HEREVA LADA-ISIDIA 27:9-25

⁹Dehoro bona muramura mai bonana ese lalo e hamoaleamu; a hekwakwanai ese lalo e hadikaiamu.

¹⁰Turamu bona tamamu turana basio rakatanidia; bona hahehisi karana emu ai e kaumu dinana ai tadikakamu ena ruma basiola. Dekemu tauna ena noho kahi ese tadikakamu ena noho daudau e hereaiamu.

¹¹Natugu e, ba aonega, lalogu na ba hamoalea, e gwau henigumu tauna baina haere henia totona.

¹²Lalo-parara tauna ese hahedika e itaiamu, bena e komumu; a lalo-duhu taudia na e raka laomu, unu amo e hisihisimu.

¹³Idau tauna dainai e gwau hamatamu tauna na ena dabua bavabia; bona idau taudia daidiai e gwau hamatamu negana ai, iena amo gwauhamata toana do bavabia.

¹⁴Daba matana ai e tore isimu, dekena tauna e hanamoa badabadamu, tauna na heuduguirai tauna bae gwauraia.

¹⁵Ḡadeḡade hahinena na medu e hetuturumu na heto;

¹⁶ia igwau-taona na lai igwau-taona na heto, eiava ima idibana ai dehoro ikahu-taona na heto.

¹⁷Auri ese auri e segeamu; bona tau ta ese ma tau ta e segeamu.

¹⁸Suke auna e reḡuamu tauna ese huahuana baine ania, bona biaguna e gimaiamu tauna na bae imodaia.

¹⁹Tau ta lalona na tau ta lalona ai e heitamu, ia vairana laulauna na ranu ai e heitamu na heto.

²⁰Mase gabuna bona dobu masemase gabuna asie honumu; bona tau ta matana ese ḡau se ita davanamu.

²¹Uro na silver ena, lahi gold ena, a tau ta itohona na heimodai ai e hedinaraimu.

²²Kavakava tauna na uit ida ba gwadaia hebou, to ena kavakava na iena amo basine hekoki oho.

²³Emu mamoe seridia ede e noho tomamu na ba diba, bona emu nani seridia ba reḡudia;

²⁴badina be taḡa na se mia hanaihanaimu. Kwara ivavalaina ḡau na uru iboudiai lalodiai baine mia a?

²⁵Rei baine marai, ma rei matamata baine vara, bona ororo avadia bae habou;