HEREVA LADA-ISIDIA 31:7-30

⁷do bae inu, bena edia ogoḡami bae laloa boio, bona edia hisihisi basie laloa une.

⁸Udumu ba hapapaia, mu taudia daidiai, bona ihareha iboudiai ahudia korikori daidiai.

⁹Udumu ba hapapaia, ba hahemaoro mai maoromaoromu ida, ogogami taudia bona e dabumu taudia ahudia korikori inanatalaidia.

¹⁰Hahine namona na daika ese baine davaria? Ia ese herahera nadinadidia namo-heredia e hereadiamu.

¹¹Adavana lalona ese ia e abidadama heniamu, bona ḡau namodia ai basine dabu.

¹²Hahine unuhetomana ese adavana e hanamoamu, se hadikaiamu, ena mauri dinadia iboudiai lalodiai.

¹³Mamoe huina bona lagwa varona e tahudiamu; ia imana na gaukara e uramu.

¹⁴Ia na hoihoi taudia edia lagatoi na heheto, ana aniani na dauha amo e mailaimu.

¹⁵Daba vaburana ai e tore isimu, ena ruma taudia adia e nadu hatamu, bona ena hesiai kekenidia edia ḡaukara e henidiamu.

¹⁶Tano ta ihoina e lalo-hadailaiamu, bena e hoiamu; ena ḡaukara anina amo vine imeana e hadoamu.

¹⁷Goada e rioamu, bona imana e ha-aukadiamu.

¹⁸Ena hoihoi anidia namodia e itamu; hanuaboi ai ena lamepa na se bodomu.

¹⁹Dabua ihatuna auna na imana ai e abiamu, bona igirolaina gau na imana amo e dogoa taomu.

²⁰Ia ese imana e kehoamu ogogami taudia ediai; bona imana ruaosi e toi roromu, e dabumu taudia ediai.

²¹Keru negana ai ena ruma taudia se kudou hetahalaidiamu, badina be iboudiai na mai edia dabua kakakakadia.

²²Ia ese hetaru e karamu; ena dabua na linen namo-hereana bona dabua kakakaka miakoremana.

²³Hanua ikoukoudia lalodiai taunimanima ese ia adavana e dibaiamu; ia na hanua tau-badadia bogaragidiai e helaimu.

²⁴Ia ese linen dabuadia e karadiamu, bena e hoidiamu; gaba ḡaudia danu hoihoi taudia dekedia e siaidia laomu.

²⁵Goada bona ninina-namo e hahedokilaidiamu; nega vaira dinadia ia ese e kiri henidiamu.

²⁶Uduna e hapapaiamu mai aonegana ida, bona hebogahisi ihahedibalaina na matana ai.

²⁷Ena ruma taudia edia kara e ita taomu; bona aniani inonogadia se animu.

²⁸Natuna e tore isimu, namona e gwauraiamu; adavana ese e imodaiamu danu, e tomu:

²⁹Hahine hutuma vada e kara namo herea, to oi ese iboudiai o hereadiamu.

³⁰Kara laloa-laloa na koikoi, bona hairai na asi anina; a Iehova garina e garimu hahinena na bae imodaia.