HEREVA LADA-ISIDIA 9:5-16

⁵Aoma, egu dabara bavania; vine ranuna vada na buloa ba inua;

⁶lalo-duhu ba rakatania bena ba mauri; lalo-parara dalana ai ba raka.

⁷Ḡonaḡona tauna e sisiba heniamu tauna na bae ihi-ihiraia, bona kara dika tauna e gwau heniamu tauna na bae haberoa.

⁸Ḡonaḡona tauna basio gwau henia, badina be baine inai henimu; a aonega tauna ba gwau henia bena baine lalokau henimu.

⁹Aonega tauna ba hadibaia, bena ena aonega ma baine bada; kara maoromaoro tauna ba hadibaia, bena baine diba herea.

¹⁰Iehova igari-henina na aonega matamana; Helaḡa Diravana idibana na lalo-parara.

¹¹Badina be lau ese emu mauri dinadia baina hahohodia; emu mauri laḡanidia baina hadaudaudia.

¹²Boma aonega, emu aonega ese baine hanamomu; boma ḡonaḡona, sibomu metauna ba huaia.

¹³Kavakava hahinena na e udu maurimu; ia na mai lebulebuna, asi hemarai dibana.

¹⁴Ena ruma iduarana ai e helaimu, hanua ena atai gabudia ai e helaimu,

¹⁵raka-hanai taudia, edia dala ai e raka maoromaoromu taudia, na e boi henidiamu, e tomu:

¹⁶Daika na asi aonegana, ia na iniseni ai baine raka vareai. Bona asi darana tauna na ia ese e hereva heniamu, e tomu: