Hisabu 21:4-29

⁴Waisilaeli nawaluka majendo kulawa chidunda cha Holi, nawakola nzila ilingulutila Bahali ya Shamu leka waizungulute isi ya Edomu. Ila lowawele mnzila, wanhu nawagozola.

⁵Lelo nawaluka kuwang'ung'utila Nguluwi na Musa, wolonga, “Lekachoni namtulavya kula Misili leka tubagame aku kuchiwala? Aku kwa haduhu mazi ne chilyo, natwe natutoka kwa mana ayi chakachaka.”

⁶Aho Mkulu Nguluwi nakegala mizoka jiwele na dunga hali wanhu, najiwaluma wanhu wenji mbaka Waisilaeli wenji kahi nawabagama.

⁷Lelo wanhu nawamlutila Musa, nawamlonjela, “Natudita gehile kwa kuwang'ung'utila hegwe na Mkulu Nguluwi. Mlande Mkulu Nguluwi yatusile mizoka aji.” Ahyo, Musa nakawalandila wanhu.

⁸Ahyo, na heye Mkulu Nguluwi nakamlonjela Musa, “Gongomanya izoka lya shaba, lininize mchanya mwa igodi. Munhu yoneche yolumigwa na izoka, yolilola izoka alyo lya shaba, kowa mkomu.”

⁹Lelo Musa nakagongomanya izoka lya shaba, nakalininiza kuli izengo. Chila munhu yoyalumigwe na izoka loyalilolile izoka alyo lya shaba, nakawa mkomu.

¹⁰Waisilaeli nawalutilila na majendo ga hewo, nawawika kambi ako Oboti.

¹¹Kulawa ako Oboti, nawali mmajendo mbaka nawafika Iye-Abalimu, kuli kuchiwala ubanzi wa kolilawilaga isanya mwa Moabu.

¹²Kulawa ako nawaluta na kuwika kambi ya hewo kuli ibindi lya Seledi.

¹³Kulawa ako nawaluta mbaka kasikazini mwa lwanda lwa Alinoni, nawawika kambi ya hewo, kuwele mazi nagabubujikaga kulawa isi ya Waamoli na kukola kuli kuchiwala. Lwanda lwa Alinoni nalwali ndo mbaka hali Wamoabu na Waamoli.

¹⁴Kwa chiwalo acho, nayandichigwa kuli chitabu cha ngondo ya Mkulu Nguluwi. “Muji wa Wahebu kuli isi ya Sufa, na mibindi ja Alinoni

¹⁵na kuli viduliko vya mibindi ulingifika mbaka kuli muji wa Ali, na kulutila kuli mbaka mwa Moabu.”

¹⁶Kulawa ako, Waisilaeli nawali mmajendo mbaka Beeli, mina ndo izimbo liwele Mkulu Nguluwi nakamlonjela Musa, “Wakungajize wanhu hamwe na heni ndowapa mazi.”

¹⁷Aho Waisilaeli nawemba lwimbo alu. “Bogome mazi gwa izimbo! Muyimbile!

¹⁸Izimbo lyolibawigwe na wakulu, libawigwe ng'hatu na vilongozi kwa ng'hweku za hewo na mikongojo.” Kulawa kuchiwala, nawali mmajendo mbaka ako Matana,

¹⁹kulawa Matana nawaluta mbaka Nahalieli na kulawa Nahalieli nawaluta mbaka Bamoti,

²⁰na kulawa Bamoti nawaluta mbaka kuli ibindi lilingwinjila isi ya Moabu, kuli chinhembenhembe cha chidunda cha Pisiga, chilingulola kuli kuchiwala.

²¹Waisilaeli nawamhilichila usenga mndewa wa Waamoli yalinguchemigwa Sihoni, usenga awu,

²²“Utukundize tukole kuli isi ya hegwe, hatuluta hebu kula kufungo na kwinjila kuli migunda ama kuli migunda ja mizabibu ne kunwa mazi ga mizimbo ja hemwe. Tokola kuli nzila ng'hulu hela ya mndewa mbaka hotuloka isi ya hegwe.”

²³Ila Sihoni hambe yawakundize wanhu wa Isilaeli wakole kuli isi ya heye. Nakawakungajiza wanhu wa heye, nakaluta Yahasi kuchiwala kuwatowa Waisilaeli.

²⁴Ila Waisilaeli nawamkopola, nawaihola isi ya heye kulawa lwanda lwa Alinoni mbaka Yaboki, mina mbaka wa isi ya Waamoni nawali ukwamililwa ng'hatu.

²⁵Waisilaeli nawajihola miji aji jeng'ha na hewo nawekala kuli miji ja Waamoli hamwe na muji wa Heshiboni na vijiji vyake vyeng'ha.

²⁶Heshiboni nawali muji wa Sihoni, yawele mndewa wa Waamoli, yetowile na mndewa wa Moabu iwele aho hamwande, Sihoni nakaihola isi ya heye yeng'ha mbaka kuli lwanda lwa Alinoni.

²⁷Ndo mina walingwimba wa hetwe wangwimba. “Muye Heshiboni na kuzenga. Muji wa Sihoni nauzenjigwe na kwimizwa nzinzili.

²⁸Mina chiluli nachilawa Heshiboni, milapi ja chiluli najilawa kuli muji wa Sihoni, nakuudumya muji wa Ali wa Moabu, na kuvidumya vidunda vya lwanda lwa Alinoni.

²⁹Mochona wanhu wa Moabu! Namdumigwa, hemwe wanhu wa mlungu Kemoshi! Nakuwadita wana wa hegwe walume wawe wajenzi, wahinza wa hegwe nakuwaleka waholigwe wapogozi wa ngondo kwa Sihoni, mndewa wa Amoli.