botu ziwatahaka anawa ha ikykara papeu humo: — Asaktsa Deus zipehata soho batu siwabyhy isoho piwabykynaha. Deus wasania ty isoho piwabyziukunaha — niy.

²²Kyze utakta ahabo mynakozore tsihikik batu zik. Deus wasania ty siwabyhybyitsa bo motsasoko iwatahi ahabo batu pão.

²³Abaka hyriziktsokzawy nabytykara eziky nepykbaik. Iwa niytyk tseheze tsizubarẽna ahabo mynakozore tsihikik.