HEREVA LADA-ISIDIA 29:12-22

¹²Pavapava ese hereva koikoidia bema abidia dae negana ai, ia henuna taudia iboudiai na bae kara dika.

¹³Ogoḡami tauna bona ia e hahisiamu tauna raruosi e hevaira hehenimu, bena Iehova ese raruosi matadia e hadiaridiamu.

¹⁴Pavapava ese ogoḡami taudia bema hahemaoro henidia mai maoromaorona ida; ena terono baine gini hanaihanai.

¹⁵Hekwadi auna bona sisiba herevadia ese aonega e havaraiamu, a sibona ena ura e karamu merona ese sinana e hahemaraiamu.

¹⁶Kara dika taudia e lohiamu negadia ai na kara havara e bada e laomu, a kara maoromaoro taudia ese edia moru bae itaia.

¹⁷Natumu matana ba hakania, bena ia ese laḡa-ani baine henimu, bona lalomu do baine hamoalea.

¹⁸Lalo-diari lasi negana ai, taunimanima e kara havaramu, a taravatu e badinaiamu tauna na namo.

¹⁹Hesiai tauna na hereva amo mo matana se hakaniamu; badina be lalona e pararamu, a nahuana se tohoamu.

²⁰Hereva takutaku tauna ta o itaiamu a? Kavakava tauna na reana baine namo, a una tau basine namo diba.

²¹Ena hesiai tauna na merona ai e hagabuḡabua tauna na dokona ai baine hekwarahi ia dainai.

²²Badu tauna ese heiri-heiri e havaraiamu, bona badu momo tauna ese kara dika momo e havaramu.