Hinangan 1:1-26

¹Sulat inin amban si Lukas pu si Teopilus. Tuwan Teopilus, si sulatku tagnaˈin, inaka weˈ ku si kaˈu kēmon hininang duk pamanoloˈ si Isahin kemuwe tagnaˈ paghinangnen

²ngeregseˈ ellew pamaˈangkat iye hap surgaˈin. Gaˈ pe iye paˈangkat, sinessaˈan weˈ ne meˈ aˈa tapeneˈne duk kawakilanne magmahalayak aka-aka mahāpin. Meˈ sessaˈne miyaˈan amban Niyawa Sutsihin.

³Puwas kamateynen, dem ampatpūˈ bahangi daran hep si Isa paguwaˈ si meˈ aˈa kawakilannen. Ekka meˈ tandaˈ pinakitehan weˈ ne weˈ asal ellum iye. Takitede iye duk missā iye si siye sabab pagbayaˈ Tuhanin.

⁴Mintedde sābude magtipunin, sinessaˈan siye weˈ ne, paˈinne, “Daˈa dahuˈ kaˈam tahalaˈ amban Awrusalam. Agadun bi dahuˈ meˈ pananggup Samakun, iye bakas pinaˈinku si kaˈamin.

⁵Si Yahiya, boheˈ hep pamandine meˈ aˈahin. Saguwaˈ kaˈam, pamandi si kaˈamin seddili. Palabey piyem bahangi binnaˈan, pinapiyu du si kaˈam Niyawa Sutsihin.”

⁶Dambuwaˈ ellew, sābu si Isa magtipun duk meˈ aˈa kawakilannen, tinilew iye weˈ de, paˈinde, “Tuwan, paluhayanu ne ke kuweˈitu bangsa kami Israˈilin duk pabaliknu ne pagsultananin si kami?”

⁷Nambung iye, paˈinne, “Gaˈi subey kataˈuhanbi sabab meˈ iyan. Samakun hadja magbayaˈin si meˈ maˈumantag si dunyahin duk bang sumiyan paˈantagne.

⁸Saguwaˈ inurungan du kaˈam iyan balakat pagtekka ne si kaˈam Niyawa Sutsihin. Duk kaˈam ne magaka-aka sabab akuhin laˈi si Awrusalam, si tibuˈukan lahat Yahudiya, si lahat Samariya, duk sampay si kaˈampat pidjū alam inin.”

⁹Pagubus inin bissāne, paˈangkat iye hap surgaˈ sābude mamayam-mayaman iyehin. Manjari kaˈelligan iye weˈ inalak duk gaˈ ne iye takitede.

¹⁰Sābude pe mamayam-mayaman iyehin paˈangkatne padiyataˈ langitin, bessuwang niyaˈ lella duwangan nengge si bihingde magsemmek poteˈ.

¹¹Paˈin duwanganin si siye, “O meˈ aˈa Jalil! Weˈey kaˈam tuˈu magtengge mayam padiyataˈ langit? Si Isa bakas ineddoˈ amban kaˈam binoˈo hap surgaˈin, balik du pitu kuweˈ pangitebi iye paˈangkatne hap surgaˈ miyaˈan.”

¹²Manjari tahalaˈ ne siye amban kūd Jaitun balik hap Awrusalam, tapit da kilumetro talahannen.

¹³Pagtekkade laˈi si Awrusalam, nalus siye manaˈik pī si bilik patennaˈanden. Siye miyaˈan disi Petros, si Yahiya, si Yakub, si Andariyas, si Pilip, si Tomas, si Bartolome, si Mateo, si Yakub anak si Alpahin, si Simon inēnan Pangangatuhin, duk si Judas isab anak si Yakub (Yakub seddilihin).

¹⁴Luwal siye magtipun-tipun kēmon ngampun si Tuhan. Patuhut isab si siye meˈ kadendehanin, sampay si Mariyam saˈi si Isahin, duk meˈ pungtinaˈi si Isa lellahin.

¹⁵Gaˈ tiggel puwas miyaˈan, magtipun meˈ tindeg si Isahin, niyaˈ siye kulang-labi da hatus duk duwempūˈ. Manjari nengge si Petros si tengngaˈde missā.

¹⁶“Meˈ kapungtinaˈihanku,” paˈinne, “subey tinumanan lapal Niyawa Sutsi pinasulatne pu si Daˈud ley. Lapal miyaˈan sabab si Judas ley, panduˈ meˈ aˈa maniggew si Isahin.

¹⁷Si Judas ley bakas dambuwaˈ hep saweˈte bi duk bakas isab iye kawakilan weˈ si Isa maghinang kuweˈ hinangte bi inin.”

¹⁸(Libang helling, Tuwan Teopilus, pamelli bulak hep weˈ si Judas sīn panangdan iye si hinanganne malaˈat pamuddine si Isahin. Pagtabelline bulak miyaˈan, laboˈ iye laˈi duk matey iye. Teddak bettengnen duk paguwaˈ tinaˈinen.

¹⁹Duk bawag si kēmon aˈa mapatennaˈ si Awrusalamin sabab si Judas inin. Hangkan inēnan weˈ de bulak miyaˈan si bissāde Yahudi, Akeldama. Hātinen, “Bulak Lahaˈ.”)

²⁰Paˈin si Petros pe, “Niyaˈ ayat tasulat si kitab Jabur, pinaˈin, ‘Subey ne patennaˈannen tinayikutan. Duk subey ne gaˈ niyaˈ patennaˈ laˈi.’ Duk niyaˈ isab seddili tasulat pinaˈin, ‘Subey niyaˈ seddili pinagantiˈ si bakas hinangnen.’

²¹“Hangkan hep,” paˈin si Petros, “subey niyaˈ ginellal seddili pinatuhut si kite bi naksiˈ weˈ si Isa, Panuhutanten bi, ellum ne balik. Subey iye aˈa bakas tumuhut si kite bi masa paglengngante bi duk si Isahin, tinagnaˈan amban pagpandi si Yahiyahin ngeregseˈ ellew pamaˈangkat pu si Isa hap surgaˈin.”

²³Manjari duwe ēn tinaˈatde pameneˈanden. Dambuwaˈin si Yusup, inēnan du isab Barsabbas, (inēnan isab Justus) duk dambuwaˈin si Mattiyas.

²⁴Manjari māku-māku disi Petros si Tuhan, paˈinde, “O Tuhan, kaˈu mangataˈuhan atey manusiyaˈin. Toloˈanun kami bang sine pineneˈnun tuˈu si duwangan inin,

²⁵supaya tahinangne hinang pinasukuˈnu si meˈ aˈa kawakilannun. Hinang inin inambanan hep weˈ si Judas duk pī iye si lugal matalep si iyehin.”

²⁶Ubus miyaˈan, magpuwaˈan siye duk ēn Mattiyasin tapuwaˈin. Hangkan pinatamba iye si meˈ aˈa kawakilan si Isa sampūˈ duk dambuwaˈin.