Hisabu 1:6-50

⁶kwa nhanzi ya Simeoni, Shelumieli mwana wa Suli-shadai,

⁷kwa nhanzi ya Yuda, Nashoni mwana wa Aminadabu,

⁸kwa nhanzi ya Isakali, Netaneli mwana wa Suali,

⁹kwa nhanzi ya Sebuluni, Eliabu mwana wa Heloni,

¹⁰kuli wana wa Yusufu, kwa nhanzi ya Efulaimu, Elishama mwana wa Amihudi, kwa nhanzi ya Manase, Gamalieli mwana wa Pedasuli,

¹¹kwa nhanzi ya Benjamini, Abidani mwana wa Gideoni,

¹²kwa nhanzi ya Dani, Ahieseli mwana wa Amishadai,

¹³kwa nhanzi ya Asheli, Pagieli mwana wa Okilani,

¹⁴kwa nhanzi ya Gadi, Eliasafu mwana wa Deueli,

¹⁵kwa nhanzi ya Nafutali, Ahila mwana wa Enani.”

¹⁶Awa ndo vilongozi wahaguligwe kulawa kuli Waisilaeli weng'ha, kota vilongozi wakulu wa nhanzi ya hewo na vilongozi wa ng'holo za Isilaeli.

¹⁷Lelo Musa na Aluni nawawahola vilongozi awo wachemigwe matagwa ga hewo,

¹⁸na kwaluchila zuwa lya mwaluko lya mwezi wa keli, nawawakungajiza Waisilaeli weng'ha walume wawele wawazigwe chila yumwe kulawa ivyazi lya heye na lukolo lwa heye. Kwa kuwinza matagwa ga walume wawele na miyaka makumi meli na mzidi wawazigwe yumwe yumwe,

¹⁹kota Mkulu Nguluwi vyoyamlajize Musa. Musa kawawaliza walume awo kula kuchiwala ako Sinai.

²⁰Walume walawile kuli nhanzi ya Lubeni, yawele yavumbuche wa mwaluko kwa Isilaeli, kwa kuwinza vyowavumbuche hewo, kulawa ng'holo za hewo na kulawa ivyazi lya hewo, kwa kuwinza matagwa ga hewo yumwe yumwe, chila mlume yawele na miyaka makumi meli na mzidi, yoweza kwinjila kuli kitowa ngondo,

²¹nawali walume makumi gane na sita elufu na miya zihano (46,500).

²²Kulawa nhanzi ya Simeoni kwa kuwinza vyowavumbuche hewo kuli ng'holo za hewo na kulawa kuli ivyazi lya hewo kuli winji wa matagwa gawo yumwe yumwe, chila mlume yawele na miyaka makumi meli na mzidi, yalinguweza kuza kitowa ngondo,

²³nawali walume makumi gahano na tisa elufu na miya zidatu (59,300).

²⁴Kulawila kuli nhanzi ya Gadi kwa kuwinza vyowavumbuche hewo kuli ng'holo za hewo na kuli ivyazi lya hewo na kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,

²⁵nawali walume makumi gane na gahano elufu miya sita na makumi gahano (45,650).

²⁶Kulawila kuli nhanzi ya Yuda kwa kuwinza vyowavumbuche kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kwinjila kuli kitowa ngondo,

²⁷nawali wanhu makumi saba na gane elufu na miya sita (74,600).

²⁸Kulawila kuli nhanzi ya Isakali kwa kuwinza vyowavumbuche hewo kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,

²⁹nawali wanhu makumi gahano na gane elufu na miya zine (54,400).

³⁰Kulawila nhanzi ya Sebuluni kwa kuwinza vyowavumbuche hewo kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,

³¹nawali wanhu makumi gahano na saba elufu na miya zine (57,400).

³²Kulawila nhanzi ya Efulaimu, mwanage Yusufu, kwa kuwinza vyowavumbuche kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,

³³nawali wanhu makumi gane elufu na miya zihano (40,500).

³⁴Kulawila kuli nhanzi ya Manase, mwanage Yusufu, kwa kuwinza vyowavumbuche kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi walinguweza kuza kitowa ngondo,

³⁵nawali wanhu makumi gadatu na meli elufu na miya mbili (32,200).

³⁶Kulawila kuli nhanzi ya Benjamini, kwa kuwinza vyowavumbuche kuli ng'holo za hewo na kuli ivyazi lya hewo kuli winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,

³⁷nawali walume elufu makumi gadatu na gahano na miya zine (35,400).

³⁸Kulawila nhanzi ya Dani kwa kuwinza kota vyowavumbuche kuli ng'holo za hewo na kuli ivyazi lya hewo kwa kuwinza winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,

³⁹nawali walume elufu makumi sita na meli na miya saba (62,700).

⁴⁰Kulawa nhanzi ya Asheli, kwa kuwinza kota vyowavumbuche kuli ng'holo za hewo na kuli ivyazi lya hewo kwa winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,

⁴¹nawali walume elufu makumi gane na yumwe na miya zihano (41,500).

⁴²Kulawila nhanzi ya Nafutali, kwa kuwinza kota vyowavumbuche kuli ng'holo za hewo na kuli ivyazi lya hewo kwa winji wa matagwa ga hewo, wawele na miyaka makumi meli na mzidi, walinguweza kuza kitowa ngondo,

⁴³nawali walume elufu makumi gahano na gadatu na miya zine (53,400).

⁴⁴Awa ndo walume wawele wawazigwe na Musa na Aluni hamwe na utanzi wa wala vilongozi kumi na weli wa Isilaeli, chila chilongozi yalawile honhu ha lukolo lwa heye.

⁴⁵Awo ndo walume weng'ha wa Isilaeli kuwinza ivyazi lya hewo wawele na miyaka makumi meli na mzidi, walinguweza kuza kitowa ngondo kuli isi ya Isilaeli,

⁴⁶nawali walume lachi sita na elufu zidatu na miya zihano na makumi gahano (603,550).

⁴⁷Ila Walawi hawawazigwe hamwe na zila nhanzi ziyage,

⁴⁸kwa vila Mkulu Nguluwi nakamlonjela Musa,

⁴⁹“Uleche nhanzi ya Walawi na uleche kuwawaza hali wanhu wa Isilaeli,

⁵⁰ila kowabagula wawe wololela ihema lya Nguluwi lya ulolezi, vinhu vyake vyeng'ha na chila chinhu chiwele amo mgati mwake. Wowa wolipika hamwe na vinhu vyake vyeng'ha. Wokola mijito mumo mgati na kuwika kambi kwa kuzunguluta.