Hisabu 23:5-19

⁵Mkulu Nguluwi nakamha Balaamu ulonzi woyalinguganigwa kulonga na kumlonjela yahiluche kwa Balaki.

⁶Balaamu nakahiluka na nakamfika yemile bahala habehi na nhambiko ya heye ya kulakazwa, hamwe na vilongozi weng'ha wa Moabu.

⁷Balaamu nakamha Balaki ulonzi wa heye, nakalonga, “Balaki nakengala hano kulawa Alamu, ena, mndewa wa Moabu nakengala kulawa vidunda vya kolilawilaga isanya. ‘Uye uwapanjile wanhu wa Yakobo kwa chiwalo cha heni, ena, uye uwalonje vibi Waisilaeli!’

⁸Ila ndompanjila ndaze munhu yawele Mkulu Nguluwi hambe yampanjile? Ndowalonga ndaze vibi wanhu wawele Mkulu Nguluwi hambe yawalonje vibi?

⁹Kulawa kuli vinhembenhembe vya mitalawe nandiwona, kulawa mchanya mwa vidunda ndanguwasunjilila. Awo wanhu walingikala waliyeka, hawalingilola kota wanhu wa isi zinji.

¹⁰Yalihi yoweza kuwawaza wanhu wa Yakobo kwa ndaze navyowawele wenji lukami, ama yoweza kuwaza honhu ha kane ha Waisilaeli? Hondibagama ndiwe kota munhu yatanganiche, kota Waisilaeli.”

¹¹Aho Balaki nakamlonjela Balaamu, “Nakunditila choni? Ndikugala hano leka uwapanjile wang'honyo wa heni, ila hegwe kwanguwatambichiza!”

¹²Balaamu nakamlonjela Balaki, “Ndanguganigwa kulonga ulonzi wa Mkulu Nguluwi hela.”

¹³Hamba Balaki nakamlonjela Balaamu, “Tulute honhu hanji hawele koweza kuwona, ila kowona wamwenga wa hewo hela, howeza kuwona weng'ha. Hamba, aho kowapanjila kwa chiwalo cha heni.”

¹⁴Ahyo Balaki nakamhola Balaamu kuli mgunda wa Sofimu, mchanya mwa chinhembenhembe cha chidunda cha Pisiga. Aho nakazenga honhu saba ha kulavila nhambiko na kulavya nhambiko mchanya mwake, nhambiko ya ibuguma limwe na ing'holo ilume limwe.

¹⁵Balaamu nakamlonjela Balaki, “Upone hano behi na nhambiko ya hegwe ya kulakazwa, nani ndute kula kumwambu kiting'hana na Mkulu Nguluwi.”

¹⁶Mkulu Nguluwi nakating'hana na Balaamu, nakamha ulonzi woyolonga, na kumlonjela yahiluche kwa Balaki.

¹⁷Lelo Balaamu nakahiluka, nakamfika Balaki yemile habehi na nhambiko ya heye ya kulakazwa hamwe na vilongozi weng'ha wa Moabu. Balaki nakamuuza, “Mkulu Nguluwi nakakulonjela choni?”

¹⁸Aho, Balaamu nakamlavila Balaki ulonzi wa heye. “Wime Balaki, uhuliche, unyhulichize gwa mwana wa Sipoli.

¹⁹Nguluwi hawele munhu, yalonje udesi, ne munhu yagaluse kijesa kwa heye! Ndaze, kolagana na wanhu chinhu na yaleche kudita, ama yalonje chinhu na yaleche kweneza?