HEREVA LADA-ISIDIA 4:4-12

⁴una negana ai tamagu ese e hadibagu, eto: Egu hereva na lalomu ai ba dogodia tao tarika-tarika; egu haheḡani ba badinadia, bena ba mauri.

⁵Basio helalo boio; udugu herevadia amo basio raka muri. Aonega bavabia, lalo-parara bavabia;

⁶basio rakatania, bena ia ese baine narimu; ba ura henia, bena ia ese baine gimamu.

⁷Aonega matamana binai: aonega bavabia; dahaka dahaka bavabi, to lalo-parara basio reaia.

⁸Ba laloa bada, bena ia ese baine heatolaimu; ba rosia, bena ia ese baine imodaimu.

⁹Herahera ḡauna namona na oi kwaramu baine havavalaia; havava ḡauna mai hairaina baine henimu.

¹⁰Natugu e, a kamonai; egu hereva bavabi dae, bena emu mauri laḡanidia bae hoho.

¹¹Aonega dalana vada na hadibalaimu; kara maoromaoro daladia ai vada na hakaumu.

¹²Ba raka negana ai aemu basine hekwakwanai; boma heau, basioma hetutuhi.