HEREVA LADA-ISIDIA 3:9-30

⁹Emu kohu amo Iehova ba hanamoa, bona emu uma ḡaudia iboudiai anidia roboadia amo danu;

¹⁰bena emu roge na bae honu honu dae, bona vine ranuna na emu vine ibulolaina urodia amo baine hepurai dobi.

¹¹Natugu e, Iehova ena mata-hakani basio dadaraia, bona ena sisiba basio hesikulaia;

¹²badina be Iehova ese e lalokau heniamu tauna na e sisiba heniamu, tama ta ese natuna, e lalo namo heniamu merona, na e sisiba heniamu heḡereḡerena.

¹³Aonega e davariamu tauna na namo, bona lalo-parara e abiamu tauna danu;

¹⁴badina be aonega ena amo e heabimu ahuna ese silver ena amo e heabimu ahuna na e hereaiamu, bona davana ese gold e hereaiamu.

¹⁵Ia davana ese herahera nadidia davadia e hereadiamu, bona o ura henimu ḡaudia ta na ia ida basie heḡereḡere.

¹⁶Mauri daudauna na ia imana idibana ai; taḡa bona heimodai na ia imana laurina ai.

¹⁷Ena dala na moale daladia; ena dala iboudiai na maino daladia.

¹⁸Ia na mauri auna, e dabaia taomu taudia ediai; e dogoa taomu taudia na moale taudia e gwauraidiamu.

¹⁹Iehova ese aonega amo tanobada e hadaia, lalo-parara amo guba e karaia;

²⁰iena diba-bada dainai gadobada na e aru dae, bona ori ese hunu e hadihoamu.

²¹Natugu e, aonega namona bona kara balaheni ba badinadia; oi matamu ese basie readia;

²²bena idia ese laumamu bae hamauria, bona aiomu bae heralaia,

²³bena emu dala ai ba raka mai namomu ida, bona aemu na basine hetutuhi.

²⁴Boma helai diho, basioma gari; boma hekure diho, emu mahuta bema gaiho.

²⁵Hahetaku ḡauna garina basio gari, eiava kara dika taudia ihabua-taridia baine kau negana ai danu basio gari;

²⁶badina be Iehova na emu abidadama, ia ese oi aemu baine naria, basine heidoa.

²⁷Ihanamona na mai badina bae abia taudia edia amo basio rua, ba henidia diba negana ai.

²⁸Dekemu tauna basio hamaoroa, basioto “Aola, ma ba lou mai, kerukeru baina henimu”, a ḡau be dekemu ai e miamu.

²⁹Dekemu tauna ihadikana dalana basio laloa hata, ia na badibadimu ai e nohomu, bona e abidadama henimumu.

³⁰Tau ta basio lodu henia kava, ia ese se hadikamu negana ai.