HEREVA LADA-ISIDIA 7:3-27

³kwakikwakimu ai ba hiridia kau; lalomu ai ba toredia.

⁴Aonega ba hamaoroa, baoto “Oi na taihugu”; lalo-parara na turamu korikori ai ba halaoa.

⁵Ia ese lebulebu hahinena ena amo baine hamaurimu, bona ariara hahinena ena hereva gaihodia amo danu.

⁶Egu ruma gaba-mauruna badibadinai na gini, maka-maka amo na igo lasi;

⁷asi aonegadia taudia bogaragidiai, eregabe bogaragidiai, eregabe tauna ta na itaia, asi darana;

⁸una hahine ena ariara daigunina e raka heniava, ena ruma lao dalana ai e rakava,

⁹dina e kerekereva ai, dina e dihova ai, hanua e boiva ai, dibura e kauva ai.

¹⁰A itaia, hahine ta ia ida e hedavarimu; ita-itana na ariara hahinena, lalona na gageva-gageva;

¹¹e hereva momomu, e kara kavamu, e loa eva-evamu;

¹²nega haida ariara ai, ma nega haida hoihoi gabuna ai, ariara daigunidia iboudiai e banimu.

¹³Ia ese una eregabe tauna e rosiamu, e harahuamu, mai kirina ida e hereva heniamu, e tomu:

¹⁴Egu boubou ḡaudia vada na hahelagadia, hari dina ai egu gwauhamata davadia vada na heni;

¹⁵taunabunai vada na raka lasi, ihedavari-henimu totona, mai moalegu ida baina tahumu totona; bona vada name davarimu.

¹⁶Egu mahuta patana ai dabua vada na tahoa, dabua aukadia Aigupto amo, mai hairaidia;

¹⁷egu mahuta ḡauna na muramura mai bonadia amo vada na kwadia, muro bona aloe bona kinamono.

¹⁸Aoma, baita eno bou rani, baita heura heheni mai moaleda ida.

¹⁹Badina be adavagu na lasihia, ia na dala daudauna ai vada e halaolao;

²⁰ia ese moni vainana ta e abia kau, hua baine idoi negana ai baine lou mai.

²¹Hedibaḡani herevadia momo amo lalona e aniamu, ena hereva gaihodia amo lalona e ha-uraiamu.

²²Vadaeni, ia murina amo e laomu, boromakau na ialana gabuna e laomu na heto; eiava dia na heto, idoa ese e idoaiamu,

²³ela bona diba ese bogana e gwadaiamu; eiava manu na heto, rikiriki e roho heniamu, asi dibana ena mauri e negeamu.

²⁴Natu e, a kamonai henigu; udugu herevadia ba hakala henidia.

²⁵Lalomu na basine raka siri una hahine ena dala ai, ena dala lalodiai basio raka lao;

²⁶badina be vada e aladia taudia na hutuma; oibe, vada e aladia mase taudia iboudiai na hutuma herea.

²⁷Ena ruma na mase gabuna dalana, bona mase rumadia e diho henidia laomu.