HEREVA LADA-ISIDIA 3:20-35

²⁰iena diba-bada dainai gadobada na e aru dae, bona ori ese hunu e hadihoamu.

²¹Natugu e, aonega namona bona kara balaheni ba badinadia; oi matamu ese basie readia;

²²bena idia ese laumamu bae hamauria, bona aiomu bae heralaia,

²³bena emu dala ai ba raka mai namomu ida, bona aemu na basine hetutuhi.

²⁴Boma helai diho, basioma gari; boma hekure diho, emu mahuta bema gaiho.

²⁵Hahetaku ḡauna garina basio gari, eiava kara dika taudia ihabua-taridia baine kau negana ai danu basio gari;

²⁶badina be Iehova na emu abidadama, ia ese oi aemu baine naria, basine heidoa.

²⁷Ihanamona na mai badina bae abia taudia edia amo basio rua, ba henidia diba negana ai.

²⁸Dekemu tauna basio hamaoroa, basioto “Aola, ma ba lou mai, kerukeru baina henimu”, a ḡau be dekemu ai e miamu.

²⁹Dekemu tauna ihadikana dalana basio laloa hata, ia na badibadimu ai e nohomu, bona e abidadama henimumu.

³⁰Tau ta basio lodu henia kava, ia ese se hadikamu negana ai.

³¹Taiḡa dika tauna basio vaḡeḡe henia, ena dala ta basio abia hidi;

³²badina be kara heḡui-heḡui tauna na Iehova ese e inai henia badamu, a kara maoromaoro taudia na ia ese e abidadama henidiamu.

³³Iehova ese kara dika tauna ena ruma e uduguiraiamu; a kara maoromaoro tauna ena ruma ia ese e hanamoamu.

³⁴Heihi-ihirai taudia na ia ese e ihi-ihiraidiamu; a manau taudia na ia ese e lalo namo henidiamu.

³⁵Aonega taudia davadia na heimodai, a kavakava taudia na bae hahemaraidia.